M. Ch-1

MAMPUI
~ Andréa

Are we a moment or
a lifetime ? ⁀➷

Chapter-1

Vau thla, ni hmasa ber a ni a, kan in varanda railing bawhin ka mit ka chhing siar siar a. Tlai lam thlifim rawn thaw heuh heuh rengte chuan min âwi ni ber hian ka hria. Ka muhil lek lek tihah chuan ka phu deuh zawk a, ka meng nghal kâwk bawk nen ka ṭhutna chair chu thawhsanin inchhung lam ka pan ta daih a.

Ka mutchhuak a la awm vang nge ni, ka lu lah chu a rit bûr lehnghal a. Tha a thô duhlo khawp mai. Inchhung ka luh chuan chokaah ka nuin rawng a bawl mêk a, puih tuma ka kal laiin pangpar tui pe turin min tir ta zawk a. Inchung lam panin ka chho hnâ hnâ a, inchung varanda-a chhuak pheiin chhuta pangpar tui pekna chu ka la a, bathroom lamah luhpuiin tui ka dawh nghal zat a, kawngka biang nghengin ka tui dawh chu ka nghak a. A rei duh reuh phian mai lehnghal.

Ka tui dawh a khah rual rualin varanda lamah ka chawi phei nghal a. Ka nu pangpar leh thlai ṭhenkhat ho tui ka pe nghal zung zung a, tlem lua an nilo nain ka pe zo hma khawp mai. Rose par ṭhenkhat chu ka thuin ka cut ve ngawt pek a, ka tisual êm lo ang chu maw...

Ngaihtuahna ah thil dang a awm takah chuan ka mutchhuak pawh a reh ve ta deuhin ka hria. Ka lu rit bûr mai pawh a zia ve telh telh a, ka hriatloh karin khua pawh a lo thim ti tih tawh a, chuti taka pangpar ka lo buaipui khu ve chiam chu mak ka inti zawk dâwn dâwn a. Hetiang lam hi ka peih zawng ni ve heklo le...ka nu tak phei chu ka tihpui ngailo hrim hrim zawk a. A changa tui lo pek ve chauh hi a ni mai ka buaipui ve ṭhinna chu.

Zanriah ei hmain ka pi leh pu te nen phone kaltlangin kan inbia a, nutein pasal a neih aṭanga nupa rek chauha awm an nih tawh vangin ngaihtuah an na duh hle a. Tar chhe lutuk leh, che theilo an ni hranlo nain zunthlum leh eng ilo an neih veleh neuh neuh ṭhin vang hian ka ngaihtuah ṭhin khawp mai. Ka piin zin chho turin min sawm châmchî reng a, an khawhar ruk tur zia ka ngaihtuah thlen phei chuan an bula zin chu ka chak ru khawp mai.

Ka nu te khua hi Serchhip district lam daih a ni a, motor rui nasa chi ka ni bawk nen, ka nu thih hnu aṭang phei chuan ka zin zen zen tawh ngailo. Ka kal hnuhnun ber kha chu high school ka kal lai daih a ni tawh a, class 9 ka nih lai, first term exam chawlh kha a ni nghe nghe. Kha bak kha chu ka kal leh ta miahlo a, nutei te inneih takngialah pawh ka kal ve ta lo kha a nia. Hnai têa awm a nilo vei nen, lânga han kal phei chu ka peihlo bur zawk.

"I nutei te nupain chaw an lo ei phei dawn a, hei, ar kan kang ve hluah mai keini pawh," ka piin a rawn ti siam siam a. Nutei te nupa tal, tlawhpawh tura an awm chu a tihzia zawk. Ka sawi tawh em awh...tuna ka pi leh pu ka biak mek hi, ka nu, min hringtunu ngei nu leh pa te an ni a. Tuna ka nu, min enkawl mêk tu erawh hi chu ka pa nupui, ka nuhrawn mai zawk a ni a. Ka nu boral hnuah ka pain min enkawl turin a la a, chu aṭang chho vela inchhar chho chu an ni âwm e.

Ka tet deuh lai chuan ka pa hian a sawi ve fo a, ka nu a ngaih ṭhin thu hi. Kum kaw (9) mi lek ka nih laiin ka nu in nat lâwkna pawh awm miahlo in zan khat thil thuah min boral san a. Ka pa sipaia a ṭan lai anih vangin, kan nufa tê chauhin inah kan awm a, ka pa pension a tum lai kha a ni nghe nghe. Zana tui taka ka mu chu, nidang ang bawkin dam takin zing ni chhuak hmu turin ka tho chhuak a, ka nu erawh, tho chhuak tur a awm ve tawhlo. Kha zân kha ka nu aw ka hriat hnuhnun berna tur ani tih hre ngat ila chuan, siamtu hnenah kha zan kha chelh ding turin zankhua khan ka ṭawngṭai ngei ang.

A hna bansana, a nupui leh a fanu kianga awm ve reng tawh tura lo haw tum khan, a nupui ruang thlahliam tur zawkin in lam a rawn pan ta si a. Ka ngaihtuah lêt zawng ringawt pawn, kha inthlah liamna khan chhungril lam thlengin min la fan thei hialin ka hria.

"I zirlaite kha i zir ṭha maw ? Mipa buai te khan i lo buai ve ang e, kan la phallo ania," fiamthu ti tak deuh hian ka pu in a rawn ti a, ka lo pha nasa leh lutuk chuan a nuih ka ti za zawk ani ang, a ni leh ni lo angin min nuih kur kur a, ka pi leh pu hlim nui ri mawlh chuan min tilawm a ni.

Exam chawlh veleha zin turin kan inthlah a, keipawh ka room chhuahsanin inhnuaiah ka chhuk thla a, ka nu chaw ei lo siam mawlh mawlh ka hmuh rualin ka pui ve nghal thuai a. Ka pa erawh TV-ah mizo film enin a ṭhu tui khawp mai.

