M. Ch-6

 

Chapter-6

"Dawt sawi chu tum buai duh tawh suh. Engkim Abygail-in min hrilh vek tawh, awmzia a awm tawh chuanglo ang," ka ṭawng leh hma hauhvin Aby nuin a lo ti a. Dawt muhlum bak nilo chuan. Eng dawt tak nge maw kan Dawzer-i chuan a lo sawi leh tak ni ?

"Ni e Muanpui, i lo tisual anih pawhin sawi tawp mai rawh. Chuan, ngaihdam i dil chuan kan ngaidam vek ang che," Principal chuan a rawn ti leh a, eng ber nge maw ka han sawi ve dawn ni ? Engkim min lo sawi khalh zung zung mai bawk si a, ka tan han tih dan vak a vang kher mai.

"Ngaihdam a ? Teuhlo mai, keichuan ka ngaidam ve dawn derlo ania. Ani vang hian ka fanu in hliam a tuar a, eng pawh sawi ula ka ngaidam dawnlo hi a ni tawp mai." Min en kual zak zak chungin Aby nu chuan a tizui phiar phiar a, rapthlak hian a. Hei ngei hi anih hi Abygail-i chuan a lo chhun em em ni.

"A nilo," ka lo ti ve dek dek chu rum deuh hian min rawn melh zui a, eng nge maw a hriat a heti em ema min huat nghal ngawt le ? Engmah hre hmasa hawtlo chuan, thinrim sa in a rawn kal tih la hriat reng reng. Eng ang fanu nge maw a neih bik a, heti em ema a thlavang a hauh nat bik mai le ? A fanu a han dawttheih tehlul nen, a bum zaih zaih reng dawn anih hi.

Aby nuin chuti taka ruma min rawn melh takah chuan ka ngawi zui leh daih a. Min khawih duh mai tur hmel pu miau hek. Principal chuan a lo hrethiam nge ni, "Sawi rawh," ka lam hawiin a rawn ti a, ka chil ka lem zui khawlh mai.

"Nimin kha chuan kan inhmu ngei a, nam pawh ka nam, mahse ama thiamloh hmasak anih kha," ka ti dek dek chuh, "Dawt sawi suh!," Aby nuin min lo ti nghal nghek a, ka chhing sawk lo chauh ani.

"Ka pi, lo ngawi rih rawh," Principal chuan a rawn tizui ta fak a, Aby nu hmelah erawh danglam eih a la awm chuanglo. Huai piap piap tak a ni. Nutlingpui siin a fanu rual min khingin a thinrim hle chu a ni sia, em em chuan a.

"Nimin khan inchungah min kalh khum a, chhukthlak ka tum laiin min man bet tlat a, chuan ka nam anih kha," ka ti veleh a, Abygail-i nu chuan min melh rum tawh nasa mai.

"Nem pawh ka nem na lo, chhuatah khan a tlu ringawt, thawh pawh a tho leh thei nghal alawm. Chuan ka tlanchhiat san a," ka ti leh a, sister leh principal an ngawih reng laiin Aby nu bawk chuan dawt ka sawi thuin min chhuahchal leh a. A hnenah hian eng pawh sawi ila awmzia a awm dawn chuanglo tih chiang takin ka hre tawh.

Heti ang mihring hi alawm ka huat em em chu. Ṭan lam nei rân chungin insawifiahna an phût ang lawi a, midang tana hreawm tih theih tur khawp thu an chhakchhuak a. A tir aṭanga engmah hre hawtloin rilru an siam fel a, laina hnai annih vanga ṭan pe na ve em em ringawt te hian an ṭan anih pawhin ngawi rengin an ṭan ve mai thei lo em ni ? Ti nge hre ber leh a thlen laia awm ve ni awm ang mai hian an lo ṭawng ve ziah ṭhin ? An inthiamlo ve ṭhin ang em ? Nge, an lawm em em zawk ang ?

"Awle, a tawk e. Ka pi, thu chiang a awmlo a, i fanu thusawi ringawt chu rin ngawt theih a ni biklo." Principal chu a rawn ding deuh hluai a, ka lo phu chiam mai leh nghal.

"Henu thusawi hi dawt tih hriat reng reng. Engah nge Aby chuan a kalh khum ngawt ang a ?" Pakhat lah chuan a lo la ti ve ṭang ṭang a, a ṭawng ring nasa mai lehnghal a, midang hriat te pawh a hlau lo zawk emaw ni ?

"I kal thei tawh ang," ka lam hawiin principal chuan a rawn ti a, chutianga a rawn ti chu lawm tak ka ni lawm tak. Kawngka lam ka pan laite chuan ka nui ru ver ver hialin ania ka hriat.

"I kal tir ringawt theilo ang, rorelna dik kan duh, kan ngawi mai mai dawn lo ania," Aby nu chuan a rawn la ti zui phiar phiar a, principal in a chhanna erawh ka hre zui tawhlo. Engtin tak indawr zui zel ang maw ? A rapthlak nasa mai si.

Classroom ka lut lah chu min han en duh khawp a, tlar hma lama Dawzer pahnih te lah chuan ngeiawm fe hian min lo melh tur khai a, hemi te pahnih pawh hian an hre ve vekin ania ka rin. An sawipui zawk hial ang chu mawle.

A hma ang bawkin ka ṭhutna ngaiah ngawi reng hian ka ṭhu a, engmah thlenglo ang hmiahin zirtirtu in zirlai a sawifiah mawlh mawlh chu ka ngaithla ve ran a, mahse rilru erawh a nuam duh fahranlo. Rilru kil khatah Abygail-i te nufa an awm ve reng a, engtin nge min tih zui zel ang tih ngawt chuan ka rilru a luah a, tunah min kal tir mai rih mahse ngawih an chuh maiin ka ring biklo a. Awm tinuamlo tur tingin ka hnung ami te lah chu an phun leh ser ser ṭhin a, "A chawh dawn alawm," a tih te chu ka hre thawi leh vuai vuai ṭhin a, awm chu a nuam duh fahranlo.

"Kan pawi i sawi vanga buaina i tawh nasat tawh zia hi," hnung lam aṭanga ka beng bul sêta rawn ti tu chu Sawmtei zawk a ni. A ve ngawt chuan a. Engtin mah ka ti tawp silo a, an thikthu vang mai maia min tibuai an ni reng sia....

Khawvel hi zawng a mak a ni. Min ngaina ang taka lang te leh ṭawngkam ṭha tak taka min be ṭhin tu te pawh hian hnung lam aṭangin min lo bei duh reng a. Kei chuan, ka ṭhianṭhaah ngaiin ka thinlung zawng zawng nen ka duhsak a. Ka hmuhloh lama ka lam ṭanga ka beisei ve ber erawh, buaina tam tak ka tawh chhan bulpui ber a lo ni reng si. Tunah chuan hnam changkâng zawk te'n, "Lehkhabu a kâwm aṭangin teh suh," an lo tih ṭhin kha, chiang takin ka hre ve ta.

