M. Ch-5

 

Chapter-5

School building kan luh rualin kan kal hrang nghal a, inchung lamah chho tlangin kan classroom-ah ka lut zui a. Tumah kal mang an la awmlo reng reng. Ti hian dar rik dawn hnaihah an rawn thleng leh ṭuk ṭuk ang a, an mak ve ania.

Rei rial lovin Hlimhlimi a lo lut ve zui a, eng nge pawh ka hriat teh reng ni, nidanga ka hmuh aiin a ngui deuh riau hian ka hria a. Anni hi an lo inṭhen tak tak emaw ni zawk ni ?

"I va chauh hmel ber bur ve ?" Amaha a bawk zawi nguai reng chu ka va be ve thawr a, nui lui tih hriat tak hian min lo nuih tawi tak a, a dang bêm reuh bawk nen, damlo hmel te pawh a pu lek lek zawk dawnin ka hria.

"Nia, tunlai chu ka nuam sam vaklo a," a rawn ti chuai raih a. Kawrlum a ha deuh ṭup bawk nen, a na viau aniang chu ka ti mai.

"Enteh, Muan," kan ngawih dun vang vang hnuah chuan a rawn ti a, a lam ka hawi chuan thil sawi tum nei awm tak hian a awm a, mahse Abygail-i te pathum an lo luh tak vangin a ngawi leh rih a. An ṭhutnaa an bag an dah thlak thleng pawh chuan engmah a sawi zui leh ta lo.

"Kan chhuak dawn em ?" Rei vaklo hnuah chuan Afelin Aby leh Sawmtei lam hawiin a ti a, chutih laiin midang pawh an lo thleng ve ṭak ṭak hlawm a. "Zung lawk ang u," tiin ka ṭhiante pathum chu an inzui chhuak a, min be eihlo chu mak ka ti deuh. Nidangah chuan ka biak hmasak ngai miah lovin min be nghal siam siam zel anih kha.

Aby te an chhuah fel hnuah pawh chuan Hlimhlimi chu a ṭawng zui leh ta lawklo a, chutah, "Kan inṭhen," hriat theih chang chang chauh hian a rawn ti sep a, ka hre sual zawk emaw ka ti dawn dawn naa, ka hre sualin ka inhre lo ang lawi a. "Pathlawi Tlangsanga nen maw ?" A lam hawiin ka ti deuh hu a, "Ṭawng ring suh," tiin a rawn ṭhu ngil nghal zat a, midang awm ve ho chu a melh kual zak zak bawk.

"Aw, hmanni deuh khan," a rawn tih leh ngat phei chuan mak ka ti lutuk tlat. An induh ve viau khan ka hre sia, an nihna pawh a la reiloh nen, eng nge maw an awmzia ni dawn ni ?

"Ti nge ? Eng nge a ?" Ka ti deuh sawk sawk a, ka darah min kuai kunin min rawn ṭhut hnaih sauh a, "Keiman ka ṭhen," mi hriat hlau deuh tak chuan a rawn ti leh sap a, ka hrethiamlo nasa mai.

"Ti nge ?" Chu zawhna bawk chuan ka lo chhang leh a, "Min duh tak tak pawn ka hrelo," a rawn ti veleh a, ka bo tulh tulh maiin ka hria. "Awihawmloh e...," ka ti chu, "Ka sawi dawn alawm," tiin min lo khap leh rih a. Kei pawhin ṭha takin ka beng ka lo dawh zui veleh mai bawk.

"Hmeichhe dang an tam lutuk a, mi pahnih awmna turah a aia tam kan awm a. Kei lah, mahni ta chu hauh ve bur chi ka ni sia, ka theilo hi a ni tawp mai." A rawn tih chuan ka rinloh lutuk a ni. "Pathlawia chu a lerh viau a mi a ?" Tiin ka zawt leh a, a lu bu deuh nghat nghat chung hian, "Lerh ang chu mawle. Midang phei chuan 'Nikhat dan-a' an ti ṭhin alawm. Dik tak chuan maw, tuna kei nen inzawmna a siam dawn pawh khan kawp lai chu a nei reng alawm." A thusawi chu ka rinloh lam daih a ni. A hmelah erawh inchhirna te, inthiamlohna te ka hmuh chhawk zut zut lawi a, a aw aṭang ringawt pawhin hreawm a tihzia chu a hriat theih.

"Chu chiah chu anih chu. Midang rilru tihnatin a hlim rei theih ngai hleinem," ka lo ti ve zat a, ka rilru tak tak ani bawk. Kan hlimna tur atana midang natna thlen hian rah ṭha a chhuah ngailo tih hi chu ka hre ve tlat a ni.

"Nia tiraw. Midang ta ka ruk sak a, tu emaw in ka ta a ru veleh a ni mai a. Eng nge maw ni vak le ?" A rawn ti chuai leh raih a, ka thusawi khan a rilru a ti na deuh anih ka ring ta. Keia pawh hi engah nge maw hunlo pui puiah ka lo sawi ve vak vak ni ? Ka a  ṭhin ngawt mai.

"Chutiang chuan ngai chuang suh, i thiamloh a awmlo chu ka ti dawt theilo nain dem tur ber chu Pathlawi Tlansanga a ni. Hmeichhe pakhata lawm zo lo chu amah ania, ama zirloh vang vek alawm," tiin hnem ve ngial ka han tum a, ka ṭawngkam mawi hriat ve zawng zawng tak meuh meuhin ka tum.

"Nia tiraw ? Chelh theihloh hmangaihna hi a awm ve ania. Hmangaihna nen i chelh ṭang ṭang chung pawha thlah lui tlattu che chu engtiang pawhin tum nasa mah la i chelh ding thei chuanglo ang. Relationship chu team work a ni an tih ṭhin kha, pakhat chauhin inlaichinna chhanhim tum tlat mahse pakhatin a tum ve chuan siloh chuan awmzia a awm hleinem," tiin chau deuh hian a rawn nui leh a. A natna chu ka la tawrh ve ngailoh anih vangin ka hriatthiam pui pha kherlo naa, a rilru nat tur zia erawh ka hriatpui pha thung. Heng ho vang hian alawm tleirawl laia ngaihzawng neih hi ka hlauh em em ṭhin. Ka rinna nen lama tichhe thei tu ani tlat.

Class boruak chu nidang nen danglamna a awmlo a, first period-ah kan class teacher a lo lut a, thil dang a pangai vek laiin ka bula Aby ṭhu nen erawh vawikhat tê mah kan la inbe chhinlo hrim hrim. Ka lakah lungawilohna tur a neih ka hrelo a, keipawhin ka nei chuanglo. Zing aṭanga a awm danah erawh min huatna eng emaw tak anei tih ka chhiar thiam a, kan hnunga Sawmtei leh Afeli mize danglam nen lam chuan ka man pha ve vek bawk. Chuti na na na, min be chak vaklo anih te chuan biak luih ka tum bik hranlo.

First period a zo a, Sir Zorema a chhuak chiah tihah Aby chu hnung lamah a insawn phei a, a chezia hi mak ka ti tulh tulh. Thawk lehkhatah min be duhlo thut a, a chhan tur awm ang chhe tê mah ngaihtuah ngaihna ka hrelo.

Rei a riallo, teacher dang an lo lut a. Tlar hmasa berah keimah chauhin ka ṭhu a, class lak lai te chuan ka inngaihtuah lung puam chho a. Hnung lamah inngeih taka nui ri a awm leh hak chang phei chuan ka inkhawngaih hluah hluah tawh. Mahni inkhawngaih hi ka thil duhloh ber asin mawle. A chhan tal hria ni ila chuan ka rilru a dam deuh mahna le.

Kawm tur dang nei ta lo chu Hlimhlimi bulah ka tâp deuh chawt a, vawiin ka hun hman zet chuan min tichau rawih rawih thei. Chawhnu lamah staff meeting an neih vangin kan bang hma a. Ka lehkhabu ka khung fel mawlh mawlh laiin midang erawh an chhuak pharh pharh tawh a, ka bag akin classroom ka chhuahsan zui a, step tawp ber ka zawh thla tihah thawm ri deuh nuai nuaih ka hre zui a, ka thlen thlak ve meuh chuan basketball court-ah an lo awm khawm luih chu niin.