Chaw ei tura ka va koh hnuin, ngawi rengin chaw kan ei mial mial a. Keini chhungkua ve hi zawng, kan awlsam ang ang hian sawi tur kan pâi tlem thei khawp a, ka pa nen ngat phei hi chuan, kan pahnih reka awm chi kan nilo hrim hrim. Dawr chungchang an sawi leh zeuh ṭhin tihloh ah chuan tumah kan ṭawng lemlo. Nidang ang bawkin ka tho hmasa tharh a, silhmun lam panin ka kut ka sil sawk sawk a, an chaw ei chu sitting room lamah ka phei san ta daih a. TV chu ka hmet sawn nghal zat bawk.

En tur ber pawh hrelo in ka hmet kual ka hmet kual a, a tawpah 'The 12 dancing princess' ka hmet chhuak ngawt pek a, en ngun tawh viau mah ila he movie zet hi zawng ka en ning thei thlawtlo. "Puii, vawiin chanchinthar lam an chhuah lo maw ? Han zawng chhin teh" ka pa chaw ei kham chuan a rawn ti a, 'Puii' tih hi chu hman aṭanga min koh ve dan reng a ni.

Anin 'Puii' min tih laiin ka nu erawhin 'Muani' min ti daih thung a. Ni e, ka hming hi Lalmuanpuii a ni miau a ni. Ṭhenkhatin 'Puite' te min ti a, school lamah erawh 'Muanpui' tih hlirin min ko ṭhin thung. Ka nu, min hringtunu erawh kha chuan ka hmingin min ko phal ngailo. Chiang takin ani nena kan hun hman tawhte kha hre thei tawhlo mah ila a aw leh a hmel erawh chiang takin ka la hre thei tlat a ni.

Youtube aṭanga chhuakin channel pangai ka hmet chhuak nghal a, ka pa en turin chanchinthar ka hmeh chhuah sak a, kei erawh ṭhu muangchang lovin choka lam ka pan phei daih thung. Kitchen island chunga ka phone dah chu banin hla ka play a, approne hrengin thhleng chu ka sil nghal mawlh mawlh a, ka nu erawhin dawhkan a hru fai thung a. Thleng ka sil mawlh mawlh laia ka nu in hmun phiah mai a lo tum chu ka lo phallo nasa mai a. "I damdawi kha lo ei vat vat zawk rawh, i theihnghilh leh ang e," ka tih chuan ṭha deuhin a ei veleh mai a.

Ani pawh hi a chhul lam ṭhatloh vang hian nitin damdawi ei ngai reng a ni a. Motor leh two wheeler han chuan rei phei hi chu a harsat a, a changin a thi pût reh theilo khawpin a awm leh zeuh zeuh ṭhin a. Tun thlenga ka pa nen fa dang an la neih theihloh chhan pawh hei vang hi a ni pakhat.

Thleng ka sil zo, inchung lam pan ka tum ûk tawh chu ka pa in min lo biak leh si vangin ka ding kawi leh ta hrûtt hrût a. Kan final exam chungchang min zawh vang nge ni, ka ṭang mar ut mai lehnghal. "Engtikah maw exam in ṭan dawn a ?" A rawn tih chuan thla tawp lama kan ṭan choh tur thuin ka chhang ṭha ve mai a. Inchung chohna kai lawnah ka pen chho nghal zat bawk.

Exam hnaih tawh vangin dar 1 thleng lehkha ka zir ve ngei a, mitkhap a sak ṭha duh ṭalh ṭalh khawp mai. Ka tithei tawh thlawtlo chu ka mutsan ta ngawt a, awih chawp pawh ngailo in khum ka thlen rual rualin ka muhil chu a ni nghal der mai.

A tuk zing ka tho chhuak chu thu thinṭhawng deuhin min lo hmuak a, ka pu, ka nu pa chu tukin dar 7 bawr vel khan a boral tih thu chu a ni. Nutein ka pa a lo phone lai chuan dar 8 a ri thuak tawh a, stroke vang an ti a ni awm e, a rang khawp mai.

Chu thu min hrilh laia ka pa hreh hmel mawlh chuan ka lung a tichhe zual a, insiam tura inchung step ka zawh chhoh lai pawn ka ngaihtuahna a mumal meuhlo a, ka kalna leh ka rah tur tak ngial pawh ka hre mumal tawhlo. Mahse ka pindan ka han lût a, ka khum ngeia ka han ṭhu ta erawh boruak a dang ta zar mai. Ngaihtuahna a fim ṭan a, rilru in ka pu boral thu a hre ru rauh rauh a, ka inrin hman hma hauhin ka biang a rawn lum thla pap a, ka ṭap chu a ni zui nghal mai.

Ka ngaihtuah chian poh leh ka lung a chhe zual a, nizan lawka ka biak, min hmuh nghakhlel em em tu kha tukinah erawh mihring ni tawh loin mi ruang mai ani tawh tih ka ngaihtuah thlen rual chuan ka mittui a rawn sur leh zung zung a. A kal tirha ka pi rilru chiai taka a awm tur lai mawlh nen, ka lung an tizîng takzet a ni.

Ka pain chhuah hma a rawt vangin chawhma lamah ka nu te khaw lam panin kan inkhalh chhuak a, chhiattawh thil anih miau vangin inrin lawkna awm heklo le, ka nu pawh a hriselna lam ngaihtuah hmanlo lêkin motor-ah a chuang ve ta ngawt a. Ngaihtuah rilru viau mah ila, tih theih dang awm heklo le.

Pangpar dawrah pangpar leiin kan ding zawk tihloh ah chuan ka hriat theih chinah kan ding ta miahlo a, ka zin chhuahlohna a rei veleh ta deuh bawk nen, motor chu ka rui nasa leh tawh khawp mai. Vuina programme nan hmanloh hlauin ka pa lah a hmanhmawh nasa tawh bawk nen, keia motor lo rui buai ve chhen pawh chu a hreawm takzet zawk.

"Din i duh em ? Kan thleng ṭep tawh ania," rawn leh hawi zawk pahin ka pa in a rawn ti a, ka nu erawh a muthlu nasa hle tawh. Ka duhlo tih lantir nan ka lu ka lo thing nar nar ringawt a, ka ṭawng peih tawh meuhlo. Chakna min pe tura ka thil ei ve zawng zawngte kha ka luak chhuak vek tawh miau a ni. "Khaw dâi kan thleng tawh ania, i luak tawh êm lo ang chu," ka pa in a rawn tih leh rualin a tlan chak zual sawt a. Kei erawh, luak chhuak hnûr, luah chhuah tur nei tawh silo, chau lutukin seat hnung lamah ka ṭhu zawi nguai ringawt tawh.