In ka thleng chu ka inthlak hma hauhvin khumah ka let thla nghal tawp a. Vawiin ka thil tawn tehreng chu chauhthlak tak a ni. Tho chhuakin lukham hnuaia ka phone ka dah chu ka la chhuak zui tharh a, ka hmeh en rualin whatsapp-ah ka lut zui a, message pakhat chiah a lo awm chu niin. Chu pawh chhungkaw group-a ka pa in zin an tum thu a sawina chiah a ni a, luck lo ve tak chu ka ni.

Chutia ka mu zal mai mai chu ka lo muthlu zui daih nge ni, ka phone ri ral ralin min tiharh a, ka luhlul chhuah lui ve ngar ngarin ka inleh san tharh a, a tawp mai lo lehnghal. Rei fe hnuah a tawp ve ta chauh a, mahse hneawm lutuk tak maiin a rawn ri zui leh a, hetiang em em hian ka phone hi ka la hne ngailo reng reng.

Peihlo deuh chung hian ka tho chhuak zui ṭuah ṭuah a, ka mit lah chu ka meng chianglo nge ni, a phe deuh ruau a, mahse ka han nuai deuh nawk nawk hnuah erawh a zia veleh ta mai thung.

Phone call lah chu ka la dawn vel chiah tihah a tawp leh daih ang lawi a, a huat hian ka haw hlur tawh. Ka lockscreen chu ka hawng zui a, min lo call tu lah chu number save loh aṭangin a ni a, message lah a lo hnutchhiah der tawh lehnghal a, tu nge maw ni reng reng le ?

A dp-ah engmah a hmanglo a, a about-ah lah chuan, "Ka ba mai ang," tih ringawt hi a dah a, tu nge maw ni dawn ni ? A va han local riap riap ngai ve leh.

A dp leh a about ka en tawn chhen lai chuan ka seen tih a hmu nge ni, message dang a rawn thlen belh zung zung a, message thleng thar ho ka en chuan tu nge anih ka hre ve thei chiah.

"Zâwri, Lalzâwrpui, Thil hrilh tur che ka nei ania important heavy tawk," tih ang reng ani hlawm a, kan Lawmhnapa chuan khawi aṭangin nge maw ka number hi a neih reng reng ni ?

"Eng nge Sâmdal ?" Ka reply dan chuan a nuih a tiza viau nge ni, nui lai lem emoji a rawn thawn tuar a, he mihring han uchuak bik em em zia hi.

"Vak vak che chuan, eng nge i sawi tur chu ? Sawi vat vat ta che," ka ti leh a, phone chu khumah dahin ka inthlak zui ta daih bawk.

"Enteh, AuZâwrte, niminah khan Valrianga te ho nen kan insual a, kan class teacher in in chhungte number ṭheuh naktukah lo keng rawh u a tia, i number ka pe ta mai," chu thu ka chhiar zo chu a ngaihna ka hrelo zawk. Ka bulah awm ngat se zawng, Lallawmzuala chu thle lawl khawpin a tukhumah ka beng ang mawle.

"I uang em ni ? Nge, i ti tak tak ?" Ka tizui mawlh mawlh a, ka lungawilo ru hle tawh bawk. A awmin a ang lo lulai ve bawk em a ni.

"Uang mai mai lo, i lo awm remchang em a, bakah nang chu i fel a," te chu a la rawn ti leh nghal a, emoji inthlahrun hmel deuh a la rawn thawn tel zui a, a va han ti awm anglo tak!

"I mawl em ni ? A chi hian a chi loh reng reng. Âwm leh mawi te hi hriat ve tur," ka ti veleh a, a la rawn nui liam mai mai thung a, engah nge maw ka number kher kher chu a lo dah reng reng ni ? A ṭhiante number tal dah mai tur ania, min tihbuai hi a chak ve hrim hrimin ka hre tawh.

"Midang number dah mai ta che mawle, engah nge kheia number kher chu i dah a ?" Ka ti zui leh hram a, "Hmmm..," tih ringawt a rawn thawn chuan ka lungawi fahranlo viau ani. Ka va han vanduai thuahhnih chiava em!

"I fel kha, nakinah ka la rul leh dawn che nia," a rawn ti leh zung zung a, "E chuan," a duh tawk mai dawn emaw tih laiin a rawn ti leh rih a, ka la reply lo, a type leh mek a. "Chhungte hruai tur' an tih thut chuan i pi kha aw," a rawn ti nih chu. He mihring thisen han san pap pap bik zia hi.

"Kal mai teh!" Tih ringawt hi ka thawn let a, min chhang lawk lo. Rei fe ka nghah hnuin 'Seen tawp aiah' tih sticker hi a rawn thawn a, ka va han ngei mai mai tak! A zawk zamah hian a. Rawn tih tak tak te hi a tum reu reu ang tih a hlauhawm zawk.

Zan lamah chuan ruah sur tumin a inṭham nasa mai a, kawl a phe zuk zuk reng a, a sur hnem viau kan rin laiin a hmi seng seng ringawt chauh a, reiloah a reh leh nghal mai zel a. Mahse, zan rei lamah erawh a sur duh ta khawp mai a, ṭek leh thli nen a bei chiam mai a, current rawn thim zui nghal bawk nen tih tur a vang duh ang reng viau mai.

A tuk zing lamah pawh chuan ruah chu a han sur duh khawp a, a bang ve zawk ṭhin nain rei erawh a ni ngailo.

School kal dawn-ah lah chuan a sur nasa zual sawt emaw tih mai tur a ni. A ban deuh hun kan han nghak zet a, mahse, a zia hleithei meuhlo. Nihliap nen, huh hluam chungin school kan thleng a, ka bag hma lam phei chu a huh zawr vek lo chauh a ni.

Kawl a phe zuai zuai reng a, a khat tawkin ṭek a ri tel leh bur bur ṭhin a, nizana current awmlo kha a la awmlo tlang zel a, mahse, class lak chu nuam duh tak a ni. Teacher lo lut apiang hnenah, "Ramhuai thawnthu sawi rawh," mipa hovin an lo ti thei zel a, anni pawn hetiang khaw hnuaia class han lak urh sun lutuk chu an chak bik vaklo aniang, ti ti dang an vawrh chho zel a, eng eng emaw sawi hian an ti ti reng a, keini lam erawh dawhkanah kan bawk ṭhap a, tukverh kan khar phui vek nangin ṭek tla ri chu a ring ngang mai.

Chawhnu lam deuhah erawh khaw awm dan chu a zia ta khawp a, ruah erawh a la sur awl lova. Mahse, thli na lutuk leh ṭek vel erawh a awm tawhlo thung.

Last period-ah house inhmuh khawm a awm a, Lily te nen kan house a inan vangin ka zui ve leh thawr a, tunlai chu Hlimhlimi nen kan inkawm deuh chawt tak nain a ni chu Yellow house a ni a, keini Red kan ni thung a, duh viau mah ila a kal dun theih tlatloh. Lily biak mai chu ka hrehlo nain a bula Hlutei awm ve mawlh chuan min ti tîm a ni. A hma ang khan ka la hlau reng miau a.