Eng thil tak chu thleng ang maw ka tih rilruk lai mekin inhnial ri ka hre zui a, ka pan hnai zui sawk sawk bawk. "A sam zai khat pawh a tawk love," ti deuh hluk ri chu ka ṭawng hriat leh hmasak ber a ni. Sir Zorema leh teacher dang pawh an awm ve nual a, a tir tê aṭanga awm ve lo ta chu ka bo hu hu khawp mai.

"Tawh pawh a tawk lo hrim hrim, a dawheh anih kha kha nau kha," thinrim tih hriat zeta rawn ti leh tu chu Joseph-a a ni. Eng thuah nge maw kan Lallawmzuala tehlul hi a thinrim ve dawn ni ? A hmaah chuan mipa pakhat hi a mit lehlam hup ṭût chungin a lo ding a, an inkarah Sir Zorema a ding bawk a. School building aṭanga zirlai lo chhuak ṭhenkhat pawh chuan kan awmna lam zel an rawn pan a, tumah haw tum awm ang pawh ka hmulo.

"Dennis, i hnek em ?" Joseph-a bula Dennis-a ding ngawi reng lam hawiin Sir Zoreman a ti zui fak a, pakhat erawhin a lu a lo thing a, chutih rualin Pathlawi Tlansangan a darah a rawn kuah zui thak a, kan Sir chuan hahthlak a tih hmel tawh khawp hian ka hria.

Joseph-a ṭawng tum leh chu Miss Lola-in kan lam deuhah a rawn pawt phei zui a, chutih rualin Ruatfela pawhin a rawn zui ve a, pakhat lah chu a lo ṭang nasa mai a, an inpawt lui ṭawng ṭawng hi a ni ber.

"Lo kal rawh. Ṭawng i insum thei bawk silo, in Sir saw intithinrim zo mai ang." Miss Lola-in a tih laiin, "Saw nau saw a dawheh anih saw," Lallawmzualan a lo ti zui hluk a. Eng thu leh hlaah nge an intihbuai ka la hrethiam chuanglo.

"In ṭhian-a saw'n a khawih lo tak tak maw ?" tiin Miss bawk chuan a zawt leh a, Lallawmzuala chuan a ning ta deuh aniang, "Khawih lo ka ti ka tih chu mawle. Break lai khan e saw nau saw hmuh pawh kan hmulo hrim hrim, zun in thlangah meizial kan zu daih," a rawn tikhawl mai a. A bul hnaia a sawi hre pha ho chu kan nui chhuak hawk nghe nghe.

"Daw heh zep zuap lutuk mai. Ka va hnek chawrh tak tak zawk dawn a maw'n le," ti deuh hluk paha a inher rualin Miss-in a lo man bet leh rih a, ṭhian chhan a pek nat dan em em hi, a kal pawh dil sela a pe phal ang tih theih tur a ni.

"Saw nau saw la bo rawh u, pawnah dah rawh u." Ring vaklo hian Ruatfelan a lo ti veleh a, hetianga an awm khawm reng chuan an infuihpawrh zo ang tih teh pawh a hlauhawm zawk.

Rei lohah an buaina chu a zia chho ṭan deuhva, Ruatkimi ka hmuh zui tak chinah erawh awm khawtlai zui lovin kan haw tlang a. Hlimhlimi erawh awm a la tum vangin ka haw san a, eng êm an ti zuiin ka ringlo.

"Tunlai kan school-a lar deuh hi i hre ve em ?" In lam pana kan kal mek laiin Ruatkimin a rawn sawi a, eng chu nge maw a lo hriat leh bik tak ni ? Lar vak an awm pawn ka hre hranlo.

"Eng maw ? Sir Felkima a bang dawn tih vel kha maw ?" Ka tih chuan hahthlak min tih hmel deuh hian a chek deuh tlak a, ka sawi sual emaw ni zawk ni. "Eng nge ? A nilo ami ?" Tia ka zawh leh chuan, "Ni aw zawng nang," uar fahran hian a rawn ti a. Ka hre sual chhia va anih ngei dawn hi.

"Eng lam ?" Ka tih chuan a hma lama lungte awm ho chu a chhuih phei neuh neuh a. Chutah, zawi ang reng tak hian, "Tlansanga kha mawle," a rawn ti sar sar a, "Pathlawia kha maw ?" Kei pek chuan ka lo ti leh hu a, a lu a buk nghat nghat takah chuan kan Pathlawi lerh kawh-a chu a lar tih ka hre veleh chiah.

"Hmm, a van ho," tiin ka hmui ka tipawrh deuh a, "Chu chu engtin ?" Min chhan hma hohvin ka lo zawt zui leh zat a, "A pa reuh ka ti," a la rawn ti zui a, "A ṭhiante pawh an ṭha tho." Leh zel chuan a.

"Amah hian ka mit a la deuh ber. U Dennis-a pawh hi a pa reuh, U Ruatfela pawh. Joseph-a hi chu a at hmel ka ti, a nui vur vur zel bawk sia. Hmanniah pawh in line laiin ka va en a, a dairy te a lo seh mawle," a rawn ti leh zat zat a. Kan Lalruatkimi mitah meuh pawh Lallawmzuala chu a la a tho anih dawn hi.

"Pathlawia chu a kawp lawr emai a. Di kuah lawra a ni ringawt," ka tih chuan, "Nia, duh aiin a playboy mah mah ka ti. Mahse midang pawh hi a hriat miahloh, Dennis-a phei hi chu a ruka lerh chi a ang ka ti," a rawn ti zui ve zat a. A ve teh ngawt chuan a, a duh duh hi a sawi ve ohawng phawng a, mi te reu reu in an hria ang tih a hlauhawm. Sawi zui ta lemlo in titi dang ka vawrh zui a, rei loah in kan thleng zui ve mai bawk.

Zanrei lam deuhah veng chhungah mitthi kan nei a. Aizawl damdawiin lama boral anih vangin a ruang rawn phurh haw a ni a, patling kum 55 vel a ni a. A hnathawk lai che sualin Aizawl lam an pan thlakpui hnuah a thi zui mai ani awm e. A nupui fanau te an lainat awm khawp mai.

Mut dawn hnaih tawh lamah tlangauin a rawn puang a, a tuk chhun lama vui tur anih vangin ka pi pawh kal ve a tum a. Keini erawh nidang ang thovin school kan kal thung.

School lam boruak chu ka tan chuan nuamlo lam hret a ni. Hlimhlimi a kallo a, kawm mumal em em nei talo chu break-ah pawh ka chhuak lovin classroom-ah ka ṭhu deuh chawt a. Ka hun hman nuamlo tizual tur tingin ka hnunga ṭhu te chu inhrilh ru in an nui ho leh kur kur ṭhin a. Eng vanga min la be duhlo fo nge an nih ka la hre chuanglo.

"I lo ṭhu phei leh dawn em ?" Ka hnunga Aby lam hawiin ka ti a, ka ṭawng chu a hrelo nge a hrelo der zawk pawh ka hrelo, en pawh min en eihlo a, hria ang pawn a awm chuanglo. "Abygail," ka ti zui leh zat a, chutah chiang fek fawk hian min lo en zui a, min chhang ṭha ve mai ang chu tih laiin a hawi sawn zui vei hmak anih chu. Ka be tawhlo chiang ang chu aw..... Min be duhlo tu na na na, engah nge maw ka biak reng bik ang le ?

Engtin tin emaw ni chu ka hmang ral veleh mai a, haw hma in Sir Zorem-an staff room-ah min ko a. Registration tih nana thil pawimawh ṭhenkhat min zawt a. Naktuk lama ka aadhar card no submit turin min tizui bawk a, class lam pana ka kal leh meuh chuan zirlai dang haw tur nen kan intawk nak nak tawh.

"Eng nge i tih ?" Classroom chhung ka luh ruala ka thil hmuh chuan min ti thinrim kher asin. "Dah nghal rawh," tih leh ka phalna la loa ka bag lo hai ve vak vak tu lam chu ka pan phei mawm mawm a, ka bag va lak mai ka tum chu rang deuh hian a lo phih sawn a. Vawi leh khatah a chhunga awm zawng zawng chu a rawn bun darh nghal vek ringawt  anih chu ! Henu phiangsen hian eng nge maw a hriat teh hrep ni ? Thawk leh khatah min be duhlo ve ringawt a, tunah hei, eng thil nge a tih leh tak hi ?