Thlen dâwn tawhah ka lo chhing ve sek aniang e. Ka nu in min rawn kaihthawh chuan ka harh ve ta chiah a, ka muttui tui nen, ka lo ui ru khawp mai. Ngati nge ka ruih hma zawngte khan mutchhuak khan min rawn zem daih tawhloh ni ?

Ka pu te inkawt taka din a remloh vangin ṭhenawmte in sirah zawk ka pa in car a hung a, ka pu te in lam pana kan inzui phei lai chuan mi pawh an lo ṭha hnem reuh khawp mai a. Inchhung lama ṭhutna changlo, pawna lo ṭhu pawh an tam ve fu a, rin ai takin kal pawh an tam khawp mai.

Chhung hnai vai kan nih vangin inchhung lam kan pan tlang nghal a, luh chiahah choka a nih vangin sitting room lam pana ka pa kal chu a hnungah ka nu nen kan zui ve a. Sitting room ka va thlen phei chuan ka pu kuang chu ka pi leh nutei te nupa in an lo kil ve ṭhap a, ka pi hmel ka hmu chu mittui a hnai nghal kuarh theiin ka hria. A chauh hmelin a bawr chhawr hle a, a hmel awm danah chuan a ṭap nasa hle tih pawh a hriat nghal theih. Hetiang kum tawha ka pu a han chân ta mai chu tawrh thiam har a ti viauin ka ring. Kum tamtak chhung pasala a lo neih tawh leh a kawppui a ni miau a.

"Bawihte, i pu khu en teh," an lam pana kan kal hnaih laiin min ban rûak chungin ka piin ṭap ti tih chunga a rawn tih chuan insum har tak ani. Ka pu hmel ka hmuh leh ngat phei chuan ka pu anihna ah ka khawngaihlo theilo a, chung zawng aia khawngaihthlak zawk chu ka pi hi a ni. Kawppuite chân chu dâr lehlam sathlak aia na zawk ani tih an sawi hi ka hre ve fo tawh a, ka pi aṭang hian ka hre chiang lehzualin ka hria. A la sûn dawn choh tih ka hriatchianna te hlei hlei hian ka pi ka khawngaihna a tizual a, ka pu chu lo tho leh thei mai se tihna rilru ka pu hial a, ka biangah ka mittui a rawn far thlak fap rualin insum hman miahloin ka ṭap chhuak ta hawk a. Ka pu rual chu ui lutukin ka ṭah khum a ni ta ber.

Ka pi ṭap pawh chu ka buaipui hleithei meuhlo, nutein kuah betin an ṭap dun tih erawh ka hria a. Kei erawh keima buai buaiin ka buai ani ta ber. Rilru mumal ka pu theilo a, ka mumang ni a, harhchhuak thut tur ang tein ka suangtuah thul, mahse chu erawhin awmzia a nei thui meuhlo chu a ni.

Pastor-in vuina thu a sawi mawlh mawlh laiin, putea te chhungkua an rawn thleng a, chu pawh ka piin a lo ṭah khum leh chiam a. Keipawh ka mittui a tling ṭeuh reng a, putea pawh chu rilru tâwt ṭun hmel hi a pu a, ka pu biang tawkin a en vang vang a, a pa ve ngawih ngawih ṭhin kha a ni miau a. A ui ve hle in ka ring.

Rei pawh awm loin pawn lamah a chhuak zui a, pitei erawh Ruatkimi leh Sangsanga te nen ruang an rawn kîl ve a, Ruatkimi pawh a ṭap ve nasa khawp mai. Ruatkimi leh Sangsanga hi ka putea fa, ka unaute an ni a. An chhang a inkhât hle a, Ruatkimi highschool kal rual anih tawh laiin Sangsanga erawh naupang chhia lek a la ni a, thil awmzia tak tak pawh a la hrethiam fumfe lo.

Hmeichhia kan rual ve bawk nen, ka pu kuang an chhin dawn meuh chuan ṭap ri pawh a ring ṭha khawp mai. Chhungkaw khai dingtu ber, pa ber a han boral tâk meuh chuan uilo mang kan awmlo ti ila a suallo ang. Ka pi phei chu a thaw ṭha hleithei meuh tawhlo, a âwm dawmin thawk a la leh deuh kawk ṭhin a, ka en apiangin ka lung a zing zual tulh tulh a, thihna zet hi zawng, a tawp ve chiang êm a ni.

Ka pi rin aia a buai tak vangin ruang pawh kan zui ve talo a, ka nu leh pa erawhin an zui a. Ruatkimi te pawh an kalin ka hria. Nutei nen ka pi kan awmpui laia Nu Kimtei lo lut hlawl chu phâwk deuh hian ka lo en a, an rawn thlen lai ka hrelo nge ni, vuina hunserh chhung zawng khan ka hmulo a, an lo thleng ve chiah anih ka ring.

Nu Kimtei hi ka nu chhang chiah a ni a, Kolasib lamah pasal a neih tâk vangin kan inbia in kan inhmu zen zenlo. A pasal hi bank manager hna chelh lai mêk a ni a, fanu pahnih leh fapa pakhat an nei tawh a. An milai, U Zualtei pawh a lo kal ve nghe nghe. An upa ber U Amuani erawh, phaiah lehkhazira a awm daih vangin a lo tel ve thei ta lo a, an mipa neihchhun leh an pang ber chungchang erawh ka hrelo thung.

"Fabian-a chu kan hruai tel talo mai anih kha, an exam lai a ni si a, a ni te in lamah a awm phei tawh mai aniang chu," Nu Kimtein a ti siam siam a, a khât tawkin ka pi kut chu a khalh leh niap niap ṭhin a, ka nu chhangtu chiah anih vang nge ni, ka nu nen inan na riau an nei bik hian ka hre ṭhin.