Sawi hmaih theih miahloh chu vawiin pawh Abygail-i a absent leh a, a na der rei peih ngawt mai. Inla khawngaihthlak deuhin an inah a awm no kual vel chu a ni awm sia, tenawm reuh ngawt mai. Mahse, chu lam chuan ka rilru a luah ber lo, Jaden te nen house khatah kan awm ho a, rinloh deuh deuh hian kan awm dun leh nawlh nawlh zel a, khuanu ruat kan ni mai lo'ng maw tih rilru te ka pu ve ringawt a, keimahin ka hlim ve veng veng ringawt.

"Eng ngati nge khatia i khik vur vur a ?" Min rawn thlek meuh hian ka bula ṭhu Lily chuan a rawn ti a, ka hmelah ka lo ti lang viau nge maw ni dawn ni ? Ka zak ru chem chem mai. Ka chhuanlamah ka nuih tawi tak ringawt a, "Mi hlim ve te," Hlutein a rawn tihzui leh ngat phei chuan zak tih piahlam ka ni. Ka ngaihtuahna ho lam lutuk vang vek.

Kar leh lama singing competition tur lam an sawi a, solo-ah section A ami hmel fel fai ving veng deuh mai hi an thlang a, duet tur te erawh ka rinloh lutuk anni. Lily leh Jaden, an zai ṭhin tih pawh ka hre miahlo. Rin ngaihna ka hrelo zawk.

Banah Ruatkimin a ṭhiante rualin min haw san a, mahse, a tihzia hlauh zawk ka ti dawn nge ni, Jaden nen kan haw rual a, ruah sur nasat deuh vangin a ni pawn a bike a kenglo a, nihliap khumin kan haw dun a, ruah sur hnuaiah pawh ani chu a lang ṭha leh pek viau mai. Kei ve lah hi! Ka hmelchhe hlemhluam tawh ngawtin a nia ka rin.

"I zaithiam tih ka hre miahlo," ka rilru luah ber tu chu ka sawi ta nge nge a, ani lah chu a nui suk duh ringawt chauh a, "Zai te chu zai ve ṭhin e, zeuh zeuh a ni mai, a na zawng chuan ka zai biklo," hnuai lam en chungin a ti a, "Hmm.., anih chuan nakinah min zai sak ve ang che," ka ti ve ringawt a, ka sawi zo chu ka zak leh hnuhnawh. Eng rilru pu a sawi ve ngawt nge maw ka nih ni ?

A ni erawh a nui liam leh mai a, "Nia, kan la zai dawn nia," tiin a rawn hawi chhuak ve ta chiah a, a ngaitêin nui hmel bawk a pu leh tawh a. Mahse, a reilo, ka bag ah laiah chuan min pawt thut a, chumi rualin a sir lamah chuan min pawt phei zui a, a chet dan vanga ka hamhaihna pawh chu a rei chuanglo. Tui a rawn per zui chhawk a, kan huh vaklo na chu tui per a tam khawp mai. Car lah chu chak fe hian kawng kawiah a tlan liam zui a, a va han khalh chak em em ve mawle! A hmanhmawh viau ani ang e.

"Kha chuh! A va tlan chak em em ve mawle," Jaden pawh chuan a rawn ti ve ta reng a, chutih rualin ka bag-a a vawnna mawlh chu ka lo en a, rei loah a thlah zui ve mai thung.

"Helamah hian i kal tawh dawn nia," tiin motor kawng hnaihlo lamah chuan min kal tir a, a che gentleman vel lutuk mawlh chu! Keimahin ka lai leh ringawt tawh.

"Saw le! Pakhat tal kha chu va phei rawh u." Ka hnung lam chu ka hawi nghal thuai a, Lawmhnapa te ṭhianho bawk chu. A nihliap senno nen bawk khan an pali liin an rawn inzawn leh a, an inlak pa ve nen, engah nge maw saw tiang nihliap senno par chhuaih saw a lek a lek mai le...

Kan bul an lo thlen rualin Patlawia'n Jaden lam a rawn pan zui tharh a, a nihliap khum lai chu a rawn ṭawm ve zui a. "Hey, Laltlansang, i phakar lutuk!" Ruatfelan a lo ti deuh hluk a, hmel pêk thutak kawngah hi chuan tuman he mihring hi an tluklo ang mawle. Men rum kawngah erawh Dennis-a hian tluktu a neilo leh bawk anga, lerh thak hotupa Pathlawia an kawl bawk a. An ṭhianho hi chu an chikim ve ngawt mai. Mahni tawka nui vur vur lah banglo. Mize inanglo pui pui si hi engtin nge maw an inkawmngeih em em theih zawk ni ?

"Saw nang, i seat tur," tiin Joseph-a chuan ka lam a rawn hawi zeuh a, ka ngaihbel nge ni, Ruatfela hmel chu a tum leh zual sawtin ka hria. Rin ang ngei ngeiin ka bula lo kal chu a hreh ngang mai a, Lawmhnapa nihliap keng banah chuan a kuah deuh ṭung a, a bul ami lah chuan a tur deuh sek reng a, "A chep, va phei rawh, tikhan pahnih ṭheuhin," a ti ve tlat a, Dennis-a lah chu engmah hrelo ang mai hian an sir lamah a lo ngawi run ringawt a. An va in daih zai hlawm tak.

"Lallungngai, kan huh zawr vek i duh a mi ? I ṭhiante hi min va hmangaih lo ve," Lawmhnapa lah chuan a ti chho ṭan a, nihliap te chu lak sawn a tum ti tih tawh a, an inkarah a ding bawk nen, an phi buai khawp mai. "Dennis-a zawk kha phei mai rawh se," Ruatfela lah chuan ti ve tlat a, a chang leh, "Ka ngai che alawm," a hmel nena inrem lo deuh hian a ti leh ṭhin a, Lallawmzuala lah chu a man bet deuh tlat a, pakhat lah chu a lo tal ve nasa mai a, ka nuih an ti za lek lek tawh.

A tawpah chuan a beidawng ta nge ni, "Ka do mai ang," tiin Ruatfela chu a kal zui thurh a, mahse, Dennis-an a lo pawt let leh rang khawp mai. Ka bulakal ringawt pawh chu a va hreh awm em em ve mawle. Ka tan tak pawh a nuamlo zawk rum rum alawm.

Ruatfela leh Lawmhnapa chuan nihliap inzawn ta zawkin Dennis-a chu ka lamah a lo phei thurh a, "Ka la len chuan ka lo inhnawh ve lawk," a ni leh ni lo ang hian a rawn ti ve ngei a, mahse, chu bak chu engmah a sawi zui leh tawhlo a, a kâ a chîp leh hmiah tawh.

A ruala kal ṭhup ṭhup na chi a nih loh vangin Jaden-a te an kal hmasa a, kan hma chiahah Lawmhnapa leh Ruatfela an kal thung a, keini pahnih erawh a hnung berah insik hlau ni awm fahran hian kan kal a, biak pawh kan inbe eihlo.

