M. Ch-3

 

Chapter-3

Ka school bang ka haw chu ka ni hman nuamlo lutuk vang nge ni, ka chau hlûi thei a, kan school hmun hma leh chheh vel chu nuam viau mahse kan classroom chhung boruakin zir heklo le. Nileng deuh thaw in tlar hnung hmeichhe lam kan innghir ngho reng a, hemi te vang hian school pawh a nawm tur angin a nuam theilo ka ti mai. An chimawm in an ṭangrual mai si a, pakhatin ngei a neih tawh chuan an vai ngei a, an mi huat tak nih chu thil hlauhawm tak a niin ka hria.

Zanriah kan ei hma deuh vangin zan tir aṭangin lehkha ka zir a, tukverh lam ka hawi thlak vauh vauh laiin ka pawhdawh chhunga phone awm kha ka hre chhuak a, ka la kawl reng tak e.... Ka pawhdawh chu hawng rawk rawkin phone chu ka on êng a, a la ṭat danah tui a lut lemlo anih ka ring deuh a, a battery lah chu a la tam reuh phian a, screen ka hmeh en rualin miss call a rawn tlar thla nghal dual a, hawn tumin ka thai chho ve ngawt a, password a dah miahlo!

Mi phone lo en ve ngawt hi ka duh ngailo nain miss call ho chu ka en thla zung zung a, 'Pathlawia, Sâmdala, Lallungngaia, Chhetei' tih ang reng a ni nawk hlawm a, a chi leh kuang ho chu an hming a mak hlawm kher mai a. Number hriatloh aṭang pawhin a awm ve nual a, he mihring mai mai chu kei aiin be tu a ngah daih mai ka ti.

Ka dawhkan sira dah thlak leh mai ka tum laiin call a lo lut a, number save loh aṭanga anih vangin ka la duh lemlo a. Chulo ah keia lo lak ve ngawt chi ni nghal lo chuan. La loin ka ring ral tir ṭhak a, vawi thum lai a rawn ti nawn lehnghala , ka ning ta deuh chuan ka la ta ngawt pek a, ṭawng erawh ka ṭawng ngam hlek lo.

"Hello, Dennis," hmeichhe aw hian a rawn ti nem diai a, a ṭawng dan dei duai chu, ka hmeichhiat pui mah ni se ka ten ru reuh khawp mai. Ka awm hmunah ka lo ner nawng nawng ringawt tawh. "Dennis," a rawn ti tham leh chhal a, a nui deuhin ka hria. Ka hriat sual zawk pawh ani mai thei a ni. "Min chhang ve la, i zak a mi ?" Te chu a la rawn ti nem ang dei duai a, a bialnu em mawni zawk ni ? "Dennis-a chu a awmlo," ka lo ti chang fawk a, ka inchhir chawpchilh lehnghal. A bialnu a lo nih vaih chuan a rinhleh phah vel emaw kha a nia nga. Mahse a bialnu number êm chu a save ve turah ka ngai.....

"Tu nge i nih a ? Khaw nge Dennis-a ?" Nichina a awm nêm zawng zawng kha a bo tawh a, tuna ka biak hi chu hmeichhe nelawmloh zet ani tawh. Ka chhang lawklo a, ka sawi leh tur ngaihtuahin ka rilru a buai a nih mah zawk. "Dennis-a chuan vanram a fang lawk a, a lo chhuk leh hunah i lo be leh dawn nia," ka ti dam thlup a, ka chhan dan vang chuan a thinrim deuh nge ni, a rawn ṭeu hlur a, keimahin ka khi vur vur reng.

"Tu nge maw i nih reng reng le ? Dennis-a chu phone pe vat teh. Ka be duh ania," a rawn ti ṭeu hlar a, teh vak vak kher chuan a. "I van thu em em, i ta em ni ka nih a ?" Ka ti leh hram a, a ngei tur tawk leka ka chhang ṭhin chuan a thina tirim viau nge ni, "Hmeli, tu nge i nih a ? In sawi nghal rawh," a rawn ti leh chiam a, a thin chu a chhe ve hlar hlar hle mai.

"Hrangvungi ka nia, nang ai chuan ka zaidam deuh," ka ti zui leh ve zat a, 'Hmeli' min ti tel kher chu ka ngei ru ang reng viau bawk.

Ṭawng a tum leh chiah tihah call chu ka dah hmak a, mahse rei a riallo, a ngaite bawkin a ri leh a. Ka hne zo zai ta khawp mai. An khum hrep inring ran tawhin phone bawk chu ka la kang leh a, mahse tum ṭum erawh amah kha ani tawhlo tih 'Sâmdala' tih rawn lang kalh aṭang chuan ka hre zui nghal.

Tîm daiin phone chu ka la a, "Hello," ka tih rualin lehlam ami chu a rawn khuh zui kharh kharh a, a la rei em em zui a, ka lo inrin ve tawh nen. "Hello, tu nge ?" A rawn ti let hlauh a, keimah zawk chu ka bangbo letling zawk. "Keimah," ka ti teh tawp a, "Tu nge 'Keimah' chu ? Hriat a va har deuh ve," a rawn ti leh lung lung a, a ṭawngdan aṭang chuan a fing vâr hmelloh ka lo ti khawp mai. A harhfim lo zawk emaw ni ?

"Muanpuii," ka ti leh tawl a, min la hre theilo ta cheu...."Keimah Parte-i tunu," ka ti ta khawl a, zah lam pawh ka dâwn hman tawhlo ka hne hluah hluah tawh zawk. "E, Zâwri kha maw ?," a rawn ti deuh kher a, a hmuhloh lamah ka ner nasa ngang mai. "Dennis-a phone kha i kawl daih sia, hei a chhastê a be theilo ania," a rawn tih chuan ka inthlahrung veleh deuh a. Mahse ka thiamloh bik ngawt chu a nilo, eng nge ruih chhum hmawk tuma a ruih vei ni ?

"Nia.., engtin nge ni dawn ? In lo lam dawn ami ?" ka ti ṭha veleh mai a. "Hei, a neitupa nen hian inching fel rawh u. Ama ta hi alawm," a tih rualin a ri zui rawk rawk a, eng nge maw a tih ni ?

Rei ang reng deuh hnuah, "Ka duhlo," mipa aw thum dûtin a ti ri chu ka hriat leh hmasak ber a ni. "Anih, engtikah nge kan lo lam ang ? Zanin ah a rem em ?" Sâmdala number neitu zawk khan a rawn ti leh a, kan hmelchhepa kha anih ka ring. Nihliap senno-a kha.

"Zanin chu lehkha ka zir a, naktuk lamah a ni mai," ka ti chu, "Good girl vibe maw..," a rawn ti zui zat a, ka chhan leh hma hauhvin, "Vacancy a la awm em ? Di tawnglo vala te kan nia," nui kur kur chungin a rawn ti a, "Keichu ka tawng," mipa pakhat aw hian a rawn ti leh a, tu tu nge maw ka biak ni ? "E nia, Pathlawia chiah hian a tawng," a rawn ti zawm.leh zat a, chhang zui tawh lemlo in ka ngawi ran a, "E taka, Joseph-a ka nia," a hming zawh chawp ngai miah loin a rawn sawi a, ka lo ûksak vak lo nain a la ṭawng duh phar phar khawp mai.

Dar sawm bawr velah ka mu a, zing ka tho chu inhnuai ka thlen thlak rualin chaw ka chhum zui a, ka pi lo thawh ve meuh chuan ka lo chhum hmin diam tawh. School kal tura ka insiam mawlh mawlh laiin dawhkana phone ka dah chu a lo ri a, ka phone a nilo tih pawh chiang akin ka hre thei mai bawk. Lo call tu chu Joseph-a bawk kha a ni a, ka lak rual rualin pawna an awm thu an sawi a, ka uniform hak lai nen inhnuai lam panin ka chhuk thla a, kawta ka chhuah rualin Joseph-a hmel ka hmu nghal a, amah chauh anilo, midang pahnih hi an tel ve a. Pakhat zawk chu he ka phone ken mek neitu kha a ni a, pakhat zawk erawh ka hre ngailo thung.