Ka chet leh hma hauhvin chhuata ka dairy let ngat mai chu a chhar a, keu a tum rual chiahin rang lutukin ka va chuhpui a. Ka phalna tel miahloa a chet dan chuan ka thin a khei ve zak tawh, a ti mah mah tawh deuh chu a ni.

"Ka duhloh thleng thleng min nawr tum miah suh," ka ti ve ta kha kha a, rum theih tawpin ka  melh zui bawk nen, ka tih mai mailoh zia chu a hre ve ngei ang. Min chhanglo, dairy chu a chuh hian kan inchuh a ni tawh a, thlah mai a tumlo a, kei lah ka tha tawpin ka ṭang ve tlat bawk a. Ka dairy te chu a thler neih nuaih tawhin a nia ka rin.

Ka kut pahniha ka pawh ve ṭang ṭang laiin ka kum lehlam zawk chu Sawmtein a rawn phih thla sawk a, ka banrekah min man bet zui tlat bawk. Chutah kan zawng Abygail-i chuan a pawt leh ta phut a, ka inrin hman hmain dairy chu ka thlah zui hlawk a, a thler hawk thei hial lehnghal.

"Hmeli," ka tih leh ṭhat rualin Abygail-i chu a kal hrang hlawk a, a awm dan chu rilru buai nen hian ka tehkhin tawp tawh, a rapthlak lutuk tlat. A kid rinawm pahnihin min dawm bet ran bawk a, mal ṭan rih mah ila tlawm mai mai ka tum bik bau lo.

"Hetah hian Dennis-a hming te a lo chuang ve em ? Nanga tan mai mai ka phal hleinem," tiin dairy chu a keu sawk sawk a, a thing leh chiam chiam a, a ṭawng tawp lam phei chu vin tawh tak a ni, a au hian a au ani ber tawh. Chutah, ka dairy kara Jaden thlalak ka zeh kha dairy kar aṭang chuan a rawn tla a, kan ramhuaii chuan a ngaihven kher asin !

Chhar tuma a kun hniam lai takin ka tal phut a, ka sir ami te pahnih chu an lo inring lawk biklo aniang e, ka tal chhuak thei hlauh a. Rang lutukin Aby lam chu ka pan a, thlalak chu ka va chhar khalh zui tharh bawk.

Ka chet dan chuan a thin a tirim tih hriat zet hian min au khum zui tuar tuar a, ka thil ken lai chu min rawn chuh zui buan buan bawk. Kan inchuhna lamah chuan kan insual ti tih tawh a, thlalak pawh chu ka hum khawr vek tawh hial a ni.

Rei loah Sawmtei leh Afeli bawkin min rawn dawm bet leh a, min cho anih te chuan fair taka tih ve tur alawm le. Ka ṭhiante tia ka lo chhal ve ṭhinte hi tunah chuan ka haw so bawrh bawrh tawh. Mi daw heh, dawt hmang, daw thei uchuak, dawt pawh thudik sawi hmiah hmiah thei, mi fake, dawzer an nih hi.

"Engtiang paw'n min sual rawn mah ula in duh ang chu ka tih tir biklo ang che u. Ka thih ṭhak thleng pawhin ka sual ngam che Dawzer ho," ka ti va ta ṭhat a, ka tha tawpin ka tal ve zui fat fat bawk a, "Hneh dawnlo mah che u ila, ka cho tho tho che u dawheh ho. Mi lem in nih hi mi lem," ka tizui leh piap piap a, tih theih ka nei tlem lutuk mawlh chuan ka thinrim a tizual a ni.

Kan Dawzer 1 lah chuan a kuta a thlalak ken chu uluk deuh hian a en a, a duh ang chu a hmulo teh ang chu, ha. "I duh tak chu i hmu ta e a hmelṭha viau lo maw ?" Elhsen deuh chuan ka ti leh deuh kher a, a run tur tingin ka nuih vei sâng bawk a, min haw em emtu te bulah hi chuan nui sâng reng ila, an thinrima min huatna a nasat poh leh kan tan a nuam ting a ni mai.

"Abygail, mi á nu, Dennis-a i ngaizawng anih te chuan zep zep lo khan hma lak mai tur che alawm. Engah nge kei te lul hi min lo huphurh ve ringawt ni ?" Ka tizui leh hram a, min haw tawh mai mai ang chu. Engah mah ka ngai tawh dawn bik der silo a. A thinrim poh leh ka tan lawmna a ni tawh mai.

"Hmeli, khawiah nge i dah ?" A rawn ti vin leh tuar a, a teh ngawt chuan a. A ni eng amah hi ka kawl thlawt silo a e, a zawh pawh hi min zawt peih reng reng. Lo nei tak tak pawh ni ila , ka hrilh duh a ring reng reng emaw ni ? A á tawh takzet chu anih hi.

"Ve ngawt a che," ka ti leh hman ṭawk tih ah ka ban lehlama vuan tu Sawmtei chuan min phih sawk a, dawhkan ka bawh thla zui rawk a, ka pum ka sawh na lo chauh a ni.

Chutah, tu ber nge pawh ka hrelo, min rawn pawt tho zui nawlh a, ka hawi chhuah rualin ka hmai a ri zui ṭhuai a, a thip zui vung vung mai bawk. Kun ngul chungin min benna ka biang chu ka dawm a, ṭah ka tumlo viau nain ka mittui erawh a far ta tho. Kan zawng dawzer hian a ti mah mah tawh deuh chu a ni.

"Vawikhat mah a kiang hnaiah lo awm ve tawh ngai suh ang che," a ti zo hman awrh ang tihah a awmah ka nam zui dawrh a. A lo inring lawk biklo chu chhuatah a thal ta ṭhuai a, remchangah lain ka ṭhut bet zui a, engtin tak nge ka zu tih zui pawh ka hre chianglo. Ka mumallo nuai a, thil thleng ka hriat chian leh meuh chuan an pathumin min lo sual rawn der tawh.

Ka mal ṭan miau avangin ka ban remchan ang ang chu ka tha tawpin ka bei ve hmiah hmiah a, tu sam ber nge ka keh a, tu nge min vuan bettu hi tih tak ngial pawh ka hre theilo. Nilo, ka awmna pawh hi ka hrelo lek lej tawh zawk a ni.

Thawk lehkhatah ka chhip sama min kektu chuan min thlah thut a, ka lu vun na lutuk chu a hik thla ta emaw tih mai tur ani. Ka lu vun a chhah mup thei alawm.

"Thlah rawh Muani," tiin Abygail-i chhip sama ka kehna leh a vawn beh tlatna chu Lily'n a rawn pawt a, thlah mai erawh ka la tumlo nasa. Chu veleh ka hnung lam aṭangin tu emaw hian min rawn chawi tho lawp a, chutah chiah chuan ka ngaihtuahna a fim ve ta chiah.

Ka vawnna chu ka lo tinghet deuh aniang e, min pawh rualin kan Dawzer 1 ka pawt tel zui lawp a, a la ṭe ring em em lehnghal a, chawh ka ti rilru khawp mai.

"Engah nge helaiah te in lo insual a ?" Ti tu chu kan class cr a ni, min melh danah a thinrim hle tih pawh ka hre thei a, zirtirtu te hnenah a thlen loh hram beisei ang.

"School ban rual khan haw ve mai ta che u," a rawn ti zui leh khur khur a, ani pawh eng nge maw a la tih bik reng reng le ?

"Amah khan kut a thawh hmasa," a sam tuai ṭha sawk sawk pahin kan Dawzer 1 bawkin a rawn ti leh a, a va han dawheh mawlh mawlh tak ! Hetiang em ema sual hi chu anih ka ring biklo asin mawle.

"A bag kan tih tlak sak palh a, a thin a rim a, a rawn che nghal buan buang anih kha," Dawzer 2 in a lo ti veleh a, Afeli erawh ngawi kar chung hian rum deuhin min melh a, sawi chhuaklo mah ila ka rilru erawh a na ve takzet.

"In va han dawheh zawt zawt tak e aw, ka thulo a ka bag lo khawih ve ringawt tu leh ka hmaia min bengtu chu nangmahni in nih kha Dawzer ho," ka ti ve ta fak a, an duh duha an puh tur ka ni bikin ka hrelo. Hreh miahlohin dawt an sawi zuah zuah a, engah nge maw ka ngawih reng bik ang le ?