Mahse, rei vakloah ka bul ami taksa chu a rawn khur ti tih a, a huh hman viau nge ni, amah ka en lah chuan a en ngai en reng chung hian pangai deuhin a kal a, mahse, rei a riallo, a taksa chu vawt a tih vang nge ni, a khur leh dar dar a, chutah zet zawng a ding ta chawt a, ka hlauthawng leh nghal ringawt tawh.

"Dennis," tiin a lamah ka inher a, ka ngaihbel nge ni, a thawk dan chu a rang deuh riau hian ka hria a, ka ngaih a ṭhalo tulh tulh mai bawk. "Eng ngati nge a ?" Tiin ka zawt zui leh a, chu pawh min la chhang ta chuanglo.

"Hey......," ka ti lawi leh rât a, "Engtin nge i awm a ?" Ka ti leh chiah tihah, a ṭhingṭhi thla nghal rawk a, a beng a hup zui daih bawk. "Hey, Laldennis, Zothantluang," hlauthawng lutukin ka ti zui a, eng emaw tak chu a chungah a thleng niin ka hria.

Hlauthawng deuhin a beng a hupna a kut chu ka vawn hnan ta ringawt a, engtia tih zui zel tur nge pawh ka hre tawhlo. Chutah, a kut ka vawn lai mek chu la sawnin ka kut zawk chu a hum bo zui daih a, chu veleh, "Min kalsan suh," a rawn ti teh ngawt a, eng nge maw a awmzia hi ni dawn ni ?

"Khawi maw, engtin nge a awm a ? Zo-a, i harh em ?" Kan bula rawn ṭhutthlak pahin Lawmhnapan a rawn ti zui sawk sawk a, ani pawh a hlauhthawn hmel viau mai. "Engtin nge a awm a ? A lu a hai em ni ?" Kan bul an lo thlen phei ve rualin Jaden-an a rawn ti zui a, Dennis-a lah chuan ka kut a la chelh tlat lehnghal a, Jaden-a a awm ve reng lehnghal a, ka bialpa chu nilo mahse a nuamlo ka ti.

"Hey, Zothantluang," tiin Lawmhnapa chuan Dennis-a bek tawn tawnah a vuan a, amah en thei turin a kûnngur chu a kuai dâk deuh a, "I ngaihtuahna mai a nih kha, harh chhuak rawh," tiin chiang fek fawk hian Dennis-a chu a en a, mak ka ti tawh khawp mai.

Dennis-a lah chu a sawi hria ang pawn a awm lo a, mahse, ka rinloh lutukin ka lam a rawn hawi ta zawk a, min han thlek deuh vang vang a, chutah, "I ni miahlo," tih leh ka kut chu thlah a rual a, he pa hian eng nge maw a hriat ni ? A chang leh min hria ni awm takina awm a,a chang leh min hlauh hmel deuhin a khawsa leh thung a. Eng nge maw awmzia ni ta neih nuaih ni ?

"Kha kha ania, lo kal suh ka ti ve mawlh mawlh che asin le," tiin Lawmhnapa chuan a buaipui zui a, ka rilru chu zawhna hlir hian a khat. "Engtin nge kan tih zel dawn ?" Pathlawian a tih rualin a ṭhu thla ve zui a, an ṭhianpa an bawihsawm mawlh mawlh laiin keini pahnih erawhin a ngaihna hrelo deuh hian a sir aṭangin kan lo thlir mawl tawp ringawt a, tihngaihna a vang ve bawk em a ni.

"In duh leh min lo va haw san mai rawh u," rei fe hnuah Lawmhnapan a rawn ti a, an buai viau na chu keini'n engmah tih theih kan nei chuang hlei lova, kan lo awm hnawk ve reng chu an tan pawh ninawm kan chang zawk ka rin vangin ka lo hnial lemlo a, Jaden pawh chu ka tih dan danin a awm ve ta ngawt a, kan haw san ta ringawt bawk.

"Au Zâwrte, i nihliap kha kan lo hawh lawk ang chu...," Pathlawian a rawn tih chuan ka hawi let leh rih a, tîm daia Jaden ka en chuan, "Kan inzawn mai dawn nia," tiin min lo chhang a, ka nihliap khum lai chu Pathlawia ka pe zui a, in lam kan pan zui veleh mai bawk.

"Ti nge khatia a awm thut le ? A damlo aniang a," in lam pana ngawi renga kan kal laiin ka ti a, han ngawih reng kha chu a nuam duhlo êm lahtaka. Ka bul ami lah hian sawi tur a hriatloh hmel nasa mai si a, kei tal ka ṭawng hmasak loh chuan tih thuah ka zawt ve ta tawp mai.

"Ka hre bik lo, a awm dan aṭang kha chuan a ang ka ti keipawh," a lo ti ve leh a, thu dangah pakai zuiin in chu kan thleng ve leh mai bawk.

Kan inkawt kan thlen chuan Jaden chu mangṭha in inchhung lam ka pan zui a, kan kawta car var pakhat lo ding ka hmuh chuan inleng kan nei anih ka ring a, mahse kan in ka luh chuan ka tum loh deuh mai ka va hmu a, ka pi nen ka hmuh dun rualin ka lawmlo chawpchilh zui mai bawk.

Aby nu maw ? Eng nge helai thleng thleng a rawn tih ? Duh aiin a kal thui mah mah tawh chu a ni.

"Saw, a lo thleng alawm, keipawh kan haw tawh ang e, in lo sawi dun dawn nia," tiin a tho zui a, ka pi lah chuan hamhaih deuh hian a lo en a, engmah kan sawi ve hma hauhvin, "Ti rawh le Bawiha," tiin ṭhuthleng seia tlangval pakhat ṭhu ve pakhat nen chuan an inzui chhuak zui a, an kal liam chu rum deuh hian ka en zui a, hetiaang em em an thlen duh pawh hi ka lo ringlo asin mawle.

"Muani, eng nge an sawi kha ?" Ka piin a rawn ti dek dek chu, "Pi, dawt vek anih kha, dawt bak sawi tur an hrelo," ka ti zui hlawk hlawk a, ka bag chu chhuatah ka nghat thla zui chawrh bawk.

"Eng nge an sawi kha awmzia ni reng reng a ? I sawisa te kha an tia," ka piin a rawn tih leh chuan an thusawi tur awm ang chu ka ngaihtuah thiam ruak a, ka thinrim lutuk hi ṭawng pawh ka ṭawng peihlo hial zawk.

"A fanu nen chuan in inpawl rual em ni a ?" Ṭhuthleng seia ka ṭhut thlak dawt rualin ka pi bawk chuan a rawn ti leh a, ti nge maw phurrit dang min pek belh hi hemi te nufa hian an chak em em mai le ? School buaina chu school-ah a tawp mai turah ka ngai a, chutiang bawkin ṭhian inkara buaina pawh kan pahnih karah a tawp mai dawn emaw ka lo ti a, ka lo rin loh dan pui puiin min ṭhawng reng mai dawn anih hi.