An bul ka va thlen chuan ngawi reng hian min en ṭhap pek a, ka lai zawk lek lek ani. Joseph-a pawh a hma zawng ṭawng phar phar si kha a ngawi kur a, ka ngei zawk tak tak a ni. "Kha, hei, phone chu," tih leh ka phone ken lai chu an lamah ka lek a, a phone neitu ber chuan ka kut aṭanga a lak hnuah a thlek deuh vut vut a. Lawmthu te min hrilh ve ang chu tih laiim, "Kal ang u," a ti leh hmuk a, a va polite loh theih ngai ve le. A la nelawm loh hmel em em zui a, eng nge a hming ni ta kha le ? E...Dennis-a ni dawn tak e. Nis-chhia-a mai mai chuh! "Kan lawm lutuk ania," Joseph-a zawk chuan a rawn ti a, chhan pawh ka chhang tawhlo. Ka thinrim ve tlat tawh.

School boruak erawh ni dang aiin a zia phian a, inti fek fek leh buaina siam classroom chhungah an awm tawhlo a, tu pawh chu mahni buai buaiin kan buai a, kan awmna lam a reh ṭhap laiin tlar hnung lam erawh an thawm a ṭha dar dar ṭhin khawp a, mahse mak ve deuh chu class lak laiin han ninhlei ve deuh ṭhin mahse hrem ngai khawp khawpin engmah an ti ngailo a. Vawikhat an hauh tawh chuan ṭha takin an awm ve leh mai zel a, chu chiah chu an ṭhat ve na lai a ni.

Kar tluana school kan kal vangin inrinni chu inchhung sekrek khawih nan ka hmang a, Ruatkimi erawh thleng a sil zawh aṭangin inchung lamah a tawm euh chawt a, keipawhin ka phût buai duh ta bik lemlo. Ka pi erawh kawta a thil chîn leh phun ho en dikin a buai ve khawp a, school kala chhuak reng kan nih vangin tih tur awm ang zawng zawng tih zawh nghal vek ka rilruk deuh a. A zawna han zawn tak tak chuan khawih tur neuh neuh a lo tam khawp mai. Sitting room lam chhuat ka nawh mawlh mawlh laiin kawngkhar an rawn kik ri karh karh a, "Ka lo kal...," hawn ka tum lai meka a rawn kik leh takah chuan ka ti ta vak a. Mahse ka kawngka ka hawng chu Jaden hmel nui sâng nen kan inhma chhawn nghal siah a, ka beiseiloh lutuk anih vangin ka phâwk khawp mai.

"Ehe...," ka ti deuh hluai a, a dâr lehlama a buhfai bag put mawlh chu ani mak min tih tir lehzual tu chu... "Kha, kawng lo kian rawh," a hnung lam aṭanga ka piin a rawn tih tak lang langah chuan ka kalsawn ta thuai a. Min nuih vur vur chungin Jaden chu a rawn lut a, "Kha laiah khan lo dah tawp mai rawh," tih pahin ka piin a rawn zui lut bawk a. Fridge bula a nghah thlak dawt rualin a kawng dawmin thawk a la halh a, ka pi lah chuan chhuan hmel deuh hian a lo en a, "Dente-a hi chu i tlangval ṭhin ngawt mai. Muani, kha thingpui lo lum rawh," ka lam hawia ka piin a lo tih rualin Jaden chuan a duh loh thuin a lo pha a, ka piin a nawr deuh chung pawha a duhloh tak tlat vangin ka lum sak ta biklo. Mahse kei atan chuan buaina pumpelhna zawk a ni. Thingpui lum hi ka thiam nge thiamlo pawh ka hre chiang meuhlo. Thingpui hi kan in ngai manglo a, ka chenpui tawhte a, a in ve awmchhun ka pi leh ka pa lah hian a sen hângin an inmai ṭhin a, kei erawhin ka lum ve chang pawhin chhang chiah nan bak ka hmang ngailo a, a thingpui a tak phei chu ka in zui ngai lemlo.

"Tui vawt ka lo in thei zawk ang em ?" Min rawn enin Jaden chuan a rawn ti a, rang deuhin a dinna bula fridge chu ka pan phei a, ka hawn rualin bottle-a tui vawt kan dah chu ka pe zui zat a. "No i duh em ?" Ka tih rual erawhin a lu a thing zui na na a, a tui in lai chu ka lo nghak ta reng a, keimah zawk chu lai tak hi ka ni ringawt. "Kha, ka lawm lutuk," a bottle ken lai chu ka lamah a rawn lek a, chumi rualin mawi deuh hian min nuih pah a, a nui hmel chu luanliamna thang ang maia mawi hi a ni a, min tal awh tir tum râna thang kam ni awma mawi a ni. "Keini deuh," ka ti leh tawp a. Ka ṭawngkam thiamlo ṭhin lutuk hi ka inhaw zawk ta hial mai.

Ka pi kha a chhuah leh lai reng ka lo hre lo, ka hriatchhuah leh meuh chuan kan pahnih chauhin chokaah kan lo awm tawh a, kan pahnih chauh kan ni nain boruak hip tur chu a tlem ta riau hian ka hre pek a, amah hi chuan a hre ve kherin ka ringlo. "Anih, ka phei dawn ania," a rawn ti leh a, a ni pawh a lai ve tho chuan ka hria. Kan la inhmelhriat ṭhat loh vang te pawh a ni mahna le....

A chhuah dawn chuan kawngka thleng ka thlah a, a chhuak ta chu pawna ka pi hnim leh eng ilo pawta ṭhu ve reng chuanin a lo be nghal siam siam a, kei erawhin ngaihsak zui tawh lemlo in inchhungah ka luh san ta daih thung. Zan lamah erawh lehkha zir ngial ka han tum ve pawhin rilruah a lut hleithei meuhlo a. Ka thiam thei dawn chuanglo a ka hriat tak vangin ka rawng ṭhenkhat la chhuakin lem ka ziak a, ka ziah lohna a rei tawh vang nge ni, ka khawr deuh ṭût a, ka ziak mawilo bik ta riau te hian ka hre ta.

A tuk chu chawlhni anih vangin ka piin inkhawm turin min ti ve a, Ruatkimi chu senior department tur chiah a nih laiin kei erawh puitlingah ka awm pha tawh a. Ka inkhawm hreh ru ang reng khawp mai. Kal rualpui tur tal te chu awm se chuan a zia ve deuh maithei a ni.

Ruatkimi chu a ṭhiannu in a rawn sawm a, he mihring nu hian kawm nel lo zu nei leh hman bik a. Em em ṭhin hian a. "Pi, ka van inkhawm hreh reuh," ka pi bula ka tih chuan a lo hrethiam deuh nge ni, "Mi ho hi i inkhawm chhan a nilo, Pathian vanga inkhawm tur alawm i nih. Kei lah inkhawm turin ka ṭhu tung rei thei lova, ka kawng a na zel ṭhin tih chu i hriat kha. Nang tal chu inkhawm rawh," a ti teh tlat a, phurlo deuh chuan ka insiam ve ta tho a, puan bih loin kawrfual senno, ka khum chin vela fual hi ka ha a, ka sam chu thlahin bakilhin ka chalsam ho chu ka kilh leh tawp a. Pheikhawk erawh a sang ka bun ve a, chawhmaa a hniam han bun bik ngawt chu ema ka ti ve deuh.

Inhnuai lam pana ka chhuk thlak lai mekin sitting room-a Jaden ṭhu ka hmu hlawl a, kamis var thianghlim sar hi a ha a, a kawr hak dan mai aṭang pawn inkhawm tur ani tih a hriat nghal mai a, nidang ang bawkin a lang ṭha leh pek viau bawk. "Ehe...,nang elaw!" Ka tih chuan a rawn hawi ve vat a, min rawn enin a nui leh sâng tawh a, "I hman tawh chuan kal ila, dar a ri chiahin a hria," a rawn ti dam dup a, min rawn sawm tihna nge mawni dawn ni ? Pawn lam panin kan inzui chhuak a, pawn kan chhuah chuan ka pi nilum aia lo ṭhu awn dar dar chuan min lo chiau au vat a, Jaden a fak leh nasa lutuk chu ka lo inthlahrung zawk. An innel viau emaw ni zawk ni ?