Fabian-a hi kei aiin kum khatin a nau zawk a, a class ang zawng erawhin kan inrualin ka hria, ka hriat sualloh chuan. Nutei sawi dan takah, naupan lai aṭang tawha mahni tawka inla pa ve riau chi ang kha a ni a, ka hmuhlohna a rei tawh nain, a mizia tur awm ang chu ka dâwn thiam nghal ruak a, hmeichhe zinga tal hrut hrut rengte kha a duhlo bik tlat ṭhin a nih tak kha.

"Lehkha zir ṭhat nachang pawh hi a hrelo, a zir duh chuan thiam thei deuh tur mawle. A rilru chaklo zawk a u lah hian a zir peih em em a, a u zir chanve pawh hi a zirlo ang. Unau ro roah pawh a lo inan loh theih dawn anih hi. Kan Fabian-a ve hi zawng, hmeichhe ngaihsak siloah chuan a zir peihlo pawl tak mawle. A pa bulah bike a ngen ve tlat lehnghal a kha, ka phallo chung an lo inleisak a, a fawr fua fua ringawt a, engmah hlawkna a awmlo. Nih tumte hi a nei ve pawn ka ringlo ania," Nu Kimtei bawk chuan a ti leh hlak hlak a, a beidawng viau ania nge, "Duh leh workshop te siam sak ila, bike chhia te siam vel mai mai se, lirthei a lawm khawp alawm," a ti leh ta ngawt a. An mipa neihchhun chu a innghahna tlak dawnloh riauin a hria te pawh ania nge.

Ka pa te an lo lêt leh hnuah inchung lamah ka chhoh san a, ka pu te in hi an sakna a rei tawh nain, ka nu thih hnu deuh lawka an thawn ṭhat nelnual vangin a la ṭha ve hle a, thing hmâng vek ani nain a la tlo khawp mai. Inchung pindan, kawngpui lam hnaih zawk chu ka hawng ve thawr a, pindan lian lutuk lo, tukverh pahnih awm hi a ni a, lutin kawngpui lam zawka tukverh awm chu ka hawng a, hawi chhuakin kawta mi awm deuh huang leh kawngpuia motor tlan leh zeuh zeuh ṭhinte chu ka en dauh dauh a. Ka pi te in hmun hi zau lutuk anilo nain, kawtah hian te lutuk ni silo in pangpar leh eng ilo chinna tur hmun a awl ve nual a, ka pi pawhin thlai a chîng ve nualin ka hria.

Kawt aṭangin in a sang chho deuh euh a, in si lek lekin pangpar a inphun ve far tih chu inchhung kan luh dawn khan ka hmu tawh a, in lian tak a nilo nain a lang mawi ve khawp chuan ka hria. In leh a vel hungin thing hmanga siam gate, âwm chen vel tur hi an siam a, a var rawng anih vangin a lang thianghlim ang reng viau a, mahse a bal chak duh reuh viauin ka ring.

Tukverh chu kharin khum bula tukverh chu ka hawng ta zawk a, hawi chhuahin ṭhenawmte in a lang thei nghal a, kan in leh an in inkarah thingkung pakhat tê hi a ding a, chu erawh tukverha hawithlak chuan a hmuh theih chang chang thung, tukverh lehlam aṭang zawk khan a chiang zawkin ka ring.

Ṭhenawmte in chu concrete in a ni thung a, a sen duk rawng deuh niin chhawng hnih ve tho niin ka hria. Tukverh chu khar leh ta chuanglo in khumah chuan ka mu thla hnawk a, ka chau ve deuh nge ni, rei loah ka mit ka chhing siar siar a, mutchhuakin min rawn zem rualin ka muhil nghal chu a ni tho thang.

Engtia rei nge ka mut ka hrelo, thâwm ri deuh nak nak hi ka hria a, ka men chhuah rualin khua a lo thim chhulh tawh tih ka hre chawpchilh a. Khuma ka ṭhut chhuah laite chuan ka lu a rit bûr hian ka hria. Tho chhuakin light on na tur ka dap zui rak rak a, ka hmuh maitheih loh vangin ka phone flash light chuan ka ên kual a, a tawpah ka hmet fuh ve thei ta hrâm e.

Tukverh chu khar ṭha lehin parda han zarthlak leh mai ka tum chu tukverh zawna ṭhenawmte tukverh awm ve thoah chuan mipa ruang am ni awm tak hi ka hmu zui a, parda pawh zar thla ta lemlo chuan ka en zui ta reng a. Lehkhabu a chhiar niin ka hria. Parda in a zar hliah vek karah chuan chiang tak chuan ka hmu theilo nain mipa a ni ngei tih erawh ka hria a, a chetla vel chu eng emaw taka hmuhnawm tih rukna ka nei a, zahpui awm ka inti rilru khawp mai.

Rei pawh en duh ta loin parda chu ka zar thla a, light chu off leh thlapin inhnuai lamah ka chhuk chat chat a, mi lo awm nuaih nuaih ka hmuh chuan ka nu ka zawng ru deuh a, ka hmu mailo lehnghal. "Muanpui, chaw i ei tawh em ?" Rawn ti tu chu ka nutei a ni a, ka la eiloh thu a ka chhang chu, "Choka lamah va phei rawh. I nau te pawn an ei mêk kha," tiin ka pi room lamah a phei zui a, keipawh choka lamah chuan ka phei zui ve mai bawk.

A sawi ang tak takin Ruatkimi leh Sangsangan chaw an lo ei mêk a, U Zualtei pawhin a chaw ei tur a lo buaipui ve mawlh mawlh bawk a. Nu Kimtein min lo koh tâk vangin gas bula a ding chu ka pan phei a, "Chaw ei ve rawh aw," a bul ka thlen phei rual rualin a chaw hmeh chhuan lai chawh mawlh mawlh pahin a lo ti a. Ka lu ka buk nghat nghat rualin dawhkana thleng chu ka la ve thuai a, keimahin ka inbuaipui zui ve mai bawk.