"Pawl rual e, kan inkawm ṭhin alawm," tiin ka pha zui duh ta biklo a, an duh duh dana an rawn khawsa tawh anih chuan thu dik sawi law law mai pawh chu ka pawi sa tawhlo.

"In intibuai em ni ?" Tiin ka pi bawkin min zawt leh a, "Intibuai chiah pawh anilo, inchungah min kalh hnan a, chuan min man bet tlat bawk a, ka nem thlu anih kha," tiin thu khuh deuh chung siin ka sawi a, tunah rih chuan a rilru tihbuai ka duh rihlo, ka rilru tihnat ngat phei chu ka duhlo hul hual.

Thu dang a sawi leh hma in inchung lamah ka chhohsan a, fai ser sawra ka inbual chuan nichina ka ngaihtuahna zawng zawngte kha tuiin a tleng fai ta vek emaw tih mai tur ani. Ka zâng deuh hawk a, nichin ai ngawt chuan ka awm dan pawh a nuam ta deuh.

Inhnuai ka chhuk leh chuan ka piin rawng a lo bawl a, choka ka luh phat aṭangin ei tur dapin fridge ka hawng zui a, "Dawhkana kha chhuna ka chhangban kan a la awm," ka piin a tih tak vangin dawhkana chhangban lo inkhuh chu ka hawng zui a, kan thar sa ṭha ver vawr ani tawhlo nain a tui ngang mai. Chhangban kanah kher kher hi chuan ka pi hi tluktu an awmin ka ringlo.

"Vawiin chuan eng nge an rawn sawi a ?" A dâl kan lai a chawh mawlh mawlh laiin ka lo ti a, chhangban chu ka ṭhial zui tuam tuam bawk. "An inti thiamlo a, a lo nem thlu a, a ban ruh a tina a,' a tia. 'Ngaihdam min lo dilloh chuan kan ngawi mai mai lo ang' te kha a rawn tia," ka piin a tih chuan ka lungawilo chawpchilh lehnghal a, "Ngaihdam min dil pawn ka ngaidam theilo," te kha min ti vel sia, a rilru pawh chu a va han thlak hma em em ve mawle kan Dawzer-i chûnnu pawh chuan.

"Engtin pawn min ti dawn mahse ngaihdam chu ka dil lul lo ang, ka thiamloh ni miahlo ah ngaihdam dil chhan tur ka neilo. Nangmah te khan i lo dil reu reu ang e, tlawm duh bik miah suh ang che." Ka ti ve ta hlak hlak a, ka ngaihdan dik tak ani bawk.

"Dawtin a puh che tihna em ni ?" A ti zo chiah tihah, "Ni chiang e, Aby chu a dawheh lutuk!" Ka ti ta khawl a, thu dik sawi ka nih miau vangin ka confi ve hle ringawt.

Mahse, ka pi min chhan dan erawh ka rin loh lutuk ani. "Beih lêt tum aia ngawih chuh zawk a, tlawm hrehlo mite aia hneh har he khawvelah hian an awmlo ania. Tlawm zawkah ṭan a ṭul anih chuan tlawm hreh loh tur," min ti let hlauh a, kan thlir dan chu a inanglo hle mai maww...

"Mahse," ka'n ti leh ringawt a, ka sawi zawm hma erawhin ka inngaihtuah uluk ngang mai. "Ngaihdam dil hi hreh miahloh tur ania," a rawn ti zawm leh zat a, ka la lungawi thei chuanglo.

"Hmm..., chu pawh nise, hetiang dawt thuah kher kher hi chuan ka dillo ang," ka ti leh hram a, tlawm zawka ṭan ngawt pawh chu a dik berin ka hre chuanglo. An inlulin phah mai mai zawk dawn ten ka hria.

"Ka sawi fo ṭhin kha, ngaihdam diltu chu mi fing a ni a, ngaidamtu erawh mi ropui a ni. I thiamloh ni miahloha ngaihdam i dil a, i pawi an sawi na zawng zawng i ngaihdam chuan anni aia hnuaia i awm chhan tur a awmlo." Tiin min hrilh ta zawk a, lehlam zawng tak chuan a dik fu in ka hria.

Mahse, thil pakhat hriatchian deuh mai ka nei a, ngaihdam chu a harlo ani mai thei, mahse theihnghilh erawh chu thil harsa tak a ni tih hi.

Zan lamah chuan ruah sur chu a hân ve ta chauh a, mahse thli erawh a na ngang mai a, kawngpui phei chu hawn ngam pawh ani lo.

Hmun ka tihfel zawh hnuah inchung lamah ka chho a, ka zirlai lam ka en ve zel zul nain ka rilruah erawh a lut teh chiamlo a, zir pawh ka zir rei vaklo. Vawiin nilengin ruah a sur buan buan tih hriat lêk loh hian khua lah chu a lum ang phian a, kan inkhar phui lutuk vang zawk emaw ni dawn ni ?

Kua leh a chanve bawr velah ka khumah ka mu zal a, en tur em em pawh hre hranlo in ka phone chu ka khawih kual a, Jaden online leh online loh ka en chuan a last seen chu tlai dar 5 vel daih kha a lo ni tawh a, zanin chu mut mai bak tih tur a vang dawn khawp mai.

Ka phone ena ka in leh tawn sek laiin ṭhenawm aṭangin music an rawn play ri riai riai a, ka lo bengkhawn rang kher asin. The Beatles hla 'Hey Jude!" Tih hla kha an zai tir a, ka awm dan nen inrem viau lo mahse ngaihthlak a hahdam phian a, zan khawhar tak tur pawh a ti ziaawm viau chuan ka hria.

School kan kal leh hmasak ber chuan principal office-ah bawk min ko leh a, tun ṭum chu Abygail-i pawh a lo awm ve tawh a, office chhung ka luh tirh phat aṭangin an nufain min lo melh kar a, kan Dawzer-i lah chuan a lu a tuam lûk lehnghal a, nat der lah chu a han thiam em em khawp a, a nin te pawh a ning ve em em tawhlo emaw ni ka ti deuh.

Zam maplo hian dawt lah chu a sawi ang zuah zuah a, anu lah chuan a pawng ṭan ve em em ringawt a, hemi te nufa zet hi zawng tlukloh rim an nam ani.

Aby thusawi tak vang chuan Sawmtei leh Afeli an ko lut ve zui a, kan Dawzer pahnih te lah chuan ka sawisak thu sawiin dawt bawkin an rawn pawt zuah zuah a, an sawi zo chiah chu ka nui chhuak hawk lo chauh a ni. Em em chuan a! Thawnthu te ziak zawk se an thiam ngawt ang chu.

An duh ang ang an rawn sawi hnuah Dawzer pahnih chu an chhuak a, thu hretu der an neih vang chu nge ni, kan Dawzer 1-i te nufa lah chu an han inchhuan hmel khawp a, dawt sawi turin an fuih khawm vel chu a ni awm sia....hah, thutak lak pawn ka la tehchiam tawhlo, ka nuih a za zawk.