Biak in chhungah chuan ṭhalai ṭhutnaah kan ṭhu a, ka ngaihbel nge ni, mi lah chuan min en hrek hrek hian ka hre tlat pek a, ka awm a nuam fahranlo khawp mai. Kan inkhawm bang, kan haw lamah Nu Maengi dawrah kan peng kawi a, nep nawi eng eng emaw thlang kualin ka buai rei khawp a, Jaden ka hriat chhuah leh tak si vangin ka hmanhmawh zual sawt a. A lo ning hman em lo ang chu.

Pawisa pek ka tum chu, "Ka lo pe ang," Jaden-in a ti deuh tlat pek a, kei lahin ka lo duh biklo nasa. "A ngailo, ka keng ve alawm," ka ti chung pawhin a ti lui deuh tlat a, Nu Maengi lah chuan min lo chheih deuh zuk zuk leh a, hmai a uang duhlo khawp mai. In kan thlen dawn hnaih kawng kawiah, Joseph-a te kan tawk hlawl a, an kawr hak aṭang reng reng chuan an inkhawm lo tih a hriat khawp mai a. An bike nghengin meizial an la pak khu luih luih lehnghal a, a zah pawh an zak zawk lo emaw ni ? Inkhawm bangin an pel suau suau sia.

"Saw mi te saw i hre ngai em ?" Jaden chu ka be ru sar sar a, kan hma lama ding te pawh chuan kan lam an rawn hawi phei ve chiah bawk. "Joseph-a te saw maw ?" A rawn ti deuh hu a, ka lo buk nghat nghat rualin, "Kan school ami te an nih saw. I la hmu ngai na nge ?" Tiin min zawt let a, "Hmu tawh tho e," tiin kan hma lama mipa pali te lam chu ka en leh a, min lo ngaihsak vakloh hmel khawp mai. "An van sual hmel em em. An zahtheihloh hmel si," sawi te chuan ka tih leh sap a, ka thu tak hle thung. An sual hmel ka ti tak tak. En mai pawn tlangval awmṭha duhlo an ni tih a chiang reng a, khawlaia mi chheih ching an nih duh hmel bawk a, an chimawm dan tur thlengin ka ngaihtuah kual a, min lo be leh ta anih pawhin hnaih loh tawp ka duh tawh.

An zawn kan thlen phei chuan Joseph-an Jaden chu a lo biak tak vangin kan ding kawi leh rih a, Joseph-a ber chuan min be ve luam a, a ṭhianpa pakhat, "Pathlawia," a ti ta in ka hria, chu nen chuan min inhmelhriat tir ve a, midang pahnih erawhin melh pawh min melh eih lo thung a. Inbe lem chuang loin an pahnihin an ngawi dun rauh rauh a, an inla ngeng ve deuh zawk em mawni ?

"Hei, Zâwri hi han hmelhriat ve reng reng teh. A fel ania, vacancy pawh a awm maithei," a ṭhianpa bulah chuan a ti deuh kher a, kei erawh ka lo tûm kawh leh tawh khawp mai. "Hei hi Pathlawia a nih hi, thlawi ngun zak zak tawh a nia," tih pahin a ṭhianpa chu a darah a kuah zui zat a, pakhat erawh a lungawi vaklo ania nge, a ner zui nawk a, "Hei hi Joseph Lallawmzuala a nih hi, Sâmdal kan ti ṭhin," a kuahna aṭanga tâl chhuakin a rawn ti veleh a, khawi aṭanga heng hming pangailo deuh deuh hi inphuah nge maw an nih ni ?

An ṭhianpa pakhat dang erawh zinga lo kal ve kha a ni a, ka lo en chiang miahlo a. Joseph-a nen Nu Maengi dawr kawta ka hmuh kha ni ta in ka hria. A hnung zawka ding thutak deuh kha, a ni ngei e. Tunah pawh a tum leh luau tawh a, a smiling face lo ve hrim hrim nge, a tih lui zawk ni ang tihin ka rilru a luah mek a ni.

A pali na erawh Dennis-a kha a ni a, polite lo leh sual hmel ka tih em em mai kha. A hmel en reng reng pawn a nelawm lemloh tih a hriat theih mai a, a ṭawng tamloh hmel viau bawk. Jaden zawk chu zawhna an zawt an zawt a, kei erawh an sirah ka lo ding ngawi reng thung a, ka tih tur hre loin ka kut chu ka hum leh rauh rauh ṭhin a, Joseph-a erawh a la ṭawng tui khawp mai.

"Ruatfel naktuk i inkhel dawn em ?" Tiin Jaden chuan a hmaa dawra ka hmuh tel pa lam kha a hawi a,pakhat lah chuan ṭawng kaa chhang mai lo hian lu a lo buk nghat ringawt a, a ṭawng mawh reuh viau ang ka ti. "Anih, kan kal mai dawn asin," Jaden chuan a ti ve ta a, ka lo lawm teh asin aw.....

Hriat loh karin kâr kan lo hmang ral ve leh ta reng mai. Hun hi a kal chak a, a hlu bawk a, second rei lo tê pawh chelh din theih leh koh kir theih a nilo. Chu chu hre rengin keichuan ka nunna second tin hi hlim tak leh rilru hahdam taka hman ral zel ka duh a, chutiang tur chuan ka la inbuatsaih mek zel a ni.

April thla, nilaini tawp ber zan a ni a, rilruah lehkha zir a lang vaklo bawk nen, zan dang zawng aiin kan mu hma a. Kan mu hma ka han ti ve tak nain, ka phone-ah eng eng emaw en kualin ka khumah ka mu dar dar a, zan chu a reh hle nain ka mut a chhuaklo khawp mai.

Zan a rei tulh tulh a, dâr a tlai tulh tulh bawk a. Mut chhuakin min rawn zem chiai chiai rualin ka phone chu lukham hnuaiah ka rawlh nghal sawt sawt a, ka mit ka chhing zui nghal hmiah bawk. Ka muhil ṭan dawn chauh tihah thawm ri hak ka hria a, ka men zui kâwk rualin thawm chu a ring tulh tulh emaw tih mai tur a ni.

Mut ṭhat leh mai ka han tum a, mahse mut zui na chi a ni tawhlo hulhual. Pawn lam thawm chu ṭawng ri nawk nawk nen a inpawlh nawk a, kawngpui lama ka tukverh chu hawngin ka hawi thlaa, kan in kawt mai, kawngpui sir lam deuhah chuan mipa rual hi an phusa nuaih nuaih a, an lan dan mai aṭang chuan an insual niin ka hria.

Ka hawi thlak mek laiin kan in kawngka chu a rawn inhawng a, chutih rualin ka pi chu torchlight tê nen a rawn chhuak ve zui a. Ka pi ka hmuh rual rualin rang fahran hian inhnuai lamah ka chhuk thla a, ka pi kal chhuak chu ka zui ve nghal zat bawk.

"I lo tho elaw ? Tute nge mawni ?" Min hmuh rualin ka piin a lo ti a, kan inhungna sir lam chu kan pan phei a, kan hma lama intibuai te erawh an mahni buai buaiin an lo buai khawp mai. "Tute nge in nih a ? In va bengchheng em em ve mawle," ka piin a tih rualin an zinga pakhat chu a rawn hawi a. Chumi rualin, ka piin a torchlight ken laiin a hmaiah tak a lo ên nghal zui siah a, Laljoseph-a hmel bawk ani ka hmuh leh tak ni. "Ka pi, i ti awm anglo emai," a kuta a hmai hliah chungin a hawi sawn a, midang ho pawh kan lam hawiin an lo ding ṭhap tawh chu niin.