Ruatkimi sirah ṭhu thla in chaw chu ka bar zui mawlh mawlh a, ka ei châk loh ang aiin ka ei hnem phian lehnghal a, ka bula Ruatkimi te unau ṭhu pawh chu an ei tui ve viau nge ni, an ei rei tawh khawp mai. Chaw ei kham veleh tih fel ngai ang ka tih fel pui zung zung a, midang ei leh tur an la awm nual vangin tihfel tur a lua a awmlo.

Sitting room lama ka va phei ve chuan inleng an lo la ṭha hnem khawp mai. Puitling an nih deuh ṭhem ṭhum vangin ka awm ve na chi ah pawh ka ngai ta lo, ka nu leh pa ka melh ru deuh nain an vang khawp mai a. Pawn lamah chhuakin ka hawi kual a, pa ṭhenkhat ho zinga ka pa che tla chu ka va hmu ve tak nain ka va pawh zui ta lemlo. Ka nu ka hmuh ve tâk siloh vangin ka pi leh pu pindan lamah ka phei leh ta ngawt a, ka nu chu a lo awm ta ngei e.

"Chaw i ei tawh em ?" Min hmuh rual rualin a lo ti a, a bula ṭhut thlak pahin ka ei tawh thu in ka lo chhang ve mai bawk a, ka nutei te pahnih an awm ve bawk a, pitei pawh a awm ve nghe nghe. "Ka pa a awm tawh silo a, ka nu hi ka ngaihtuah ru khawp mai. Zamtei lah pasal nei tawh a ni a, va awm phei ngawt kha a tih chi dawnloh nasa mai si a, Kolasib lamah ka hruai thla ve mai dawn em mawni ka ti deuh," kan ngawih ṭhap laiin Nu Kimtein a rawn tichhuak phawng a, a ngaihtuahna chu ṭha ka tihpui viau nain rilru tibuaitu pakhat a la awm. 'Ka pi hian a duh kher ang em ?' tih hi a ni.

Lo duh ta pawh ni se, a ni ang tar chaklo lam tawh chu rei tak chhung motor han chuanpui chi zia zang a nilo, a lo thei ta anih pawhin a ngaihtuah awm viauin ka ring. A ruh lang râwta sawi dawn chuan, ka pi aiin ka pu kha a hriselin insawiselna neuh neuh a nei khât khawp a, amah zawk khan ka pi damlo leh eng ilo vel a buaipui zawk ṭhin kha a nia. Mahse mihring hma hun hi rin ang ngawt a lo nilo tih chu kan hre tlang vekin ka ring, kan rin anglo hlir mai hian thil a thleng emaw tih mai tur zawk a ni.

"Nia, chu tak chu kan ngaihtuah ṭhat a ka hria. Ka u te ho lah han awmpui thei zia zâng an nilo a, kei lah mi mo ka ni tawh bawk si a, Robert-a lah hna nei a ni a, pu te lam thulo chuan a awm hmun a sawn ngawt thei silo. Awmpui te hi kan la zawk mai dawn em maw ni," Nutein a rawn ti ve dap dap a, a ni hi zawng unau zingah pawh a pang ber leh upat lam fa lek lek a ni a, pasal a neihna pawh a la reilo, nikum kum tir lawk chauh kha a ni.

"Ni e, chutianga va awmpui chawt thei i ni tawh silo, mo nih tawh chuan inchhungah tih tur i nei ve zel zul ang a. In pa lahin makpa chhungkhunga awm ngawt a duhin ka ring dêr silo, ka nu zawk pawh han awmpui dawn ngawt ula, indang in la nilo a, i nu leh pa hmaizah pawh a na lutuk ang. Nangmah zawk kha nuam tilo deuhin i awm zawk ang tihte pawh a hlauhawm." Pitein a rawn ti chu dik ka lo ti khawp mai. Hmeichhia hi chu inchhungkhurah ka mawhphurhna a sang em mai pawh a, chhungte va tlawhpawh reng pawh hi mo nih tawh chuan a mawi tawhlo tlat a ni.

"Ka nu thute pawh kan ngaichang ve phawt ang a, mahni ngawta ro lo rel ringawt chu a fulo ang. Ka nu hi chuan duh dan tê te hi a nei ve reuh a, a buaithlak chang hi a tam ania," Nu Kimtei bawkin a ti leh charh charh a, kei erawh ka nu nghengin ka ngawi reng ringawt.

Nu Kimtei chu a phone a rik tak vangin a tho thuai a, room chhunga ṭhuthleng pakhat kan hun chunga a bag awm chu a va hai rak rak a, a phone a lakchhuah rualin call chu a la nghal thuai bawk.

"Hello," tiin a ngawi zui vang vang a, ka nu te chu an ti ti zawm leh mai laiin kei erawh ka ṭhut ngai rengin ka ṭhu a. Nu Kimtei phone hmang chu ka en leh zeuh zeuh ṭhin bawk.

"Lalremsanga chu a insual a maw ?" A ti ta hluk a, ka lo bengkhawn rang teh asin aw... "Engah nge chutiang tea a lo khawsak. Tîm miahlo khan lo vaw er zawk ang che. Ka kham zo zai tawh lutuk," a ti leh hlak hlak a, kan lam panin a lo phei mêk bawk.

"He laiah rilru buai em emin kan awm a, a ni tal kha chuan buaina lo siamlo teh se," a ti zui leh zat a. Fabian-a chu a insual em maw ni dawn ni ?

Eng eng emaw sawiin an inbe zui a, Nu Kimtei lah chu a han thinrim em em khawp a. "Lo vaw hreh miah suh," a khat tawkin a ti deuh reng a, kan Fabian-a chu a awm ṭha duhlo viau anih ka ring.

"Kan fapa ve hi zawng, a hahthlak bet bet a nia," khuma rawn ṭhuthlak leh pah chuan a rawn ti deuh halh a, "Fabian-a chu a sual viau em maw ni," ka ti deuh.

"Eng nge ni a ?" Nutei lah chuan ngaihsam hmel zet hian a lo ti a, ka nu chu ngheng tawhlo in ka ṭhu ṭha ve nghal thuai bawk. "A lo insual leh pek anih kha. Tu hi nge mawni a chhun ni ? A pa a han zaidam tehlul nen," Nu Kimteiin a tih leh lai chuan thoin ka chapal ka bun sawk sawk a, room chu chhuahsanin sitting room lamah ka phei a, inleng an lo la awm pharh pharh nain pawn lamah erawh an thawm a la ṭha khawp mai.