"Ti khan, ka fanu thusawi ngawt chu ani tawh biklo. Thu hretu pahnih lai an awm a, keini lam chuan dikna kan duh," Aby nu chuan a rawn ti leh charh charh a, ka hlauh a ring reng reng emaw ni ? Inla puitling deuh te chuan a ṭawng leh ta nghal a, a ze puitlin loh zia erawh ka hai bik der silo.

"Kha mi te khan alawm min kalh khum, anni pawh kha an tel ve," an ṭawng leh hma hauhvin ka lo tih khalh a, min rawn en rual ṭhawt mai. "Anni leh zel pawh i puh dawn a maw ?" Min ringlo tih hriat zet hian Aby nuin a rawn ti a, a ṭawng chak dan em em hi, tumah hmaizah hran a neilo tih a hriat.

"Tel e, an pathumin alawm. Chuan Abygail-i hian min man bet a, step bulah kha mi te pahnih pawh kha an awm ve," ka ti leh zat zat a, "Dawt sawi suh!" Kan Dawzer-i lah chuan mi'n rawn ti zawk zamah a, ka lo duai duh biklo nasa. Kan inchhang pawr kual ti ila ka sawi sual lovang.

Principal office-ah chuan kan inhnial ti tih hi a ni ta ber a, kan principal pawh ka hmaizah thei ta meuhlo chu a ni.

Kan principal ber chu a lungawi tak vaklo aniang, kan za vai chuan min khap ta ṭhap a, tumah kan ṭawng zui ngam tawhlo reng reng.

"Duh aiin kan buai rei ta mah mah e," a ti hluk hluk a, chutah, ka lam rawn hawiin, "Muanpui, i tih dan chiah chu sawi rawh. Dawt i sawi anih chuan hnawh chhuah nghal i ni ang," a rawn ti ta khur khur a, chutah zet zawng ka zam ve ta rum rum mai.

"Engtin mah ka tilo tak tak alawm, vawikhat kha chu ka nam ngei a, mahse a na lo," ka ti veleh a, a thin ka tirim zual ang tih mawlh chu ka hlau a ni. "Dawt i sawilo chiah amaw ?" Tiin min zawt leh a, dawt ka sawi loh miau vangin ka inring tawk ve em em ringawt.

"A awihawm em em tawhloh, thu hretu kan nei a, ani thusawi ve mai mai ngawt kha chu a rintlak loh," Aby nu in a rawn ti leh tawn tawn a, ti nge maw heti em ema min huat mai le ? Ka pi bulah lah khan, "Ngaihdam min dil sela," tih zawngin a lo ṭawng a, tunah hremna min pek ngei tum ni awm takin a ṭawng leh ang lawi a, an daw thei nufa ngawt mai.

Ka naupan lai aṭang tawhin zirlai fel famkim chu ka ni ngai biklo na a, mahse thu buai rem ngai khawp khawpa pawi chu engmah ka la khawih chhin ngailo tih erawh ka chiang ngam sak thung.

Principal chuan sister chu a han ko leh rih a, a râwn ani mahna le. Dawzer nufa-i te lah chuan min melh thluk tawp tum ni awm ang zia zang hian min melh a, en pawh ka en ṭha ngam meuhlo chu a ni.

Rei loah Aby te nufa chu an chhuah tir hmasa a, kei erawh ka la awm ta reng a. Abygail-i chhuak tur lah chuan hnehtu chan chang deuh hian min han melh leh kher a, huat loh tum viau pawh hian amah zawk hian a zirlo ve em bawk a, tum pawh ka tum buai peih tawhlo, ka haw so bawrh bawrh hi a ni ber.

Kut hma suih âtin kan principal chu ka hmachhawn ta ran a, ka kut chu ka khawih leh neuh neuh ringawt ṭhin a, min hnawhchhuah ngawt ka hlau ani.

"I thil tihsual chu i la pawm theilo dawn tho amaw ?" Min melh ran chung hian a rawn ti a, hawi pawh ka hawi chhuak ngam tawh meuhlo. "Aih...ka tih a nilo tak tak alawm," ka la ti ṭang ṭang a, ka thusawi chu min awih sak hram se ka ti hle bawk.

"Eng pawh chu nise, thu hretu an nei miau mai si a, thiamlo zawk chu i ni tho tho alawm," a rawn ti leh charh charh a, engtin nge maw ka tih dawn zo zai ni ?

"Hnawh chu ka hnawtchhuak em lo che ang a, mahse i lo chawl rih phawt mai dawn nia," tiin dawhkana a pen chu a la kang a, ekhai leh! Min suspend dawn tihna chu a ni awm sia, tih zel ngaihna pawh ka hre tawhlo. Ka rilru a chiai buai vek tawh!

Ka din ngawih reng laiin suspend order min pe chhuak a, engmah ka sawi zui tawhlo. Principal office chu ka chhuahsan zui ta vang vang a, classroom-a va luh leh te chu ka zak rum rum tawh.

Class-ah lutin ka school bag ka la a, midang lah chuan min en ang haw haw hlawm a, sawi dawt mai chuan ka zak takzet a ni. Tlar hma lama lo ṭhu te pahnih hmel phei chu en pawh ka en buai peihlo. Ka rilru ti nazual tura min hmuhsitna leh min deuhsawhna mitmeng hmuh ka peihloh vang a ni.

Step-a ka chhukthlak lai te chuan rilru mumal ka pu thei meuhlo a, ka kalna pawh chu ka ngaihtuah pawn ka hrelo. Engtin nge ka pi ka hrilh ang ? "Min suspend," ka ti thawr mai dawn nge ? Hetiang te chuan engtin nge school kal leh pawh ka ngam tehlul ang ni ?

Step tawp lam ka thlen chuan ka rap sual thla nawk lehnghal a, ka ke dinglam pang chu a na deuh zawk a, ka bilh ni chiah chuan ka hre bawk silo, kal luih erawh a har ṭha ṭalh ṭalh khawp mai a, ka rap ṭha ngam meuhlo chu a ni.

Bai uih uih chungin gate pawn chu ka chhuak ve mai a, tunah zet zawng, ina haw chakna pawh ka nei rihlo. Khawiah emaw leng bo daih ila, tlai lamah haw ta chauh ila tih chu ka ngaihdan a ni.

Ke na e tilo chuan ina haw tlang loin ka peng kawi ta hram a, kalna tur ber pawh ka hre em em chuanglo. School gate aṭanga kan in lam niloa peng awmah chuan ka kal ve ringawt pek a, a hmaa Ruatdikan min hruaina lam kha ni ta in ka hria.

Kawng pawh hre mang hleilo hian ka kal ve mawp mawp ringawt a, kan school bang pawn lam pawh a la hmuh theih reng a, rei pawh ka la kal hmanlo tihah school compound chhung aṭang chuan bag a rawn in vawm thla nawlh a, ka lo phu chiam mai leh nghal.