"Engah nge heng laiah te buaina in lo siam a ? Haw vek rawh u," tih paha ka piin a light ken laia a en kual tak dan dan chuan an kutin an lo inhliah sap sap a, Pathlawia leh Ruatfela ni ta in ka hria, kha mite pawh kha an awm ve a, Dennis-a pawh a awm ve bawk. Midang an rik nak nak laiin a sir deuha hnuai lam bihin a ding ngawi rân a, ka piin a en ve lai pawh chuan a rawn hawi chhuak ve eihlo. A awmdan chu mipa ngeng leh tih mawh deuh hi a ang ber a, ka ngaihtheihloh zawng tak a ni. Mi dang pathum erawh ka la hre ngailo a, pakhat chu ka hmuh hnu ang riau hian ka hre pek a, ka hriat sual zawk pawh a ni maithei.

"Haw vek ang che u, kha, kha lai ami kha, Israel-a fapa i ni em ?" Tia ka piin a biak lai pawh chuan hrelo ang hmakin a awm a, a awm dan chu mi suak sual awm dan diktak a ni. "Haw vat ang che u, helaiah bengchheng kan duhlo," ka piin a tih leh zet hnuah in lam kan pan a, "Tu te nge ni a ?" An bathlar aṭangin kan ṭhenawmnu, Nu Sangtei Jaden-a nî ni bawk chuan tho phang tih hriat deuh hian a rawn ti a, a ni pawh thawm ri bengchheng vangin a lo harh ve anih ka ring. "Tlangval hawklak mai mai anih hmel, kha an rawn bengchheng chiam leh nghal a," ka piin a ti zui hlak hlak a, inchhung kan luh rual a sana ka han en chu dar 1 a lo ri va va tawh a. Ka mut chu a la chhuak khawp mai.

"I hriat ngai te an ni em ?" Tiin ka piin min zawt a. "Hre ve deuh reuh e, a ṭhen kha chu kan school ami te an nia, mahse inhre ṭha lutuk chu kan nilo. A chang hian ka hmu ve leh zeuh zel," ka ti chu keimah leh keimah zawk chu ka inawihlo ru riau a, school chhungah vawikhat tê mah ka la hmu fuhlo miau a ni.

Jaden hnen aṭangin kan school zirlai an ni tih kha chu ka hre ve tawh ngei a, ka sawi lang ve ta ngawt lehnghal a, an lo ni leh lo ang tih ka hlau ang reng khawp mai. "Tu fapa nge i tih kha ? Hriat i nei zawk em ni ?" Zawhna dang min lo zawh leh hlauin ka lo insawi khalh nghal zung zung a, "Israel-a fapa mawle, kan khaw S.I hi a nia, an inang êm a ka ti deuh mai mai mawle...." A ti ṭha ve mai a, sawi zui tawh lovin kan pindan lam ve ve kan pan zui a. Ka khum ka thlen leh meuh chuan ka muhil leh nghal der chu a ni thaw thâng.

A tûk zing chu thawh ka hai nghal pang a, ka hmanhmawh em em laiin Ruatkimi chu a nuam sam meuhlo a, a khua a sik hluah mai si a, school pawh keimaha ka kal mai a ngaih tak hmel..... "I tiffin kha i la em ?" Kawngkaa ka chhuak zet tawh chu ka lut leh rih a, dawhkana ka tiffin siam sa thlap chu lain ka bag-ah ka thun zui sawk sawk a, ka piin min lo biak zuina pawh ngaihsak tawh lem lovin ka tlan chhuak zui dawr dawr a.

Hmanhmawh tawh nen, ka ke pên te chu a muang zual ta riau hian ka hria. Nu Maêngi dawr thlen dawnah Jaden-an min rawn nang a, chuang ve tura min sawmna chu ka hnial lo kher asin. Ka dinhmunin a zirlo miau a ni.

"Banah min lo nghak rawh, kan haw rual dawn nia," dam thluama a rawn tih chuan ka lo aw ṭha ve mai a. Classroom chhung ka lut chiah tihah dâr a rawn ri zui a, vawiin meuh zawng ka tlai teuh kher mai. "Thawh i hai leh tawh a ni maw...?" Ka ṭhut thlak rual rualin Aby'n a lo ti nghal a, ka lu ka buk nghat nghat rualin, "I mu har a ni maw ?" A lo ti zui zat a, "A mut theih reng reng loh, insual an awm pek a," ka lo ti veleh a, Sir Zorema a lo luh tak vangin kan inbe zawm tawhlo thung.

Nileng chuan pangai takin class kan kal a, thil danglam emaw thleng a awmlo a, a hma ai ngawt chuan ka tlangnel ve tawh hle bawk. Ka hmun phiah ni a nih vangin, midang haw hnuah pawh a awm hnufual zingah ka ṭang a, ka class assistant Lily'n min vil rân bawk a, kan class leader ber Benedict erawh a kallo a, kei leh mi pahnih dang chu duty kan ni a, Lily erawh, ṭha taka kan tih leh tih loh endik tura awm hnufual ve mai chauh a ni.

"Tukverh kha lo khar la, bawlhhlawh i peih leh bawk ang a, hmun chu kan lo phiat vek mai ang," Hlimhlimin a rawn tih takah chuan ka hnial zui bik lova, tukverh zawng zawng chu kharin bawlhhlawh peih tur chuan school hnung lam ka pan a, zun in sir deuha khuar khurum, bawlhhlawh peih nana kan hman ṭhinah chuan ka bawlhhlawh bawm ken lai chu ka bun ruak nghal a, chhoh leh mai ka tum chu ka sir deuh aṭang hian a rawn ri bur a, vawikhat mai ani hauhlo.

Kal pheiin school building sir lam chu ka va thlek dâk dâk a, ka va hmuh lai tak scene lah chu ! A râpawm lai tak scene a ni. Mipa pakhat hian a mipat pui tho, a kawr awmah ṭhamin a hmaiah a hnek sawk sawk a, chu pa hmel chu, ka khawngaih lutuk tlat ! A hmai chu a pilh pheng phung a, ka kamis âwm velah te chuan thisen a kai pheng phung a, a khawih tupa lah chuan duh tawk mai a la tumlo. Thah a tum zawk em mawni ka ti ta hial ? Chutah, thisen kai phung chung chuan min rawn melh zawk a, 'Min pui rawh' tih melh tak hian min melhin ka hria. Kei ve tehlul hian eng nge maw ka han tih fahran ang ni ?

Chutah zet zawng ṭanpui tu zawngin ka hawi kual ruai a, tumah ka hmu mailo lehnghal. Tih theih dang nei thlawt lova ka inhriat takah chuan ka huaisenna sawm khawmin ka bawlhhlawh bawm ken lai chu ka nghat thla chawrh a, chhut châra ka dah thlak rualin an lamah ka tlan phei risk ve ṭhuai a, "Hey, thlah rawh !" Tia a bana ka va man ve ringawt chu ka ti fuh ta chiahlo niin ka hria. "Kal mai teh !" Tih pahin min nem per lawp a, a tha han chak em em zia chu rin phak bak a ni. Duh ngat chu ni se a thlawhin min thlawh thla vawn vawn thei ang chu.

Tih theih engmah ka nei tawhlo, ka tha a sawi a, ka huaisenna zawng zawngin min thlawh bo san a. Mahse, ka hmaa na tuara let reng hmel ka en leh chiah chuan ka khawngaih ve lawi si a. Tunah rih chuan, he Dennis hmelchhepa-a hi ka mihring huat ber ani hial awm e.....

Pakhat zawk chu na tuar tih hriat tak hian chhuatah a let reng a, Dennis-a erawhin rum deuh hian chhuat chara a let chu a melh reng ringawt a. A mitmeng thim khupah chuan a thinrim ani tih ka hmu thei nain he mihring pa hi tunah rih chuan ka hua a, ka dem ngawih ngawih bawk. Chhuata mipa let reng chu a kawr awma ṭhama a pawh thawh nawlh rualin a banah chuan ka lo dawm leh chawt a, "Ti tawh suh," ka ti teh ngawt a. Ka mittui a tling ṭeuh tawh a, vawikhat khap leka tla thei tur ang hian a awm tawh.