Inchungah chhovin inbual ka rilruk deuh a, mahse ka thawmhnaw zawng zawng car-a a la awm vek vangin inhnuaiah ka chhuk leh rih a. Ka pa ka zawng ka zawng nain ka hmu miahlo lehnghal. Pawna ka chhuah chuan puitling deuh ṭhuau an lo awm a, ka pa ka melh ru reng nain a vang khawp mai.

"Pute, ka pa i lo hmu em ?" Tiin gate bula ka putea lo ding chu ka zawt ta ngawt a, "Ṭhenawmah sawn a awm maithei, va en chhin teh," a hawi kual vut vut hnua a rawn tih takah chuan a sawina lam panin ka kal thuai a, kan ṭhenawmte in chu tukverh aṭanga ka hmuh theih in ngei kha a ni.

An gate chu a inkalh lemloh vangin ka lut tlang thawr a, an kawngka pawh chuti tho. An inkawt velah pawh chuan mi an awm ve nual a, kan chhiat tawh vang anih ngei pawh ka ring.

Inchhung ka luh chuan ka pa ka zawng hmasa ber a, mahse ka la hmu ta chuanglo. Let leh mai loin ka hawi kual a, an sitting room ni awm tak ka hmuh chuan chulam chu ka pan vat a, ka pa pawh a lo awm ta ngei e.

Pa pakhat nen thingpui no dawmin mûk deuh hian an lo ti ti a, va biak buai pawh ka inthlahrung dawn dawn alawm le. "Pa," ka va tih chuan rang deuh hian min lo en a, "Thawmhnaw lak ka duh a," ka tih leh chuan, "Min lo nghak lawk rawh," a rawn ti ṭha ve mai a. Emg khaw set set loin a sirah chuan ka ṭhu thla ve hmiah a, an thu sawi zawh hun chu ka nghak a ni ta ber. "Hei i fanu kha elaw," ka pa ṭhianpa ka ti dawn nge, a biak pa chuan a rawn ti a, min en pah reng bawk. "Nih hi," tih pahin ka pa in ka darah a rawn beng thak a, a thingpui in lai chu a tlak nghal pap bawk.

"Muanpuii kha em ni ?" Chu pa bawk chuan a rawn ti a, min la en reng bawk nen ka lo bu nghat ringawt. "I nula ve tawh hle mai a, i hmel pawh a ṭha, i nu i chhun a nih dawn kha," a rawn tih leh chuan ka lai dâwn dâwn alawm le. "Nia hei, pawl sawmpahnih a ni ve ṭep tawh a, a nula ve tawh khawp a nia," ka pa in a tih lai te chu awm dan tur a vang duh khawp mai. Ka ni deuh hu hian ka hre tawh.

"Pekhlua te nen in inpawl rual a nih dawn chu, a ni pawh pawl sawmpakhat a zir mek alawm," a rawn tih leh chuan ka lo bu nghat nghat ringawt a. "Pekhlua" a tih pawh chu ka hre chuang hleilo a, han sawi mai tur ka haihchham riau lehnghal. "Anih, kan va phei ang e. Thawmhnaw lak te kan la ngai si a," ka pa bawk chuan tih pahin a tho zui tharh a, keipawh chu ka ding chhuak ve mai bawk. "Sawtah in innghat nghal lo em ni ?" Lo thawh chhuah ve pahin chu pa bawk chuan a rawn ti leh a, "Nghat nghal dawn e. Motor-ah bungrua kan la dah pek alawm mawle," ka pa pawh chuan a ti ṭha ve mai bawk a. "E...chutiang anih te chuan, Bawihan va lakpui sela a ni mai alawm. Nang zawng la ṭhu rih teh, sawi tur ka la ngah ania, he bak chu hun thawl a awmlo palh ang e." A rawn ti sam êt a, tu Bawiha nge a sawi leh tak ni ?

A eng amah kan sawi ve leh hma in 'Bawiha' a tih chu a au nghal lang lang a, choka lam aṭanga mipa lo lût hlawl ka hmu chu mak ka ti kher mai. A hmelṭha lutuk tlat !

A sam chu kir tih tur chiah ni siloin a kawi deuh chiai a, a mitmeng a nalhin a hnar ngul pawh a mawi khawp mai. A vun, hang lam aia ngo lam pawl lek lek chu a t-shirt var hak lai chuan a kâp eng lehzual hle a. Zêp miahloin a hmel chu a ṭha chiang a ni. Zêp pawn a ṭha vel vek tho.

"Hei, Muanpuii hi car-ah a bungrua va lakpui lawk rawh," nichina mi khan a rawn tih tâkah chuan kan hmaa tlangval ding chu ka lo en reng tih ka inhre chhuak veleh ta chiah. Kei tak hi chu aw... Mahse, han dem theih lua pawh ka ni chuangin ka hrelo, hmelṭha hi chu an hmuhnawm ve êm bawk a ni.

Beisei nei deuh hian ka pa chu ka en a, min lo en ve chiah bawk nen a mitmeng chu ka chhiar thiamlo. "Va kal rawh u, i pa Tlinga nen hian kan han ti ti leh lawk ang e," a tih chuan ka hnial ta biklo. Ka pa in a car chahbi chu tlangval hnenah chuan a pe a, pawn lam pana a chhuah rualin ka zui ve thuai a, pawna kan inzui chhuah lai chuan amah hlat deuhin a hnungah ka kal a. An in gate kan pelh hnua a rawn hawi let thut chu ka phu chiang teh asin. Chutia ka lo phu deuh zawk chu a nuih ka ti za nge ni, a nui chhuak deuh huk a, a la nui mawi em em lehnghal. "Eng...nge a ?" Phâwk deuh hian ka lo ti a, ka awmdan chu ka siamṭha veleh vat thung. "Ih...in car," a ti dêk dêk chu, "E...," ka lo ti deuh hluai a, ka hrechhuak har leh lutuk chu ka zak letling zawk.