"Tun hi dawt insawi siak hun a nilo. I bag la ula, haw vek rawh u." Kan class CR chuan a rawn ti deuh fak a, a ṭawng danah reng reng pawh a thinrim tih chu kan hre vekin ka ring.

Eng khaw sawi set set lovin ka bungraw darh nuaih ho chu ka va chhar sawk sawk a, ka bag-ah ka khung zui mawlh mawlh bawk. Chhar pawh ka chhar fel hma hohvin Dawzer ho chu an chhuak a, Sawmtei chhuak tur chuan ka lehkhabu chhar tuma ka ban mek chu a rawn rap hram a, engmah tilo ang mai hian min la kal pel zui a, a tukhum chu ka melh rum em em ringawt tawh.

"Lily, kawngka chu lo khar mai rawh," tiin kan Cr ber chu a haw zui nulh a, a ni thleng thleng chuan ka ṭah an tichhuak ṭeuh tawh. "Khawi ka lo chharpui ang che," tiin Lily chuan min rawn chharpui a. Ka dairy zawnga ka hawi kual mek laiin teacher dawhkan sir deuha a lo let bal chu ka va hmu a, a thler chhe nuai ka hmuh takah chuan ka mittui a luang ve ta chiah.

Anni vanga ṭah kha ka duh ngailo, ka mittui hi an phu pawhin ka hrelo. Mahse a har a ni, ka tum poh leh ka ṭah a chhuak zual ni mai hian ka hria a, keimah chauha awm ka nih loh miau avangin a hreawm leh zual.

"Hei, hei hi ?" Tia Lily'n ka lam a lo pan takah chuan ka mittui ka hru hul sawk sawk a. A lam hawia ka inher chuan Jaden thlalak kha a kutah kengin uluk deuh hian a lo en a, ka pan rang teh asin aw....

Jaden thlalak khawr chhe vek tawh chu ka lak sak a, chu te hlei hlei chuan ka ṭah a tichhuak zual a, kan Dawzer pathumte chu a huat hian ka haw so bawrh bawrh tawh.

"Kha, khah," ka bul amiin a rawn tih takah chuan hawi chhuakin ka mittui tling pur chu ka khap per sak sak a, a hmel chiang taka ka hmuh theih rualin min khawngaihna mitmeng ka hmu zui a, tuna ka thil hmuh duhloh ber a ni bawk.

"Imm, Jaden anih hi," min zawh hma hohvin ka lo ti a, ka nuih lui sak nain ka mittui erawh a tla ta tho. Tum viau mah ila ka dang hman ta thlawtlo hi a ni ber.

"I biang chu leh !" A rawn tih leh rualin ka mittui chu ka hru hul sawk sawk a, mahni ka inkhawngaihlo theilo. Thil dang ngaihtuah tawh lova in thlen vat chu ka duh ber a ni rih.

"Abygail-i chuan a beng tak tak che elaw a, a va han rapthlak reuh ve mawle." Min en chungin a rawn ti leh a, chhan ngaihna ka hrelo, ka nuih tawi tak ringawt.

"Cr kha a van thinrim hmel em em, min huat phah mai ang em ?" Ka ti zui ta daih a, sawi tur dang hria ila chuan ka zawt miahlo zawk ang mawle.

"Huat phahlo ang, a ni hi chu a ṭang leh lutuk a. Cr nih hi a tlin ṭhin ania, kan class pawh hi kan inlungrual phah a, kum tawpah pawh lawmman kan la ziah alawm." Hmel nelawm zet pu chung hian a rawn ti a, a hmaa ka lo ngaihdan ṭhin vang khan ka inthiamlo ru hle tawh. Hmeichhe ngawichawi, a ruka ngeng leh rilru chhe deuh tur angah ka ngai ṭhin kha ania. Ka lo rinloh lam daih ani.

In ka thleng chu ka pi min lo biakna pawh chhang mumal loin inchung lam ka ding nghal a, ka biang mawlh chu a hmu ang tih ka hlau a ni. Ka bag dahthla in khumah chuan ka bawk thla zui hnawk a, vawiin ka thil tawn tehreng chuan min sawp chau hnawk thei hial a ni.

Rei fe ka bawh vang vang hnuah chuan mutchhuakin min rawn zem chiai chiai a, mahse intiharh luiin bual in lamah inbua turin ka lut zui a. Darthlalanga ka inen leh lek phei chuan ka ṭah te nen lam a chhuak tawh. Ka sam a pawr fur a, ka mitmeng a dul raih bawk a, ka biang chu a sen deuh ṭalh bawk. Ka lan dan maiah chuan damlo na deuh te pawh ka ang dawn dawn a ni.

Ngaihsak zui tawh loin ka inbual san a, ka che te reng reng chu ka han zawi khawp a, ka inbual chu ka harh hawklo na chungin a hma ai chuan ka zia ta deuh.
Ka inbual zo, ka inthlak lai mekin ka piin pindan pawn lam aṭangin min lo ko a, "Inhnuaiah lo chhuk lawk rawh," a tih chuan tha tho lo zet hian ka inthlak sawk sawk a, khua pawh a tlai ve duai tawh mai.

Inhnuai ka chhuk chuan kan ṭhenawmpa a lo leng a, ka pi nen sitting room-ah an lo awm a, an lam ka pan rualin an pahnih chuan min lo en nghal zat a, engah nge maw min koh thlak ve kher ni ka tih rilruk lai mekin, "Muani, i dam sam vak lo em ni ?" Ṭhenawmpa, pa Dinga chuan a rawn ti a, "Damlo hranlo e," tiin ka lu ka lo thing nar nar a, ka pi lah chuan chik fahran mai hian min lo en a, ka biang mawlh chu a hria ang tih ka hlau a ni.

"Hei, kan mitthi buhfai khawn tu tur kha a ni te khaw lamah a lo zin chho daih a, min lo tlawmngaih sak lawk thei mai ang em ? I peih phawt chuan Jaden-a pawn a kalpui thei ang che. A ni chauh han tirh chu a mawilo lulai em mai a, i hnai bera tiin ka lo sawm tawp che a nih hi." Ṭhenawmpa chuan a rawn ti a, ka hrehlo nachungin tunah tak chuan ka phur fahranlo khawp mai.

"Peihloh tur thu a awm hleinem, khawn rawh se. Chutianga khawn tur an awm ngangloh te chuan," ka piin a lo ti nghal zung zung a, kei erawhin engmah ka sawi zui lem ta lo a, ka 'aw, e' liam ta vel vek mai chu a ni ber.

Pa Dinga haw hnu deuh lawkah Jaden a lo lut ve zui a, buhfai ah na tur bag ka lak laite chuan phur fahranlo tak ka ni. "Ti nge i biang chu ?" Pawn gate ka khar fel lai mekin Jaden-in a rawn ti a, "Ti nge ? Engtin nge a awm ?" Tiin ka biang chu ka khawih a, "A sen ṭulh alawm, miin an beng che em ni ?" A rawn ti ta khauh a, a langsar viau anih ka ring.

"Aih, thosiin min seh aniang," ka ti ta ngawt chu engmah min zawt zui tawhlo nain a awih hmel fahran lo.

Thu dang sawiin kan ti ti zui a, kan bial chin takngial pawh ka la hriat chianloh vangin aman min khawnpui zel a, kan khawn zawh chuan khua a thim ti tih tawh a, buhfai dahna tura an tih lah chu a hla reuh khawp a, field bul lam anih vangin ka la kal ngailohna a ni.

Khawhar in chu field chhak chiahah a ni a, an ṭhenawm lawkah buhfai chu kan dah a, nu pakhat hian min lo chhawn a, midang pawh an awm ve nual mai. "Mitthi buhfai in lo dah ani maw, in va fel ve," nu berin kan buhfai khawn a bun mek laiin pa pakhat lo lut hian Jaden zawk chu a rawn bia a, ka la hriat ngailoh anih vangin kei erawh ka lo ngawi dak thung.

"Nia, Rinsiami a zin a, kan lo khawn ta mai anih hi," Jaden chuan ṭha deuh hian a lo chhang a, tute pawh hi nelawm takin a be thei vek mai a, mood fuhloh lai te hi a nei ve ngailo zawk emaw ni ?