"Nang hi! Eng nge i rawn inrawlh ve a ?" A rawn ti chang rût a, sir lamah min pawt pheiin bangah min nam bet nghal rawk a, a mitmeng rum ûl leh thutak rûn nen kan in hmachhawn nghal ran bawk. "Hmeichhe kutthlak hi ka duh eihlo a nia," a rawn ti cher cher a, a vin lo a, a ṭawng ring hranlo bawk. Mahse, a aw chu a hlauhawm takzet tho..... "Hnek chawrh i duhloh chuan kalsawn vat rawh !" A tawp lam chu a vin ta deuh a, min thlah hlawk rualin chhuatah ka ṭhu thla hnawk a, ka mittui a rawn far thla zung zung bawk.

Ka tum loh lutukin ka ṭap chhuak ta hawk a, insum tum lutukin ka hmui ka pet ve fan fan nain awmzia a nei thui fahranlo khawp mai. Rei fe chu ka ṭhu tawh, ka insût leh feih feih ṭhin a, ka tâwt ṭun mai bawk a. Ka awm dan chu a hreawm vel vek a ni. Ka hma zawn enin ka ṭhu ngawi rân a, ka ngaihtuahna ka kâwm hi a ni mah zawk. Engtia rei nge chutianga ka awm chu ka hrelo, ka bula rûm ri ṭuah ṭuah ka hriat rualin ka harh zawk a, ka sir lam ka han hawi chu, na tuar tih hriat tak hian a lo la let reng a. Kan misualpa erawh hmuh tur a awm tawh miahlo thung.

Ka ṭhut ngai renga ṭhu in ka bula mipa, na tak tuara let reng chu ka en reng ringawt a. Hetiang ringawt pawh hian ka chau takzet tawh a ni. Chutah, "Ana lutuk!" A rawn tichhuak deuh halh a, a rawn ṭap chhuak ti tih deuh bawk. Chutah zet zawng ka va pan hnai ve ta rawk rawk a, a taksa na vanga ṭap ṭha theilo tih hriat zet hian a mittui chu a luang zung zung a, a taksa chu a khur nasa hle bawk. "Ṭhianpa," tia a bana ka va dawm chu a na a ti deuh aniang, a lo tal nasa mai a, hetianga khawih na lai apiang na a tih tlat si chuan engtin nge maw ka han tih bik ang ni ?

"Heti hian a na em ?" Tih pahin a ban dinglamah ka vuan a, a lu chu zawi tê hian a lo thing a, tun thawh mai ka han tum chu ka thei aw zawnglo. A rit lutuk tlat ! Chhuatah chuan ka han nghat thla leh rih a, ka tih ngaihna hrelo chuan beidawng zet hian ka en leh tlawk tlawk ringawt a. Ka hne takzet tawh a ni.....

Rei ka la ṭhu hmanlo, ka hnung lamah lighter talh ri khep ri ka hria a, ka lehhawi chu mi pakhat hi min hnungchhawn zawng hian a lo ding a, min hre changlo lêkin meizial a pak khu hlat hlat a, thlang lam hawiin a thlir dauh dauh bawk. Han auh mai ka tum laiin ka sir ami zawk chu a rawn che ṭual ṭual a, kan sir lama meizial zu pawh chu a rawn hawi rang ta khawp mai. "Ṭhianpa, min lo pui lawk teh," ka lo ti ve nghal thuai a, che châng lovin min en ringawt anih chu ! Eng nge maw a hriat ni ? Chutah a meizial zuk lai chu peihin muang châng hian a rawn phei a, ka huat tawk a lo tling khawp mai. Helaiah a puih ngai ngawih ngawih kan awm a, chutah pawh a la hmanhmawh duh eihlo chu ka ngei ru takzet !

"Engtin nge a awm a ?" Ka bula rawn ṭhut hniam pahin a rawn ti bung nghut a,  ka sir lam ami chu a rawn thlek nghal thuak thuak bawk a. "Lalremruat, i harh em ?" Tiin a biangah a beng zui thak thak a, pakhat zawk chu a rawn meng deuh nain a reilo. "Engtin nge ni dawn ?" Chiai lutukin ka lo ti ruai a, "Ka hrelo," a lo ti leh ringawt a, a va han thlamuan thlak loh em em bawk ve mawle. A ngaih a sam hmel si.

"Zothantluanga tih ani em ?" Kan ngawih dun rauh rauh hnuah chuan min en lovin a rawn ti bung leh nghut a, a, "Eng maw...?" Ka lo ti deuh haw chu, "Dennis-a a ni em ?" A rawn ti leh zat a, min rawn en nghal vut bawk. Ka lu ka lo buk nghat nghat rualin a thaw chhuak zui halh a, "Zothantluanga ṭhin hi chuh !" A ti zui hluk ri chu zawi viau mahse min hnaih chêta awm anih vangin ka hre chiang khawp mai.

Amah zawk chuan kan damlo chu kai thovin a pua a, "Lo tuar hram hram rawh," a puak pa na ti chu ka lo be ve leh zeuh zeuh ṭhin a. Duh anga chetsawnpui theih anih loh vangin a buaithlak ang reng. "Saw lamah sawn kal ang u, ka ṭhian ten min nghak," a paw tu pa zawkin a rawn tih chuan a tih dan dan chu ka lo pawm zung zung ringawt a. Ngaihdan dang nei ve hek lo le.

School gate pawnah chhuakin sir lam deuhah kan peng a, min hruaina hmunah chuan mipa pahnih hi zial zu in thing hnuaiah an lo ṭhu dar dar a, an lo hahdam dun hmel dar dar khawp mai. "Valriang, hei, Lalremruata hi Zothantluangan a lo ambush deuh anih hi. Damdawi inah hruai a ngai ang," min pui tu pa chuan a ti nghal zung zung a, 'Valrianga' tih pawh chu. Ka hriat hnu a ang deuh ka ti. "Kan ṭawngthei-a chu duh ai a dak hnem leh deuh a nilo maw ?" Valrianga a tih pa chuan rawn thawh tharh pahin a rawn ti a, chiai buaina eih an neilo chu mak ka ti ru viau zawk. "Chan tawk hi kan hmu châwk a nia," pakhat zawk lah chuan a ṭhut dan ngai renga ṭhu hian a lo ti sam êt a. An thu lak dan chu ka duhloh zawng tak ani. Engmah erawh ka sawi zui bik lem chuanglo.

"E...a va khawih na tak che ve. A thin i tirim viau a niang maw...," Valrianga chuan Remruata en vang vang pah chuan a rawn ti chhuak phawng a, thutak hla taka tuman an la lo chuan ka thin an tirim hlur tawh. "Engtin nge kan tih dawn ? Bike-a phurh chi a ni awm si lova, Pathlawia kan call mai dawn em ni ?" Thingkung hnuaia ṭhu pawh chu a rawn tho ve zui a, Remruata mu hlawm reng chu a rawn thlek dak dak a, a thusawi erawh, Valrianga duh zawng a ni vaklo aniang, "Zantiang tawnmangah pawh kha pa kha chu ka be lullo ang. A ṭhianpa sawisak hlim hlawt lehnghal hi a bawihsâwm duhin i ring em ni ? Hnai love.....," a ti ta zêk a, pakhat zawk chu a nui a nui ringawt tawh.

"Ti vat vat teh u.... na a tuar rei tawh ania," kalo ti ve chu ka lam an lo hawi phei ṭhap vang chuan ka kâ ka chîp zui hmiah a. Ka ṭawng zui leh tawhlo hrim hrim. "Sir Zorema ka va ko mai dawn em ni ? An in a hnai ber alawm," Valrianga lo zawk mipa dang lo awm ve khan a rawn ti a, tih theih dang nei silo chuan kan lo pawm tlang khawp mai.