Chu mai a nilo, bag dang pawh a ngai tê bawkin an rawn v.awm thla leh a, thil thleng leh tur nghak hian ka lo en reng ringawt a, chumi rualin Lawmhnapa hmel ka hmu hlawl mai!

"E....," banga rawn lawn liam ṭawi ṭawi pah hian a rawn ti a, mi la rawn nuih vur vur lehnghal a, he mihring zet hi chuh!

Banga a ṭhut fel ât rualin a chi leh kuangte hmel ka hmu zui a, hmeichhia te an tel ve lehnghal. A rawn lang hmasa apiang lah chuan min rawn en ang haw haw lehnghal a, an rawn zuan thlak ṭak ṭak lai chuan an ni school tlanbo tur nen kan in nang ching chu a tihzia hlauh nge ka vanduaina tur zawk ni ang tih ngaihtuahin ka rilru ka lo khâp buai mek thung.

"Nanga pawh chuh!" Leia a rawn ṭum thlak rualin Pathlawian a rawn ti a, helaia min hmu teh nawlh chu a phâwk deuh niin ka hria.

"Sneak ve zuks a ni maw ?" Pathlawia bawk chuan a rawn ti leh a, engtin nge maw ka han chhan dawn ni ? "Min suspend a," ti ringawt dawn ila hmeichhia lehnghal, min ngaih nep ka hlau ve tum hrang bawk si. Engkim chu a zialo vel vek hi a ni ber.

Chhang ta mai lo hian ka lu ka thin khum ta ringawt a, min be zui tawhlo hian an neck tie an phelh zui sawk sawk a, eng chu nge maw tih an tum ni ka tih rilruk lai mekin an school neck tie chu an chalah an hreng zui ṭhap a, an ṭhianho style mai mai chu leh!

Suahsual rawng an bawl apiangin heti hian an ti ṭhin emaw ni ? Mahse le, thil pakhat ka hre chhuak ta! Hmanni khan, keimah chauhin ka awmlo. Ka kianga awm ve pakhat a awm, helai bang bula ding mek mipa hi. Ani hian min pui thei hrim hrim ang le.

Chutih laiin, "Heyyy, engtin nge ka khawsak zui zel dawn ? Ka tang ania," Angela-in a rawn ti ta chel chul mai a. "Au vak vak suh. Kha, rawn zuangthla ta che," Lawmhnapan a lo ti a, "Khawi lo kal rawh," tiin Chhete-i khan a lo pui bawk a, Angela-i invuan tang ṭung chu Pathlawian a pawm thla zui nawlh bawk.

"Lallungngai, i va han rei em em ve!" Lawmhnapan a tih tak hluk hlukah chuan an lam chu ka ngaihsak veleh ta chauh a, chumi rualin Ruatfela chu a rawn ṭum thla zui charh a, lei a thlen thlak rualin a inthlek nghal vut vut bawk.

"Kha, eng nge ni leh ta ? Lung phur i kai a mi ? Rawn ti ve vat vat rawh," Lawmhnapa bawk chuan tiin a bag chu a chhar zui sawk sawk a, "Ka hnung hi en teh, ka kamis hnung hi a bal em ?" Pakhat lah chuan a lo ti daih a, kan Lawmhnapa chuan a hauh chak hmel nasa mai.

"Awi! A va han ho tak! Aw, i fai, i chhelo lutuk. Kal tawh ang u," a ti zui ta sawk sawk a, a nula mi ber pathlawi Tlansanga a in uluk ber ang chu tih laiin, a aia balh hlau lutuk an lo la awm ve leh chhawng anih dawn hi.

"Kal vat vat ang u, Khawkheng-in min rawn tih buai leh hma in. A ninawm min zar buai peih si," ti zui hluk hluk chungin Lawmhnapa chuan a bag a beng fai zui thak thak a, kal mai an tum chu a ni awm sia, mahse, tun bak chu hun remchang ka hmu tawhin ka ringlo.

"Bike kha engtin nge ni dawn ?" Chhetein a tih leh lai mekin Dennis-a chu ka lo ko ding leh rih a, amah chauh ka ko tak na chu an vaiin ka lam an rawn hawi ṭhuau mai. "Ih..." Dennis-a lam pan phei chung chuan ka ti a, midangin min en ṭhup chu sawi tur mai pawh ka hre leh tawhlo.

"Thil hrilh lawk tur che ka nei," ka ti leh dâ dâ a, "Saw tah deuh tal sawn i sawi dawn nia, kal phawt ang u. Mi reu reu in min rawn hmu ang e," Lawmhnapan a rawn ti leh a, midang lah chuan an 'Aw' dual a, tumloh lutukin ka zui ve ta ringawt lehnghal a, mahse, ka awm nawm loh zia chu sawi hian a siak lo.

"Ti hian lo kal tlang ve law law mai rawh, i chhuak ta sa sa," Angela-in a rawn ti a, ka banah min kuai bet ṭung mai lehnghal a, mawi hawiah min sawm ve tak nain zui mai pawh chu ka pawi ti tawhlo.

Mahse, hmeichhia lehnghal, mi school tlanbo han zui ve ngawt chu ka ti deuh a, mahse, ka la haw peih bawk silo. Ka awm dan chu a laklawh kual vel vek ti ila a dik ber ang, ka rilru chu a phir kual a, zui ka duhna leh duhlohna chu a inzat vel chiah chiah maithei ani.

"Eng nge in tih dawn a ?" A hriat theih tur chang chang chauhin Angela-i chu ka zawt leh a, "Eng em em tih tur pawh kan nei hran chuanglo, class-ah kan awm peihlo a, kan spot-ah kal mai mai kan tum," a ti veleh mai a, chuti na na na, zui ve tawp ila a ṭha berin ka ring.

"Eng nge i chhuah ve chhan ? I tlanbo ve tho tihna nge ?" Chhete-in a rawn tih chuan, "Nakinah ka hrilh ang che u," ka ti daih a, hrilh chi nge chi loh pawh ka thliar hrang thiam chiah tawhlo.

"Monday chu hauh tur list-ah kan tel leh ngei awm sia, hneawm leh dawn mang e," Pathlawian a tih leh mek laiin, "Dawn e, dawn e, ka hming a lang leh hmasa ber ang a," a lo ti zawm zat a, "Mahse a pawilo, number ṭha deuh ka hnutchhiah tho," ka lam rawn hawi hian a rawn ti leh zat a, ka va han ngei kher kher tak.

Khawi lam kang nge tih pawh ka hriatlohah min pen pui a, mahse rinloh lutukin a tawpah phul hmun zawl deuh ah kan chuang chhuak hlawl a, a sir lam deuha thling lianpui tlu pakhat lam chu panin ṭhut hmun an rem zui sap sap a, hemi te hian rin ai takin hmun an hre rem phian mai a.

"Kha, hei i ṭhut duh em ?" Ṭhutna mai tur ka melh kual laiin Ruatfelan a rawn ti a, a school form kawrlum ni awm tak hi min rawn pe zui bawk a, kei lah pek chuan, chuti na na na tiin ka lo lak sak ve mai a. Ka rilru te te chuan a ngawih chawih ang aiin a fel phian mai a ka lo ti rilru a, kan inhriatna pawh a la reiloh nen a fel vai phian mai.