"Nu-i, Joseph-a hi a la rawn haw na nge ?" Min kal pelh pahin a rawn ti zui ta daih a, a ṭawng danah chuan an pa ber anih ka ring. "Haw nang, ka lu ka meh tir dawn e a tih ve tak kha mawle" Kan ip min lo pek pahin nu ber chuan a rawn ti ve zui a, pawn lam pana kan kal mek laiin kawt laiah chuan Lallawmzuala kan tawk zui a, a bike aṭanga a rawn chhuk rualin a mit ko min rawn san khum euh a, helaiah te eng nge maw a rawn tih ve ni?

Min kal pelh rualin a bek dinglam Love lema kheng chu ka hmu zui a, ka en zui vauh vauh laiin nichina in neitupa kha belpui chawi chungin a lo chhuak a, Joseph-a nen an intawk chu uluk lutuk hian a thlek zui a, a bek kheng chu a hmu ve ta aniang, "Eng nge i bek ami hi ?" A ti zui fak a, a lawm hmel fahranloh khawp mai.

"I love my dad tihna a nih hi," pakhat lah chuan a lo ti sam êt a, pa ber chuan a melh rum teh asin aw.... "Ṭullo lutuk mai. Va meh ṭhat tir leh nghal rawh, kal rawh," A pa chuan a ti leh a, kawt kaia lo awm ve ṭhenkhat ho chuan kan en ṭhap tawh. "Ka meh ṭhat tir leh te chuan a kawlh vek dawn asin," a chhip sam tuai vut vut chunga Lawmzualan a tih leh mek laiin a nu kha a lo chhuak ve a, "Eng nge a ?" Tiin Lallawmzuala te pahnih inhau chu a rawn zawt thuai a, a pa a thinrim em em laiin kan Lallawmzuala erawh a dan pangaiin a nui leh vur vur tawh.

"I fapa bek kha han en sak teh. Ṭullo lutuk, khatiang setanic ho tih dan anih kha," ti hluk hluk chungin ṭhenawm lam a pan a, a nuin a bek a en veleh chiah chu a tukhum a ri zui thlawrh a, midang awm ve ṭhenkhat ho chu an nui huk mai. Kan Lawmzuala chuan hauh a tuar leh phawt dawn a nih hmel.

"A nu leh pa an nih kha, Joseph-a hi chu a hahthlak bet bet ṭhin ania," kawngpui lam pana kan kal mek laiin Jaden pawh chuan a rawn ti ve ta hlawl a. Ni e, a chhungte tan hi chuan a hahthlak ve ṭhin ngawtin ka ring.

"Amah chiah hi ami fa an neih a ?" Ka tih chuan, "Ni lo e, nau hmeichhia pakhat a la nei alawm." A ti ṭha veleh mai a. Fapa neih chhun, upa ber lehnghal, hetianga a tal mai mai hi chu a nu leh pa te an khawngaihthlak ngawt mai.

"A pa khan eng hna nge a thawh a ? An harsa em ?" Ka ti leh deuh ha chu, "Harsa hran love. Kut hnathawk an nia, an taima teh mai ania. Lo an nei zau a, chu bakah vawk an ngah bawk a, an thlai leh ran vulh te aṭang hian an la lut hnem ang ka ring." A tih chuan kan sawi zui ta lemlo a, mahse ka ngaihtuah zui veng veng a, an chhungkaw bula awm a hlimawm reuh phianin ka ring.

"I lo thleng maw ? Chaw ei nghal ila, rin aiin in tlai ta deuh sia." Ka piin a tih rualin ṭhuthleng seiah chuan ka bawk thla zui a, a ngaih a ṭhalo deuh nge ni, "I nuam sam vak na nge ?" Tiin ka pang a rawn dek a, "Nuamlo hran lo e," ka ti tak nain ka tha tho loh zia erawh a hre ve vekin ka ring.

Ruatkimi chaw ei siam chu puih pawh pui ta lemloin ka bawk zawi nguai reng a, ka mut chhuak lutuk vangin ka muthlu leh lek lek ṭhin a, ka eng tih tha mah a tho lo, tunah chuan kham hnawk khawpa mut ka mamawh berin ka hria.

Zanriah ei kham aṭangin ka pindan lamah ka tawm a, chaw ka ei tlem a ti deuh nge ni, ka pi lo chho chuan min ngaihven pahin biscuit min lo ken chhoh a, "Ka lo ei ang," ka ti tak nain ka ei ta chuanglo.

Nichin lawka mutchhuak hle si kha ka muhil leh thei ta der lo a, ka muthilh dawn apiangin ka pang a kham nge ni, ka awm a nuam hleithei meuh lo a, ka lukham kham lai te chu hreawm tiin ka dah sawn leh ṭhin a, ka inlet tawn sek ringawt tawh.

Ṭhu chhuakin ka phone sana chu ka en nghal a, dar 11 a lo pel leh duai tawh. Naktuk zing ka tho tlai ngei ang le. Bathroom-a lutin rei ang reng tak ka va ṭhu leh rih a, ka chhuah hnua ka mut leh chuan ka zia ta deuh.

A tuk zingah chuan ka nawm sam loh chhuan lamin school ka ṭulh a, nileng deuh thaw mut nan ka hmang hi a ni ngawt a, zing lama ka mu kha tlai rawngbawl hun bawr velah ka harh leh ta chauh a, chuti em ema mut ka duh lutuk chu mak ka inti deuh a, han ṭhanharh emaw eih ka neilo bawk nen ngaih a ṭhalo rum rum duh zawk.

"I taksa a chaklo anih kha, mut theih chuan mut a ṭha. Mut hahdam tluk hi a awmlo ania. Chaw eilo ai chuan mut hmuhloh lutuk hi hriselna in a haw zawk," ka pi lah chuan a ti sam êt a, engah vak ka ngai zui duh ta biklo.

Tlai lamah erawh ka harh vang ta deuh a, ka lu rit bur leh ka zawi ngawih ngawih te khan min kiansan ve ta deuh a.  Zanriah atan ka piin sangha a kang a, rin ai takin ka ei tui khawp mai a. Ka chhungten min thawhsan vek hnuah pawh dawhkan kilin ka la ei mial mial a, thil ka ei tui ta chu ka pi pawh a lawm khawp mai a, ka landanah cher min ti ve deuh anih ka ring.

Hringnuna kan thil tawn te hian rilru hi a lo khawih buai thei khawp a, taksa lam thlengin a ei chhe vek thei hial a, sawi chhuah ngam siloh natna pai ruk ṭeuh lo hreawm zia hi ka hre thar nawn awn awn mai anih hi.

Zan lam chu ka pi bulah TV enin ka ṭhu ve char char a, tunlai ka lehkha zirloh dan em em hi, rilru pawh a hah thei tawhlo mah zawk. Dar 9 leh a chanve pelh deuhah mu turin inchung lam ka pan a, bathroom darthlalanga ka inen chu ka mit khur a tla ve dâk a, ka sam a hnawk bawrchhawr bawk a, ka vun lah chu a nunglo em em khawp a, ka hmelchhiat vanglai tak ti ila a dik ber ang. Hmelṭha ka inti ngailo na chu hetiang reng hian ka la chhe ngailo.

School ka kalloh zeuh zeuh ṭhin tak vang nge ni, a tuk zing ka school kal tur insiam lah chu ka han phur lo khawp a. Tlang taka sawi dawt chuan tunlai ka rilru hi a hnual zawng hlir ani ti mai teh ang, eng tih mah ka phurlo a, Dawzer ho nena buaina nei tur ringawta school va kal phei chu ka chaklo lehzual.

"I va tum nasa ber bur ve i nuamlo leh tawh a mi ?" Ruatkimi tiffin siam pawh chuan a rawn ti ta thlawt a, ka hmelah ka lo tilang viau nge maw ni zawk ni ?

"Tlansanga te kha an inṭhen daih asin," school lam kan pan laiin Ruatkimin a rawn ti teh hlawl a, "Inṭhen e, a lerh em alawm," ka lo ti tawi tak ringawt a, ka sawi zawm chak vaklo tih a hrethiamlo nge, "Ti nge an inṭhen daih le ? A duh tawhlo aniang a ?" a rawn ti leh zat a. Min bia awm ang pawn a lang chuanglo, "A lerh vang mawle, a lerh kawh em a," ka lo ti leh hlak hlak a, "A bialnu khan a ui ve ngawt ang chu," te chu a la rawn ti deuh deuh a, ka thin a khei ve zak mai.