Sir Zorema pun turin Valrianga leh a ṭhianpa chu an kal a, nichina min lo pui tu erawh Remruata kiangah a ṭhu ve reng a, a khat tawkin Remruata na tuar chu kan buaipui leh zeuh zeuh ṭhin tih loah chuan kan inbe lo hrim hrim a. Ngawi renga thing hnuaia lo ṭhut ngawih tlawk tlawk ringawt chu a ninawm duh khawp mai. Valrianga te ṭhian dun lah chu an thang rei em em mai lehnghal a, khua pawh a tlai zo tak ngial dawnin ka hria.

Minute hnih vel a ral leh ang tihah, kan hmaah car a rawn ding a, Sir Zorema hmel kan hmu zui zat a, a hnungah Valrianga leh a ṭhianpa pawh kha an lo chuang ve nghe nghe. "E.., a va na em em tak ve mawle, damdawiin ah phur phei vat ang u," Sir Zorema chuan a rawn ti nghal sawk sawk a. Remruata chu car chhungah a dah lut nghal a, car-a an dah lut tur ringawt te chu na a han ti khawp a. Ka khawngaih ru takzet.

"Lo va kal ula, ka lo zui ve nghal dawn che u nia. Hei, helaia buaina tê hi kan ching fel lawk ang," min ṭanpui tupa khan car chhunga a ṭhiante biak pahin a ti tel kher a. "I va phakar bik e aw....," Valrianga lo zawkin a rawn ti zui nung nung a. "Ngawi mai mai teh Vela," tih pahin pakhat zawk chuan a tukhumah a beng zui dat a, an inkoh dan ve mai chuh. He khaw mi te hian hming pangai an nei miahlo emaw ni tih theih tur hial a ni.

"I bag va la rawh, hetah ka lo nghak ang che," Valrianga te an tlan liam chiah tihah a rawn ti nghal a, hnial lovin school lam chu ka pan leh a, mahse beisei loh deuhin school kawtah chuan inkhel an lo awm a. Ka va kal chu min lo en hu hu hlawm lehnghal a, nuamlo duh tak chu a ni. Classroom chhung ka luh chuan an haw vek tawh ang chu ka tih laiin tlar hnung hmeichhe ho an lo la awm nual a. Ka va lut min lo hmu chu an lo phâwk hlawm khawp mai a. "Khaw nge i kal daih a ? Kan zawng nasa lutuk che," Lily chuan a lo ti hluai a, "Accident tawk an lo awm a, ka buaipui ve daih alawm," inthlahrung deuh chuan ka lo ti ve a. Kei vanga an lo buai chiam chiam pawh chu nuam ka ti fahranlo khawp mai.

"Accident a ? Tu te ?" Tlar hnung hmeichhe zing ami tho, Hlutei ni ta in ka hria, Aby tibuai ve ziah tu khan a rawn ti a. A aw te chu ka hre rum bik tlat tawh. "Khu tah, Remruata an ti in ka hria," ka lo ti ṭha ve mai a. "Lalremruata maw ? Engtin nge a awm a ?" An ṭhiannu tho Juliet-in a rawn ti ve zui a, a hmelah chuan mak a tih hmel deuhin ka hria. "An insual aniang, a thi phengphung mai," hrelo awm ang deuh chuan ka ti zui a, ka lehkhabu ṭhenkhat ho chu ka khung fel sawk sawk a, "Duh aiin a ṭawng hnem leh deuh tawh aniang chu. A ka kal lutuk ṭhin hi chu a vanduai pui anih hi," Hlutei bawk chuan a rawn ti leh a. Hemi te pawh chu a. Engkimah Remruata an dem vek hlawm chu mak ka ti deuh a, a lo sual viau zawk tihna em mawni dawn ni ?

"Anih chuan haw ila, nang pawh lo kal ve nghal rawh," bag ka ah mawlh mawlh laiin Hlutei bawk chuan a rawn ti leh a, an ni pali nena haw ho chu ka hreh ru ang reng viau a,mahse engtin min ti bik chuan ka ring chuanglo. Kan haw tur chu gate bula Jaden kan tawk hlawl a, inkhel tur tih hriat deuh tak hian sneakers a bun a, a chhelo leh pek viau mai. "Eng nge hetah I la tih a ? I piin a ngaihtuah teh mai che ania," nidang angin a aw chu a dam thlup lo nain a vin hranlo a. Mak deuh maiin min ngaihtuah deuh ang hian a ṭawng a, chu chuan chhan awmlo in min ti hlim ve veng veng ringawt anih chu ! Tenawm hian in a.

"Nia, hei buaina tlem kan nei deuh a....," ka ti ta ngawt. Chu bak han chhuanlam mai tur ka hrelo miau a ni. "Anih chu, va haw vat rawh. Nichinah pawh min lo zawt a, midang an bâng vek tawh sia, a hlauthawng tawh viau ang." A tih chuan chhang zui lovin ka lu ka bu a. Ani pawh basketball ground lamah a phei zui a, mipa ho inkhel bula nichina min puitu pa ka va hmuh chuan nghaktu ka nei tih ka hre chhuak veleh chiah. "Ruatdik, i la haw dawn lo a mi ?" Ka biak hma hauhvin Hlutein a lo ti a, Ruatdika maw a hming ? Mizo mipa hmingah chuan mawi ka tih zawng tak a ni.

"Nia," tiin keimah zawk chu min rawn en zawk a, "Nghah i ngai lo ang maw ?" A rawn ti zui leh zat a. Ka lu ka lo buk nghat nghat rualin a ni pawh kal a tum zui ve mai bawk a. "Lily, haw har suh ang che," a tih leh zet hnuah gate lam panin a chhuak zui a. A kal liam lai chu ka thlir reng ringawt.

In lam pan chuan tlar hnung hmeichhe ho nen kan haw hova. An bulah pawh kal lovin an hmaah ngawi rengin ka kal a, ka be lo a, anni pawn min be heklo. Mahse an mahni tawkah an thawm chu a ṭha dar dar hle a, a nui ring thei viau bawk. Rei lo ah tlem te te in kan peng hrang ta pheuh pheuh a, a tawpah chuan kei chiah ka bâng ta. In ka thlen chuan rin lawk ang ngeiin ka pi chu a lo hlauthawng viau a. Midang school bâng a lo hmu bawk nen, a thinrim zawk lek lek a. Mahse min ngaihtuah vang zawk ani tih ka hriat chian vangin ṭha deuh chuan ka hrilh fiah ve mai a, Dennis-a chungchang erawh ka sawi lang eih lo thung. "Hetiang chen chen awm khawtlai tawh reng reng suh," a tih leh zet hnuah a duh tawk ve ta chauh a. Inthlak turin inchung lamah ka chho zui ta daih bawk.

A tûk school ka kal chu Remruata chungchang mawlh chuan school pum a luah khat a. Zirlaite ti ti ber anih tak vangin, keipawh ka hming a lang tel ve nualin ka ring a, mahse zawhna min rawn zawt emaw, keima lamah chuan thil danglam engmah a awm hranlo a. School-a ka hun hman dan chu danglam engmah a la awm chuanglo. A tûk zing school ka kal leh erawh, a dan a dang ta deuh a. Kan class cr Benedict in principal in min koh thu a sawi a, a office-a kal turin min ti nghal bawk. Principal office ka luh dawn chuan kawngka bulah Ruatdika nen kan intawk a, ani pawh an ko ve tho anih ka ring.

"I thil hmuh kha engmah sawi chhuak suh ang che. Eng pawh zawt mah che sela, Dennis-a hming sawi lang miah suh," a rawn ti nghal thawr a, eng nge maw awmzia ni ? Chhan pawh ka chhan hma hohvin principal office kawngkhar chu a hawng zui a, kan inzui lut min lo hmu chu a chhunga awm te mit chu kan lamah a fu nghal ṭhap a. Office chhung ka luh a ka mi hmuh te mawlh chuan ka zâmna te kha an ti zual a ni. Kan principal bakah, Sir Zorema, Valrianga, Vela leh patling pui pahnih hi an lo awm a. Patling pakhat zawk chuan police uniform a ha zuar a, a sa in a zir bawk nen, a lang zahawm thlup mai.