Lawmhnapa chu kan thlen tirh phat aṭangin kan sir lama thingkungah chuan a lawn nghal ṭai ṭai a, thing lawn lah chu a han hnehsawh em em lehnghal a, a lawn sang phian mai lehnghal.

Chutah, "Yes...! A la awm hlauh," thingkung aṭang chuan a rawn ti ta lung lung mai a, chumi rualin a rawn chhuk thla leh ṭai ṭai a. Lei a rawn thlen thlak leh meuh chuan phone leh woofer a rawn keng va va tawh. Thingkungah khan a thukru tihna chu a ni awm sia, dangdai thei mang e.

A woofer ken lai chu chhuatah nghatin a phone chuan a connect zui zat a, rei fe a beih hnuah, hla pakhat hi a rawn play a, a hla play te lah chuh! PC Lalṭanpuia hla 'Luck heih heih' tih hla kha a zai tir mauh mai a, a ma hla ni awm hial zawk mawle.

"Khawi maw Lalnunnema chu," tiin Pathlawia zial pak khu luih luih chu a be zui a, chutih laiin Dennis-a erawh zawn nei ni awm tak hian a hawi kual vut vut reng a, thil thlauh a nei emaw ni dawn ni ?

"I zu ve duh em ?" Angela-in min lo tih takah erawh hawi sawnin amah chu ka en a, ka lu ka thin khum ringawt a. A meizial zuk lah chu a han rimchhe em em khawp a, meizial pangai chiah a ni pawhin ka hrelo.

"Khawiah nge ka kawrlum kha ?" Dennis-a thil zawng chuan a rawn ti hlawl a, zawn neiin a la hawi kual reng bawk. "Khaw nge i dah a ? I ha reng emaw ka tia," tiin Lawmhnapan a zawnpui veleh chhawng a, ka bul vel ka en kual ve vak hnuah pawh kawrlum awm reng reng ka la hmulo.

"Hei Zâwrtei ṭhut lai hi a nilo maw ?" Lawmhnapan a rawn tih tak hlawlah chuan ka kawrlum ṭhutlai chu ka en thuai a, Dennis-a pawhin kan lam a rawn ngaihven ve thuai bawk.

"Khawi maw tho lawk teh," Lawmhnapa bawk chuan a rawn ti leh a, kawr lum chu a la kang a, "Nih hi," a en kual vut vut hnuah Dennis-an a rawn ti ta hlawl a, ka va han zak mai mai tak!

Thing tlu chunga Lalruatfela mu chu ka han en chho a, ani lah chuan engmah hrelo ang mai hian van lam a lo thlir daih lehnghal a, Hmela mai mai chuh! Min va han ti zak tak! Ka lo fak rilruk ve hman nen, ka fakna leh fel ka tihna zawng zawng te kha ka sût lehnghal vek.

Ka beng thlawrh zawk dawn emaw ni. Engmah ti lo ang hmakin a la awm zui a, ngawi renga nghal chi anih dawn hi, ka rilru kil khat lah chuan, "Lallungngaia bum hnu" min rawn ti chhen lehnghal a, ka va han ning mai mai tak!

"A ngai kherlo, ka zawng mai mai," tiin Dennis-a lah chu a ṭhutna lamah a let phei leh thurh a, Lawmhnapa lah chuan ka zak tih a hrelo emaw ni, kawrlum lah chu mi la rawn hmeh bel lui hram lehnghal a, chhak lam ka hawi chho leh chiah chuh kan mi nghal-a chu a awm hmunah a lo khi vur vur nia mawle.

Kan awm dan zawng zawng kha a hre vek tih hriat reng reng. Min la nuihzat ve khanglang emaw ni lehnghal ni. Amah vang vek khi a ni reng sia...hah. Lallungngaia mai mai chuh!

Chutih lai mekin, Pathlawian card a rawn phawrh ta hlawl a, chu lai phul zawl laiah chuan an in card den ta luih luih a. "Inban ang u," an tih deuh tlat vangin keipawh ka tel ve a, thing tlu chunga Lalruatfela mu lah chu a rawn tho rang khawp a, kan ṭhut bial laih rualin Lawmhnapan card a sem nghal zung zung a.

"A chaklo apiang chala pen," a ti zui lang lang bawk a. "An card ken zat apiang kan pen ang," Pathlawian a ti zui ve bawk a, kan nula pahnih dangte pawh an phur nghang mai.

Chala inpen an tih tak vang chu nge ni, ka sir deuha Lallungngaia ṭhu chu ka melh zui ralh a, he mihring pa hi target deuh ila a ṭha ang, min tihzah man chu a phu ve hrim hrim ka ti rilru a.

Kan han deng ṭan chu le, rin aiin an lo thiam nasa mai lehnghal a, kei ve lah chuan ka la keng par chuaih mai lehnghal a, chakloh ka hlauh rual rualin kei aiin Lalruatfelan a zo hmasa ang tih mawlh ka hlau ani.

Ka dinglama ṭhu Angela-in a zo hmasa ber a, kan Lawmhnapa lah chuan a hla play ngai a play nawn tluk tluk lehnghal a, hla dang mawi deuh hlek a hre thlawtlo emaw ni ?

Midang lah chuan reiloah an zo zung zung a, a tawpah Lalruatfela nen kan bang ta lel mai. Awi! Rilru hah  va han na duh bawk ve mawle.

Pathum chiah ka neih tawh laiin ani erawhin panga a la nei a, kei aia pahnih leka a ngah zawk pawh chu a lawmawm ka ti tawh zawk.

Ṭial 5 (five) ka den thlak ruallin ṭial 2 (two) a rawn deng zui a, card dang ka den thlak leh lai te chuan chak turah ka inngai fel hmiah tawh.

Mahse le, rinloh lutuk 'S' pali lawih a rawn tlar thla ta tuar a, awi leh! Ka va han hnehlo chiang chhiava tehreng em! A vawihnih nan ka tlawm nawn leh hi a ni ringawt alawm le.

Chutih rualin, kan sir lam ami te chu an lo au rual dual a, vawiin chu ka chal a pawng lawl dawn anih hi. Ka lo in lak champion ve tawh nen.

"A tam dawn emai, vawikhat ṭheuh pen mai ang u," Pathlawian a lo ti ta hlauh zawk a, nilo se chuan ka chan tur chu a chaurau viau ang mawle.

Pakhat te tein ka chalah an rawn pen sap sap a, a tawp ber amiin min pen ve rual chiah erawhin rum deuh hian ka melh a, engmah ti lo ang hmakin a ṭhutna lam a pan daih lehnghal. Kan Lallungngaia pawh chuan a va han pen na bik fawk fawk ve mawle. Vawiin chu he mihring pa hi ka haw hlur mai dawn anih hi.

~ End of chapter-6 ~