"Ui na vak tur a awmlo e, eng teh luaah a ngai vak biklo ang," aw ki pangai deuh chuan ka ti leh a, ka sawi tum erawh a hrethiam thovin ka ring.

First period-ah Sir Zorema a lo lut a, nimin ka kalloh vangin leave record principal hnena submit turin min ti a, min sign sak vek hnuah principal office lam panin ka kal a, Dawzer ho chuan ka chhuak tur mai mai pawh chu min melh no lo khawp mai.

"Hei, hemi hla hi copy a ngai a, monday morning assembly-a kan sak tur anih hi. Kan class conduct hun a nia," ka bula rawn ṭhut thlak dat pahin Lily'n a rawn ti a, a school dairy-a hla a ziah thlak chu ka lo en sak a, chutih laiin, "Niminah kan copy a, i lo kal silo a, ti khan kha kha copy mai rawh." Tiin a ṭhutna lam a pan zui leh daih a, ka school dairy phawrh chhuakin hla chu ka copy thla zui ve mai bawk.

Last period-ah Eco club-in school chheh velah thing an phun nual a, midang erawhin school hmunhma vel kan tifai a. Ka vanduai a kal tluang nge ni, Sawmtei nen inchung corridor tifai turin min ti mauh mai a, kan Dawzer 2 lah chuan, "Ka tibuai khawp ang che," tih nuih tak hian min nuih sang reng a, a nuih sâwng lai taka ben siah mai hi ka nap a, chu erawh ka ti ta biklo.

Inchung corridor chu phiat faiin ka rut leh thlap a, kan Dawzer 2 kha khaw nge a awm tak pawh ka hrelo, a nawh fai leh lam chu a duh leh rawn ti ve tawh mai teh se.

Classroom lam pan tlang lovin inchung zawlah ka chho zui a, reiling bawhin ka hawi thla veuh veuh a. Thli lah chu boruak tinuam tur tingin a rawn thaw heuh heuh a, ka awm dan uap deuh churh pawh kha a rawn chhem kiang sawng sawng hial a ni.

Rei deuh chu ka awm ngai rengin ka awm a, dar rik hnua zirlai haw dam dam pawh chu ka hmu reng nain ka che chang zui mai lo a, tuna ka awm dan hahdam zet hi haw san atan chuan ka la ui rih ni berin ka hria. Ka zik mar leh ṭalh ṭalh hnuah inhnuai chhukna lam panin ka kal zui a, inhnuai chhukna kawngkhar pawh hawn mai ka tum chu a sak deuh ṭalh a, ka pawh vak vak hnu pawhin ka hawng thei chuanglo.

Hlauhthawnna in min rawn tuam mup mup a, ho têah pawh ngaihtuahna ṭhalo pui pui ka nei nghal a, chhung lamah min kalh hnan anih te ka ring rum rum tawh. "Lo hawng teh u," tiin kawngkhar chu ka beng zui dawt dawt a, tumah min chhawn tu reng an awmlo, a reh vung vung ringawt. Chhung lamah min kalh hnan tak tak tihna em ni ? Tuman min lo hawn lo ta se, zan khua in ti hian ka awm dawn tihna nge ? Rilṭamin ka thi thei mai ang.

Ka tih ngaihna hrelo lutuk chuan kawngkhar chu ka pawt vak vak ringawt a, a chang leh ka beng leh dawt dawt ṭhin a, min hawnsak turin ka ngen lawm lawm mai bawk. Mahse, chuti chung chuan thawm dang emaw tal pawh ka hre lo. A reh hian a reh tlawk tlawk ringawt a, tih tur ber pawh ka hrethiam tawhlo.

Chhuahna kawng dang ka zawng ang nge, min lo hawnsak hun nghakin ka awm tlawk tlawk mai ang ? Ka hlauthawng takzet tawh ani!

A tawp nan tak tak tiin kawngka chu ka pawt leh chiam a, mahse, "I va bengchheng reuh e aw," ka sir lam aṭanga rawn ti tu vang chuan ka tawp chiang hle. Rang lutukin ka hawi phei zui a, ka hawi phei rualin meizial khu rawn chhuak chu ka hmu hmasa ber a. Chumi rualin reiling kil lama ban tawi tê inphun pakhat phen aṭang chuan Dennis-a a rawn chhuak hlawl mai!

"Eheeee!" Ka lo ti deuh hluai a, tehhlawl chuan a! Amak ve bawk êm a, ani ber kher ka tawng fu leh ta chu ka duhlo hle bawk.

Muang chang hian ka lam panin a lo phei a, a che zia ka lo en reng laiin a meizial zuk lai chu vawikhat a hip lut leh kawk a, a thawk chhuah leh ham ham rualin a zial kenlai chu thlang lamah a theh thla zui daih bawk.

School uniform a la inbel tho nain a kamis nghawng a inhawng diai a, a kamis chu bilh lut loin a dah chhuak a, a necktie lah chu awrh loin a chalah a hreng daih a, a sam a hnawk deuh niai bawk nen a sual hmel ngawih ngawih hi ka'n ti khawp a. A mitmu dum fiah tak leh a mithmul te chu a inhmeh viau nain a sual hmel ka la ti tho tho.

"Kawngkhar hi ka hawng thei miahlo ania," tiin ka lo insawi khalh zung zung a, ka kawngkhar vawn lai bawk chu ka pawt leh chiam a, mahse beiseibo mai ani. "Pawt vak vak mah ta che mawle. Chhung lam aṭangin a in kalh anih kha, i pawh zawng te khan i hre ve lo em mawni ?" Ka hnung lam aṭangin a rawn ti a, chu te chu ka hre ve reng alawm le. A sawi dan kher kher lah chuh ! Mawl min tih hmel hliah hliah.

"Min lo hawn sak tak mialin tih thuah anih hi ka pawh vak vak," ka ti ve ta hlak a, hepa nen berkhera kalh hnan ka ni chu ka ṭah a chhuak ṭun thei. Ka huatna ti zual tur tingin min pawt sawn lawp a, kawngkhar chu amah zawkin a sawi dat dat a, rei fe a sawi hnuah pawh awmzia a awm takloh vangin a beidawng ve ta deuh aniang, ka lam hawiin a rawn inher vut a. Ka ngaihbel nge ni, nichin ai mah khan a mitmeng lah chu a rum zawk hian ka hria.

Reiling bawha thlang lam a hawi thlak lai te chuan ka mittui a tling pur tawh a, ka ṭahbelh lutuk chu ka inhaw zawk. Ti nge engkimah hian ṭah hmahruai ka nih ve ziah mai le ? Hmeichhe nunnem lutuk nih tak hi chuh !

"Hetah lo kal rawh. Helai aṭang hian kan zuang thla dawn nia," Dennis-an a rawn tih pawh chuan ka la che chang mai lo, ka mittuiin ka khaw hmuh a rawn tifiahlo zo a, nep ka inti hliah hliah mai bawk.

"Hey," a rawn ti leh a, chutih laiin ka mittui a rawn luang thla zung zung a. Muang changin a lam ka pan phei chat chat a, thui pawh ka la thleng hmanlo. Ka bul a rawn thleng chawpchilh a, "I ṭap ringawt elaw ? I va ṭahbelh reuh e," a rawn tizui a. Chutih rualin kei erawhin thawk ka lo la zui kawk a, chhuak lutukin ka ṭap zui hlawp hlawp mai bawk.

Hepa bula inṭah mualpho hi ka duh dan ani miahlo, ani lo tak tak. Keimah chauhin tang zawk ni ila ka awm a nuamdaih zawkin ka ring.

"Kha mi te vek kha, an mahni an ni chiang lutuk," ṭap chung chuan a ti zuah zuah a. A hnena chutiang ka sawi chhan lah ka hre heklo, ka rilrua awm awm ka sawi ve tawp hi a ni ber.