"Hei, Muanpuii chu a nih hi," Sir Zorema chuan a rawn ti nghal thuai a, kei erawh kil khatah ka ding zum zât ringawt a. Ka zam lutuk vang nge ni, ka kut tin ka khawih neuh neuh ringawt a. Midang mit lah chu kei mah ah a fu ṭhup tawh mai si a, awm chu a nuam duh vaklo. "Muanpui, Remruata pa ka nia. Eng emaw zawh duh che ka nei a," pa pakhat zawkin a rawn tih chuan ka hlauthawng nghal ringawt pek a. Min zawh tum chu ka chian hle vang a ni.

"Hmanni ah ka fapa na tuar i lo buaipui ve niin ka hria a. Thu dik a ni em ?" Dawt ka sawi leh sawi loh hriat tum ni awm takah chiang hian min en a. Min en chîk leh lutuk chu zam awm duh tak a ni.

"Aw...,nia," midang en kual zak zak chungin ka chhang a, "Engtin chiah nge i hmuh ?" Remruata pa bawkin a rawn tih leh chuan ka inngaihtuah buai khawp mai. Ka sawi ang nge sawilo ang ? A thil tawn leh a ti tu nen lam chiang takin ka hmu a, thil thlen lai khan keipawh ka awm ve ngei bawk. Mahse, Ruatdika thusawi kha.....

"Ih....," ka han ti lawi rât a, ka sawi tum hi ka chiang nge chianglo pawh ka hre tawhlo. "Bawlhhlawh peih turin school hnung lamah ka kal a, chuan school building sir lam deuhah khan ka va hmu a. Chu zawng chu a ni mai," ka ti ta ngawt a. Ka thusawi chu kei, a sawi tu ngei pawh hian ka awihlo lutuk tlat. "Midang tumah i hmu tello maw ?" Remruata pa chuan a la rawn tizui a, ka zam tawh takzet.

"Aw, tumah midang ka hmu tello," bahlah miah lova ka sawi thei chu ka inchhuang ru takzet zawk. Chu thu ka sawi chhuak chu police uniform ha zawk kha a lo thaw deuh hawk a, a hmai a tuai deuh puat rual chuan a hmel chu chiang deuh hian ka lo en a, an deuh a nei ka ti... Mahse ka hre thei mai tawhlo tlat.

Ruatdika lam ka va hawi phei chuan a hmel chu a pangai reng a, engmah danglam ka hmuh hranloh vang chuan ka awm a nuam ve sawng sawng ringawt a. Mahse, eng vanga Dennis-a hming sawi langlo tura min ti nge a nih ang ? Chu ai mah chuan, khawiah nge Dennis-a hi a awm ?

Mahse le, thil pakhat hriat chhuah ka nei. Helaia, police form haa ding ve hi, Dennis, Dennis-a nen an inang lutuk tlat. A pa anih ngei ka ring. Ka pi khan kan khaw S.I fapa a ni tih chu a sawi tawh tak kha mawle.

"I fapa chuan Dennis-a tih ani tih a sawi chiang amaw ?" Dennis-a pa zawk chuan a rawn ti a, "Ti e, ka awm lai ngeiin a sawi alawm." Remruata pa zawk chuan a rawn ti veleh a, a lungawi vaklo niin ka hria. Ka hriatthiam pui lutuk tlat. "Amah ngawtin khatiang khan a awm theilo," Remruata pa bawk chuan a rawn ti leh a, a lungawilohna chu a hmelah a lang vek tawh a, ka inthiamlo ru takzet.

"Dennis-a chu ka lo zawt ve hrim hrim dawn nia. A lo ti ta reng anih chuan kei chuan phat emaw hum tumna ka neilo ang," Dennis-a pa chuan dam dup hian a rawn ti a, a aw a dam thlup nain a hmelah erawh, a rilru a hah ve hmel khawp hian ka hria. A fapa thil tih vangin zak ngawih ngawihin a awm awm si a, ngaihtuah chian chuan a khawngaih thlak ang reng zawk. Rilru în Dennis-a chu ka haw hlur a, a pa rilru na hmel tur leh a tih mualpho tur zia te hi a ngaihtuah ve lo emaw ni ? Nge ni a, a ngaihthah zawk ?

Reilo têah kei leh Ruatdika te pathum chu min chhuah tir zui a, class lam pana kan kal laiin ka hnunga Ruatdika te pathum kal chu enin ka lehhawi thut a, an ni pawh an ding ve nghal chawt a. "Biak lawk che ka duh," Ruatdika enin ka ti zui a, eng emaw zawhna zawh tur ka nei tlat. "Keimah hi maw ?" Vela zawkin a rawn ti a, "Ruatdika zawk," lu thing nar narin ka ti zui a, "Hmm, chan tâwk khua relah lung reng a awilo," a tih leh zet hnuah Valrianga nen class lam panin an inkuah phei zui a, Ruatdika erawh ka sirah a la ding ve reng thung.

"Ti nge ?" Ka ti teh ngawt a, tum loh lutuk a sawi ka ni. "Eng maw ?" A ni pawh chuan hrethiamlo deuh hian a lo ti a, "Ti nge ka sawi chu i phalloh ?" Ka ti zui leh zat a. "A pawi thui mai mai. Chu loah, i buai mai mai zawk ang," ngaihsam deuh hian a rawn ti zui a, ka hrethiamlo takzet. "Thu dik sawi chu a pawi viau em ni ? Eng nge ka buai chhan tur chu ?" Zawhna ka ngah lutuk hi ka zawt sênglo zawkin ka ring. Keimah zawk hi ka hah tet tet a, ka hmaa ding erawh, kei anglo takin a hahdam hmel hle thung.

"Ve hlir hler che hian. Lo buai ve chunglo la a ni mai. Mipa buaina," a ti daih lehnghal a, ka thin a rim ṭun tawh. "Ṭha te te in sawi ve mai la mawle aw. Anih loh chuan ka sawi chhuak vek zawk mai ang," tiin ka vo ve kha kha a. Chutah pawh, a la ngaih hoh hmel nasa mai. "I duh leh duhloh a ni mai alawm. Ka tawrh tur engmah a awmlo a, Dennis-a tawrh tur vek ania. I sawi leh sawiloh chu i thu alawm," a ti sam leh êt a, ka ngei ru reuh takzet. A hma zawngin, "Sawi suh," te min ti vel a, tunah, "I thu," a ti leh lawi si a. Hun remchâng a awm lai zawnga ka sawi phal tawp silo. Nichin khan ka lo sawi law law zawklo a ni.

"I van over tak," ka ti leh ringawt a, hei aia a huat tur ṭawngkam na deuh hi hria ila ka ti, mahse, "My brain is not braining" an tih ang khan ka awm rih tlat. Ka ngaihtuahna hi a chianglo a, ka rilru hian rilru a neilo ten ka hria.

"I sawi leh sawi loh chu i thu ania, mahse sawilo la ka la duh fan. He thilah kher kher hi chuan, Zothantluanga hi ka dem miahlo," a rawn ti leh lawi a. Hepa hian mumal a nei thlawtlo.

"Nih chuan engtin nge ka awm dawn ?" Ka ti ta ngawt a. Tunah chuan ani bak râwn tur ka neilo miau a tin ni. "Ti hian engmah hrelo angin awm rih rawh. Lalremruata hi mipa ṭawngthei uchuak tak ania. Chhan ṭha tak awmlo chuan Zothantluanga hian a khawih ngawt lo ang." A rawn ti a, Dennis-a chu a hre chiang viau em mawni ? "Sawi ta ila Dennis-a chuan min hua ang em ?" tiin ka zawt zui a. Mahse ka rinloh deuhin a lu a lo thing a, ka beisei loh lutuk thil a ni. "Haw lo ang, dawt sawi i ni hleinem," tiin min chhang a. Mak ka ti tulh tulh.