Hepa hian kan car pawh a hre tawp nâng, engtin nge ka lo hriat vatloh theih zawk ni ? "Saw lai deuhah sawn a awm," tih pahin keimah zawk chuan hma ka hruai ta zawk, an in piah deuh kawng sira ka car lo inhung rân zawnah chuan ka dinpui a, "Hei, hemi hi a nia," ka tih chuan min chhangloin a bu nghat a, car hnunglam chu panin ka pa chahbi pek hmang chuan a hnung chu a hawng a. Kan thawmhnaw ṭhenkhat, air bag-a kan dah ho leh thil eng eng emaw kan dah tel ho nen lam chuan kan la chhuak ta vek a. Nakina kal leh ngailo tura lo inlakchhuah lawk kha a ṭha zawk niin ka hria.

Kan bungrua ho chu a rit tur tur min khaisak vek a, han rit tham lua tur a awmlo nain keia thil ken ve hi zawng a beitham ve bawk êm a ni. Kan airbag lian zawng zawng a khai vek a, kei erawhin bag tê pakhat leh polythene chhunga kan chips lei ho chiah ani ka khai ni.

Ka pi te inah inzui lutin, kan pindan innghahna tur thlengin kan bungrua min dahfel sak ta vek a, a polite ka lo rilru khawp mai. A hmel ṭha fahran leh a zia dam thlup te nen chuan, engkim chu inrem vel vek ni hian ka hria. "Heti hian ka dah mai dawn asin," ka lam hawia a rawn tih takah chuan ṭha deuhin ka lo chhawn ve vat mai bawk a. Ka tihfel ngai miahloa min rawn tihfel sak vek chu ka lawm rilru hle bawk.

A zawh hnua ka lam a rawn pan phei chhat chhat chu ngawi reng hian ka lo thlir a. A hmel chu nichin ang thoa nelawm kha a la ni reng a, nui hmel a pu lo nain a hmel chu hmuh a hahdam hliah hliah. "Jaden ka nia," tia a kut min rawn pe chu vawn mai nachang pawh ka lo hre leh peklo. Ngun deuha ka en tê tê hnuah, "Muanpuii," tiin a kut ka lama a rawn lek kan chu ka chelh ve ta chauh a, rei min chelhlo nain ka lai ru viau mai.

"Kum engzat nge i nih a ?" Dam diai hian a rawn ti a, a engkim hi a dam thlup bik emaw tih mai tur a ni. "May thlaah kum 17 ka tling dawn chiah," ka lo ti ṭha ve mai a, "1 age gap," a rawn ti chu ka mitko ka lo san deuh euh a, a sawi tum ka man mai lo. "Nang aiin kum khatin ka u anih chu," a rawn ti zui leh zat a, kan inkawm tawk dawn khawpin ka hria.

"Class engzat nge i nih ?" Tiin min zawt leh a, ṭha takin pawl sawmpakhat ka zir ve mêk thu ka sawi a, ani pawh a lo ni ve chiah a ni awm e...

"Saw saw in in em ni ?" Ka hriat tawh hnu ni tho mahse sawi belh a neih takin tih thu ah ka zawt veleh thawr a, a chhanna ngaichangin tukverh aṭanga ṭhenawmte inlang thei chu ka thlir rân bawk.

"Aw, ka ni te in anih saw. Kan in chu a ni deuh mai. Kei tak hi chu Serchhip-ah ka awm ṭhin a, high school ka kal chhoh aṭangin ka lo awmpui anih hi," nui sâng hian a rawn ti a, a nui hmelṭha thei em em lehnghal a, amah lah hi a dam thlup reng a, ka sawi thiamlo...a bula awm a nawm hmel ka ti...

"Anih na takah chuan he khaw mi hi kan nia, mahse ka pa thih aṭangin ka nu te khua Serchhip lamah kan awm a, ka ni te hi nupa rek chauha awm an lo ni ve bawk sia, an khawhar hnemah tal tiin ka ni hian min beisei ve deuh a. Ka nu in min tir ta ngawt alawm mawle," inhnuai pana kan kal laiin a ti a, "Khawi school-ah nge i luh ?" Ka lo ti teh daih a, step tawp kan thleng thla ve chiah bawk.

"Catholic school ania, ST. PETER'S." A hnunga ka zui dat dat a, a school luhna chu a hming ka hre ve fo tawh..."Catholic school hi chu displine a ṭha thei ṭheh ṭhawh lutuk an ti a ni em ni ?" Fiam ti tih deuh chuan ka ti a, ka han en chhoh chuan mawi deuh hian a lo nui a, a nui hmel hi ka awt takzet. "Ni hmiang, brother leh sister te hi hnam dang an nih ve nawk vang hi nge ni, mi hian an ṭih thei khawp mai," a ti chu ka lo thlawp khawp mai. Chung a sawite zingah chuan ka tel ve miau a ni.

"Ka phei mai dawn asin, in buai viau na chu, kan exam lai ania," a rawn ti dam leh thluam a. "In va exam hma bik ve," ka lo ti deuh hluai a, "Nia, keini chu kan hma thei alawm, zawh pawh kan zo hma thei ania," a tukhum hiat nauh nauh pahin a rawn ti a. An school chu ka awt ve ta rum rumin ka hria. Keichu, thiam leh thiamloh pawha exam zawh vat vat duh ṭhin mi ka ni a, exam laia gap awm te hi ka duhlo bur zawk. Keia tan chuan thiamloh zirna leh revise-na ni pawh nilo in inthlahdahna atan hun ṭha tak a ni zawk. Chawlh kual vel ai chuan ti vat vat zawk ila, fail dawn pawn fail vat vat zawk ila tih hi ka duhthusam a ni.

"Anih, ka phei san phawt mai ang che," tih pahin a inher vut a, "Kan lawm lutuk a nia aw....," a tawp lam chu a zuih ti tih a, a hming han sawi tel mai ka tum a, mahse ka tîm tlat pek a, tumloh deuhin a zuih ral ta ringawt.