"Eng maw ?" Ani lah chuan a lo ti deuh haw a, rilru na e tilo chuan ka thin a tirim ṭûn thei nia mawle. "Min hua alawm, min hua a, chu vangin min kalhkhum anih hi," tiin ka ṭap chhuak leh hawk a, ani lah chuan hahthlak min tih hmel deuhin thawk a lo la deuh hawk a. Kan inning ve ve ni ta berin a lang.

Chutah, "Ṭap tawh suh !" A rawn ti deuh hluk a, kei erawh ka ṭap uar zual sawt tih theih tur a ni. "Va han hneawm ngawih ngawih tak !" A rawn ti leh sup a, dak chho hâa ka en chu van vadak meuh hian thawk a lo la a. A rawn hawi thla leh chiah chu chiang lutuk hian min rawn en nghal kal a, a hnaiah phei chuan a mitmeng chu mawi tak a ni.

"Ka hnem che chu beisei miah suh," a rawn tih leh lai te chuan ka ṭap bang hmak tawh zawk. Ka chhanglo, dak vahin a mitah chuan ka melh zui kal a, a mitmeng mawlh chu en nin har tak a ni. A mitmeng mawi tak te leh a mithmul sei sang te chu ka awt hliah hliah.

Chutah, a chala a neck tie hren lai chu a la thla a, ka mita ka mittui chang bang te chu rawn hruk hul a tum a, kei erawh ka ngaihtuahna ringawt ka lo kawm vangin ka phu zawk mai thung. Ngawi reng chung hian a school form neck tie-in ka mit leh biang vel chu a rawn hru mawlh mawlh a.

Ka mittui a hrukna a kut ka vawn hnan lai te chuan duh aiin kan inhnaih mah mah tawh chu a ni. "Tikhan, a zia deuh ang," ka vawnna ngaipawimawh lo zet hian a thil tih lai a chhunzawm mawlh mawlh a, "Khawi keiman," ka ti ve tak nain a thil tih lai a chawl chuanglo.

Ka mit leh ka biang vel a deh hul mawlh mawlh lai chuan a mitmengah bawk ka mit a fu leh chat tawh a, a kut ka vawn hnanna chu ka la thla zui riai riai bawk. "Min hnem i tumlo emaw ka tia," ka tih leh rualin ka mitah tak chiang lutuk hian min rawn melh zui a, a mitmeng danglam ta zawk chu kan inhnaih em vangin ka hmuh hmaihlo nasa mai.

Chutah din ngil pah hian a neck tie chu min pe a, "Nangmahin ti ve tawh rawh," a tihna ni hmiang ka ti mai. Rei deuh chu sir lam hawi veuh veuh chung hian a ding a, a inngaihtuah uluk hmel nasa mai a, eng nge a ngaihtuah tih lah chu ka hriatpui der silo. Biak lah chu ka hreh thar ut ut mai bawk a, ka zak thar thut ni ta ber hian ka hria.

"Chuan," rei fe a ngawih hnuah a rawn ti leh deuh thut a, tih thut thut hi a zia ve reng anih dawn hi. "Eng nge ?" Kei lah chuan ka lo ti deuh he haw a, chutah hawi kualin thawk a han la leh te te phawt a. "Tah sawn," tiin kan hmaa reiling awm chu a kawk a, en pawh min en chuanglo.

"Eng nge ?" Ka tih leh rualin, "I zuang thla ve ngam ang em ?" A rawn tizui leh zat a, "Eng a ?" Ti deuh hluaiin a sawina lam chu ka pan phei a, ka hawi thla chu a lo sang reuh nasa mai a, engtin nge maw kan han zuan thlak teh lul ang le ?.

"Engtin nge hetiangah ka zuangthlak ngam ang a ? A san em hi mawle," lehhawi meuhin ka en ha a, a dar a lo san uk ringawt duh chauh lehnghal.

"Tum chuan kawng a awm an tih ṭhin kha," tiin ka lam a rawn a pan hnai a. "Khu, khu laiah khuan," tiin playground aṭanga inchung pan chhohna step chu a kawk a, ka chiai buai leh nuaih tawh.

"Ka zuang thla hmasa ang a," a ti zo hman ṭawk tihah, "Ka duhlo," ka lo ti nghal hlar a. Min rawn en chiang ta khawp mai. "Ṭah tum hlek suh ! Pir per che hian," min rawn tizui hluk a, ka ṭah khum hrep zawk dawn emaw ni.

"Khawi lo kal rawh," tih leh reiling-a lawn kai chu a rual a, hlauthawng tet tet mah ila thlan tur dang awm chuang heklo le. Ka bana min lo dawm rualin reiling-ah chuan ka lawn liam zui ve mai a, mahse, ka'n ti dawn tak tak chu le, rin aiin a lo sang lehzual a, thli thaw lah chuan ka pawnfen lah chu a chhem leng suau suau a, ka awm chu nuamlo tak hi a ni ringawt.

"Ka ngam lehlo, ti lehlo mai ang," ka ti ta chul a. "I ṭah leh vaih chuan ka theh thla nghal dawn che ania," ka hlau tih ngaipawimawhlo zet chuan a rawn ti leh hluk a. He mihring tluka mipa sual hi an awm leh thei tawh dawn em ni ka ti hial tawh.

"Invuan nghet rawh, ka zuang thla hmasa ang a, ka tih ang zelin i rawn ti dawn nia," a ti zui leh zat a. Zuan thlak mai a tum tawh chu,"Ngawi lawk teh," tiin a banah chuan ka lo vuan leh rih a, min ning tawh ngawtin ka ring. "Ti hian reilo tê awm lawk ang," tiin ka mit ka chhing zui daih a, hahdam tum lutukin thawk ka la zui vang vang bawk.

"A tawk tawh em ?" Kan ngawih zui vang vang hnuah chuan a rawn ti a, ka mit muang changa ka men chhuah chuan ka rilru chawmawlh lutuk te kha a zia ta deuh a, a hma ang em emin ka chiai buai tawhlo bawk. Mahse hnuai lam erawh ka la melh ngam eihlo thung.

"Aw," tih nan ka lu ka bu zui nghat nghat a, ani lah chuan chechang zui eihlo hian min en leh reng tawh a, a hmanhmawh viau khan ka hre si a, nge, a rilru a lo thlak fel leh hman der tawh zawk ?

"Sang i hlau a ni maw...?" A rawn ti leh rih a, "Aih, hlau lo, thlak ka hlau zawk." Ka lo ti chu a ni leh nilo angin a rawn nui chhuak hak a, a nui ve thei ang tih pawh ka rin ngailoh mipa a han nui ve meuh chu keipawh ka ka hau thei hial ni.

A mitmeng lah chu ni dang aiin a nelawm zawk a, a hmaa ka hriat ṭhin Dennis-a kha ani talo emaw tih mai tur a ni.

Ka ngaihtuahna ho lam lutuk chu kan sir lama thawm a awm rualin a tawp nghal hmiah a, kan hawi phei rualin kawngkhar aṭanga Abygail-i lo chhuak zal zal ka hmu hmasa ber a. Ni e, kan Dawzer 1-i a nih loh ten tu nge maw ni tehlul ang le ? A ni tluka min tibuai chak leh helaia min kalhkhum duhtu tur chu a ni chiah hi awm hek.

Dawzer-i lah chuan ramhuai hmu ni mai awma phâwk hian keini pahnih chu min en a, a rawn luh tirha a hlim hmel vei sawng sawng nen. A beiseiloh lutuk a hmuh tel vang nge ni, a rawn luh tirha a hmel kha chu vawm bo ang hmak hi a ni ringawt.

"Nangni pahnih chuh !" a rawn ti teh tawl a, a ṭawng ring vaklo nain ka hre pha ta tho. Dennis-a zawk chu che chhuakin reiling chu a zuan kan zui tharh a, lo inher lehin ka lawn liam tur chu min lo pui ve zui a. Chu te hlei hlei chu kan Dawzer-i chuan mak a ti kher asin. Keini pahnih chu min en tawn leh zak zak ṭhin a, a hmel te hlei hlui saw, a dang var puap tawhin ka hria.

"Ihh..," Dawzer-in a rawn tih leh rual chuan a sawi leh tur nghakin a mitah ka lo en zui kal a, a zam zia chu a mitmengah ringawt pawh a hriat theih hial ani. "Eng nge hetah in tih a ? Lo chhuk tawh ula," nui sang hian a rawn ti a, a zawk zamah chuan a.