"Min tibuai zui lo ang maw ?" tiin ka zawt leh a, "Zui lo ang. Hmeichhe tihbuai te chu ho a tih zawng tak alawm," a ti leh a, a thutak em em mai lehnghal a, dawt sawi hmel reng a pu lo. "In in unau a mi a ?" Ka ti ta thlawt a. Hre chiang ang deuh deuhin a ṭawng khawl khawl bawk nen, an in hnaih viau aniang chu ka ti deuh. "Teuhlo," a lo ti hluk a, a hmelah chuan a duhloh zia a hmuh theih a, eng nge maw an awmzia ni ?

"Engmah min zawt tawh suh," a ti leh nghut a, min kal pelin an classroom lam a pan nghal nal nal bawk. A haw leh hle sia, nichina a ṭan ve em em a. Eng nge maw an awmzia ni ? Classroom chhung ka luh chuan zawhna mitmengin Aby te chuan min lo melh nghal a. Engmah sawi lovin chhuan lam dang ka siam a, an awih fahranlo tih hre ru reng mah ila ka ngaihthah zui ve hmak.

Hun chu a kal ngaiin a kal ve zel a. Nitina ka hun hman chu a ngai ngawr ngawr ti ila ka sawi sual lo ang. In leh school ka kar tawn chhen a, chawlhni ah Jaden rualin ka inkhawm veleh a. Chuti zawng chu a ni rih mai. Mahse, chawlhni hi a nuam bik riau ṭhin a, Jaden chu kawm a nuam in, a fel a, biak a nuam em em ṭhin bawk a. Ka zep lo, ka ngaina takzet a ni.

Ruatkimi nen hian ban lama innghah hi ka ti zen zen tawhlo a. Zirlai laklawh vanga, ban tlai zeuh hi kan nei leh ṭhin a, an ni erawh a hun takah an bang ṭhin thung a. Ani tan pawh min lo nghah ve reng kha a ninawm deuh ka ring a, a lo haw hmasak kha pawi ka ti tawh lemlo. A châng hian Jaden nen, school ban lama intawh fuh leh zeuh chang hi kan nei ṭhin a. A ruala haw turin min sawm ve ziah ṭhin vangin kan haw rual leh zeuh ṭhin a, zing lamah pawh a ruala kal chang ka ngah tawh mai. Midangin tu emaw tana hming an phuahsak ṭhin ang hian Jaden tana hming bik tur ka ngaihtuah kual nasa mai a. Zan khuaa ka inngaihtuah hnuah, 'Sukpuia' tih ka rilruah a lo lang a, a in hmeh dawn khawpin ka hria.

Tlai khat chu Jaden nen kan haw rual leh a, thlalak print ka duh thu ka sawi vangin printing-na dawrah min kalpui a, ka luh phat aṭangin Jaden zawk chuan dawr neitu chu a be nghal siam siam a, a tih zia khawp mai. "Pa Nghak, hei thlalak print tir kan duh a" tiin dawr nei tu chu a bia a. Pa Nghaka a tih chuan min buaipui nghal sawk sawk a. Patling, tarmit vuah, tê lam pang deuh hlek hi a ni a, te chhe lutuk erawh a ni lo thung.

Jaden chu thutna tur an siamah chuan a ṭhu a, keini min ngaihsak loin pawn lam chu a thlir dauh dauh a, mahse, kan lam a lo hawilo hrim hrim chu ka lawm zawk. Ka phone aṭang chuan thlalak chu ka thawn a. Ka thlalak thawn, dawr neitu in a han en chu min rawn melh deuh haw a. Ka kut zung chal ka hmui zawna dah in engmah sawi lo turin ka lo signal a, a hrethiam ve nghal mai anih ka ring, engmah min zawt zui bik ta lo.

Jaden a en leh zawk hnuah thlalak chu min print sak a. A print zawha min rawn pe chiah chu ka bag ah ka thun nghal sawk sawk a. Pawisa pein, lawmthu ka hrilh zui a, Jaden lam ka pan phei lai chuan a ni pawh a lo tho chhuak ve thuai a,kan inzui chhuak nghal vat bawk. "Eng thlalak nge a ?" A bike a tih nun rualin a rawn ti zui a, "Thil tê tê," ka ti chu min nuih ve ta ngawt a, chu bak chhanna pek tur hre heklo chuan.

May thla kan han chuang kai a, khua chu a lum ṭhin khawp mai a, khaw lum tuar theilo chi ka ni bawk nen, zan lam mut ka harsat ṭhin khawp mai. Thâwk khat lai aṭangin, zan lamah Jaden nen kan inbe ṭhin a. Hmai chhan ai ngawtin message kal tlang chuan sawi tur pawh kan pai tam ve deuh a, zan lam erawh ka meng rim ṭhin khawp mai.

Chawlhni tlai khat chu ṭhianhoa len ve kan rawt a. School lama ka kawm reng ṭhin, Aby, Afeli leh Sawmtei te nen lenchhuah ve kan tum a. Ka chhuah zen zen loh vangin ka pi pawh chuan a lo rem ti ve mai a, Ruatkimi hnenah rawng lo bawl tur leh in lo chhuahsan miahlo turin ka chah a. A lo chhuak bik em lo turah ka ngai.

Khaw chhung ka la hre chiang ve vaklo bawk nen, min hruaina lam lamah chuan ka zui ve zel a, chawlhni a nih vang nge ni, midang lêng pawh an tam ve khawp mai. Thlanmual lamah kalin thing hlim hnuaia ṭhutnaah chuan kan ṭhu a, thli chu nuam tawk tur vel hian a thaw heuh heuh reng a, ei tur kan ei pah reng bawk nen a nuam reuh phian mai.

"Tui kan lo lei tel lo ani," Sawmtein a rawn tih chuan midang pawn kan lo pawm tlang hle a, khua a lum reuh bawk nen, chhawl a hal duh reuh phian mai. "Nizan boruak chu," a mitko san euh euh hian Afelin a lo ti zeuh a. "Engmah sawi tur a awmlo, a hahthlak emai," thlang lam hawi pahin Sawmtei chuan a rawn ti veleh a. Nizanah chuan eng nge maw thleng dawn ni ? "Nizan chu eng maw ?" Bo deuh hian ka lo ti a, an thusawi ka man pha velo tlat a ni. "Engmah, a ho lutuk," en pawh min en chuang hleilo hian Sawmtei bawkin a rawn ti zui a, ka hre chak tulh tulh.

"A forever crush nen an inbia alawm," Aby'n a lo tih takah phei chuan ka hre chak lehzual. "Ehe...sawi ve nghal rawh," ka ti nghal seuh seuh a, Sawmtei erawh, a hmel aṭangin a sawi châk fahranlo tih a lang a, mahse kan zawt lui ta tho. "Tu nge ni hrim hrim a ?" Ka ti chu, "Aw, kha, engtin nge ka sawi ang le....," Afelin a ti leh rih a, "Kan school a mi," Aby'n a lo ti ve bawk a. Tu tak chu ni ang maw ?

"Ruatfela kha i hria em ? Kan class chu a inang, mahse section A a mi," Sawmtei chuan a rawn ti a, smiling face lo deuh kha emawni an sawi. "Tûm bur zel kha a ni em ? Joseph-a te ṭhianpa," ka lo ti zui ve zat chu anih thu in min lo chhang a, awi, berkher chuan. "Teh daih che chuan," ka ti ve ta hluai a, ani erawh a lo nui liam mai thung.

"Sawi vat la," Aby pawh chuan a lo ti ve leh a, kan hre chak tlang vek anih ka ring. "Ih maw," tiin Sawmtei chu a han nui leh rih a, ka lo hah tet tet tawh. "Ka duh thu vel kha ka hrilh a," tiin a ngawi leh rih a, a thusawi leh tur ngaichângin kan lo en ṭhap a, "E, a tia min block daih," a rawn ti chu kan ri nghal huk a, kan nui zui dar dar bawk.

~ End of Chapter  3 ~