"I va thu ve," tih hmuk pah hian Dennis-a chuan a kal pel zui a, inhnuai chhukna lam a pan rualin keipawn ka zui ve nghal a. Mahse Dawzer 1-i chuan ka banah min lo man hman hram a, ka huat tawh sa nen, chu leh lek phei chuan min tithinrim hluah hluah tawh.

"Nang nu te hi," a ti fel hman ṭawk tihah, "Min thlah vat rawh!" Tih pahin ka ban chu ka phih zui lawp a, chet a thawh leh hmain a darah ka nem zui chawrh a, chhuatah laiah a thal zui ṭhuai a, a rawn hawi chhuak leh chuan min rawn melh rum kher asin.

Inhnuai lam panin ka tlan thla zui dawr dawr a, "Hmeli leh," a rawn ti zui leh hram, chhang zui lovin step bula Dawzer 2 leh 3 lo ding pawh chu rang lutukin ka tlan pel a, classroom-a ka bag dah chu la in ka tlan chhuak leh dawr dawr a. Min rawn um zui leh mawlh ka hlau ani.

Gate zawn ka thlen chuan chawl datin thawk ka la zui hlawi hlawi a, ka bag ahin min lo uai ve reng bawk nen, hah namen lovin ka hah ti ila ka sawi sual lovang.

School compound ka chhuahsan achinah erawh muang changin ka kal a, mi kawng kal ka tawk ve zeuh zeuh reng bawk nen ka ngaih pawh a ṭha tawh nangiang mai.

Kawngpui ka pawh chiah tihah, Dennis-an chak deuh mai hian min rawn tlan pel a, a han phit chak em em mai lehnghal a, tu tlan pelh nge maw a hlauh ni ?

In ka thlen veleh ka inbual fai nghal sar sar a, ka taksa lah chu ka tlan vang kha nge ni, a han sil em em khawp a. Inhnuai lam pana ka chhukthlak lai te chuan ka lu a rit bur a, ka pi rawngbawl ka zuk puih hnua ṭhuthlenga ka mu zal chu ka muhil tlang pek a. Zanriah ei dawnah min lo kai tho chauh a, zanin chu eng ka ang dawnlo viauvin a lang.

Zirlai lam pawh en ta lemloin ka mu nghal a, ka lu in lukham a sik rualin ka muhil chu ani zui mai a, zingah lah chuan ka harh hma khawp a, ka tho chhuak chu khua a vawt deuh vur a, tukverh hawnga ka hawi chhuak chu chhum a lo zing nasa mai a. Kawngpui a huh dup danah nizanah ruah sur anih ka ring.

A la hma bawka tiin ka sam phiar ka rilruk a, ka khuih zo darthlalanga ka en chu ka kawng a thleng ti tih tawh a,ka zuahna a rei ve tawh bawka, duh aiin a sei mah mah tawh chu a ni.

Nizan lam boruak anglo takin ka tho zang vah ang lawi a, ka rawng bawl te chu ka phur deuh surh mai a, nizana ka lu rit bur leh luak chhuak ut ut te pawh kha vawm bo ang hmak an ni tawh.

Ka pi leh Ruatkimi lo thawh ve meuh chuan rawng ka lo bawl fel der tawh a. Ruatkimi rawn tho chhuak lah chuan TV remote a rawn chuh nghal tharh a, hla play-in ring zet zet hian a zaipui a, a remote ken lai chu mic anga hmangin, "Tawnmang em ni, tleitir biangno ?" Tiin ring zet zet hian a zaipui a, TV hmaah chuan a ma tawkin a zuang leh auh auh ṭhin a. Keia phurthak ta pheng chuan ka va telpui ve ngawt pek a, ka pi pawh chuan mak a ti deuh aniang, choka aṭangin a ring a rawn fan a rawn fan reng a, mahse, engmah chu a sawi zui biklo.

"Karlehah hian inter-house singing competition a awm dawn a, in class aṭang hian han tel ve thei tur awm ang deuh hlek in awm em ?" Kan class teacher-in a class lak laia a tih chuan keichu kil khatah ka lo ṭhu zum ṭût ringawt a, helam hi chu engmah ka sawi ve theih a awmin ka hrelo. Ka zaithiamlo lutuk tlat.

Mipa lam lah chu an phul deuh hlut a, 'Chumi chu a zaithiam' an tih loh leh, "A thluk mil lovin ka zai thei," an lo ti thul. Sir pawh chuan sawi zawmpui zel chi anni vaklo tih a hrethiam aniang e, zirlai lam a sawi zui leh daih a, tumah hi han rawn tlak leh han thutak khukpui hluai chi ka awm mang bawk silova, a beidawng ve ṭhin viauvin ania ka rin.

Vawiin chu eng ngati ve teh mial nge mawni ? Abygail-i school a lo kal lova, Dawzer 2 leh 3 erawh ka hnung chiah tlarah an ṭhu thung a, pakhat leka an kiam pawhchu ka tan a hahdam thlak hliah hlaih ka ti mai.

Kan mizo teacher a absent vangin Sir Zoreman second period pawh a la tlang a, dar rik aṭangin rei a la ni hmanlo tihah Sister leh nu pakhat la valai deuh mai hi an rawn lang hlawl a, kawngka bul aṭangin Sir Zorema chu Sister-in a rawn ko a, zirlai dang thawm pawh a reh nghal ṭhuap mai.

"Muanpui," tukverh lam ka hawi tawh zet chu kawngka lam bawk chu ka hawi phei leh a, Sir Zorema chuan, 'Lo kal rawh' tih nan min lo hui zeuh a, eng nge maw ni leh ta le ? Tihsual ka nei leh ta emaw ni ?

"Keimah maw ?" Ka tih deuh haw chu a lu min lo buk khum nghat nghat a, muang chang hian an lam chu ka pan phei chhat chhat a, "Office-ah min lo zui phei lawk ta che," Sister zawk chuan a lo ti a, peihlo rilru viau mah ila tih theih dang awm heklo le, principal office-ah bawk chuan kan inzui lut leh ta.

"Muanpui, Abygail-i i hria tiraw ?" Ka din zum zât laiin kan principal chuan a rawn ti a, eng nge maw ka hlauh em em ni, ka phu zuk thei nia mawle. Em em ṭhin hian a.

"Aw, hria e," bahlah eihloa ka chhang thei chu mak ka ti zawk a, ka inchhuang rilru viau bawk.

"Anu ka nia," nichina Sister lo kalpui khan a lo ti a, ka lu ka lo buk khum nghut nghut ringawt. Nge maw kei min koh teh daih le ? Kan Dawzer-i hian dawt a lo phuahchawp leh tawh zawk emaw ni dawn ni ?

"I inkawm ṭhin em ?" Sister zawk chuan a rawn ti veleh a, ka lu ka thing zui nar nar thung. "Aih, kan inkawm tawh ngailo," ka ti chu min rinloh hmel nasa mai. "Chuti maw ?" Rin ang ngei ngeiin Aby nu chuan a rawn ti a, engtiang pawn min ringin min ringlo mahse ka tan awmzia a awmlo. Thu dik alawm ka sawi, engmah hlauh tur ka neilo ka ti ve tlat.

"School kan luh tirh vel kha chuan kan inzui ve ṭhin, mahse kan inkawm tawh ngailo," ka ti zui leh zat a. Engmah an sawi zuilo nain Aby nu chuan min eiloh hmel kher mai.

"Niminah intihbuaina deuh in nei em ni ?" Principal bawk chuan a rawn ti leh a, ti nge maw tiang hi min zawh vak vak le ? Eng emaw tak chu diklo a awm chiang a ni.

"Nei hranlo e, ti nge ?" Ka tizui ta daih a. "In neilo chiah maw ?" Dam thlup si hianaa rawn tizui leh a, ka ṭanna ngaihah char char ka la ṭang reng bawk.

"A ding ṭha hle hle lai i lo nam thlu ani awm a, eng nge tah chuan sawi tur i neih le ?" A rawn ti leh chiah chu ka phâwk tawh khawp mai. A ding ṭha hle hle lai maw ? Ni e, nam chu ka nam ngei alawm, mahse, a ding ṭha hle hle lai chu anih bik miahloh kha.

~ End of Chapter-5 ~