Mahse rawn hawi lêtin mawi deuh hian min rawn nuih deuh suk a, a ban a rawn vai zeuh lai chuan lai chhe tak ka ni ringawt. Awmze neilo in kan gate thing hmanga siam chu ka kheuh neuh neuh ringawt a, min hnungchhawn tawh zawk hlauh a, nilo se chu mi mawl emaw min ti tawh ngei ngei ang mawle. Inchhung ka luh leh hnu chuan inchung ka pan tlang nghal a, nichina ka mutna room-ah khan lutin ka air bag aṭangin ka towel leh face wash tih ang reng ka phawrh chhuak nghal mawlh mawlh a. Room chhunga bathroom te vel rinren an dahah chuan inbual turin ka lut ve thawr a, mahse an hmang ngailo bawk nen, shampoo tih ang reng pawh engmah a awmlo. Towel khaina ah ka towel ken lai chu khaiin bathroom aṭang bawk chuan ka chhuak leh a, ka air bag te pen aṭanga ka shampoo hman ṭhin bur nei chi ka phawrh chhuah leh hnuah sambawn rimtui chi ka nu min ken tir chu ka phawrh chhuak leh zat a, buh leh rose water hmanga siam a ni a, ka nu siam ngat a ni bawk.

Ka sawi tawh em awh ? Ka nu hian Aizawla kan veng lun lai deuhah dawr a nei ve a, ei tur chi hrang hrang leh sahbawn a ma siam chawp hi a zuar tel ṭhin a. Mawi deuh deuha chei leh tuam anih vang hian nge ni, mi pawn an duh thei khawp mai. Saranga a tuam hnuah ribbon mawiin a ṭawn leh thlap ṭhin a, a lang changkang ṭhin khawp mai. Ama rose phun ngeiin a siam ṭhin bawk a, rose petal tlem tlem a dah tel ziah bawk nen a lan dan vang hrim hrim pawh hian leisakna tham chu a ni ve in ka hria. A la rimtui tel cheu lehnghal. Hei vang hi ania tlai tin pangpar tui ka pek ziah ṭhin ni.

Tui lum awm miau heklo le, tui vawt hlang chuan ka inbual tak ngawt a, a vawt ve vur tak nain ka inbual zo chu ka harh hawk hian ka hria, ka zâng ta sawt mai bawk. Khuma ka inthlakna tur ka dah chu lakangin ka inthawlh nghal zung zung a, thawmhnaw thlawl lam ka hak vangin ka zangkhai tawh khawp mai.

Inhnuaia ka chhuk thlak leh chuan an buai zualpui a lo reh tawh nain mutna tur buaipuiin an lo buai hlawm khawp a. Khual khua aṭanga kan chhungte ṭhenkhat ṭhuthlenga mut tum tawk te an awm nawk a, Nu Kimtei te chhungkua erawh inchung room lehlamah an mu dawn anih hmel. "I naute hi inchung lamah lo han mutpui mai ta che," ka nu in a rawn ti dam thluam a, nu nunnem tak ani tih hi kan sawi tel hram ang nge.

Mutna kan indaih loh deuh vangin ka putea te chhung nen pindan khatah kan mu a, ka nu te erawh pahnih chauh an nih vangin ka pi leh pu pindanah mutna an phah a, kei erawh Ruatkimi nen khumah kan mu a, putea te nupa leh Sangsanga erawh chhuata mutna phahah an mu thung a, khum hi a têt ve ang reng vang a ni pakhat.

Mut hmunah Sangsanga titi kan ngaithla char char a, a changa anu in a khap leh zeuh zeuh ṭhinte chuan nuih an ti za zawk.

Kan ti ve bek bek a, ni pawh chu a kal ngaiin a kal ve zel a. Ka pi te khuaa kan cham nihnihna a chiah chuan ka pi awm dan tur rel fel turin puitling ho an ṭhu khawm a, Sangsanga lo bengchheng ve chhen chu Pitein tih ngaihna a hre talo aniang, "I naute hi lo va chhuahpui lawk mai ta che, Sanga hi chu a awrawl a ring reuh si a, Ruatkimi lah hi a luhlul sual ve bawk si a. Amah chauha lo va chhuahpui kha chu a duh leh dawn silo a, hla vak kal pawh a ngailo, lo va chhuahpui daih mai la," a rawn ti ta ngawt a. Ka phurlo viau nain, ka hnial ta bik emlo.

An thu rel fel chhungin Ruatkimi leh Sangsanga ka hruaichhuak a, kalna tur vak hre heklo, ka kualpui ka kualpui ta ngawt a, ka pi te veng hming tak ngial pawh hrelo hian khawiah tehlul nge maw kan hruai ang ni ?

Kalna bik em em pawh neilo in kan kual kan kual a, rin ai takin Sangsangan nuam a ti reuh phian a, a tihzia ta hlauh zawk. Mawi tawk fang kan kal hnuah kan let leh a, kan kal lam anglo takim dawrah kan peng a, kan luh rual rualin Sangsangan a duh a kawk kual nghal zat zat a, kan chhangchhe ang reng khawp mai.

Dawr neitunu chu nu te ve lampang, ft.5 pawh a tlinglo ang tih tur awm vel a ni a. Mahse, a ṭawngduhin a thil zawrhte lah chu a han fak thiam em em khawp a. Dawrtu a ngah thei ngawtin ka ring, sumdawn chu hnehsawh tur tak chi a ni. Zawrh em em pawh nilo a, hmehbel chawt chawt duh tur ang kha niin ka hria.

"Ka va hmu ngailo che u ve, khual khaw lam em ni in nih ?" Pawisa kan inpek felin a rawn ti hlawl a, "Aw, ni e," ka lo ti ṭha ve mai a. "Pi Ropari tu te kan nia," kan thlenna min zawh leh zel takah chuan ka ti ta ngawt a. A veng hming hre heklo le. "E...Nu Ropari chu tu a lo ve nei hmelṭha hlawm ve," a ti siam siam a, min ti lai dawn dawn zawk alawm.

"Enteh dawr neitunu kha, a nulat laiin a zei ngawt ang," kan hawn kawngah chuan Ruatkimin a ti ta ngei a, keipawh ka ngaihdan chiah a ni. "Nia, ṭawngkam a thiam hmel si," ka lo ti zawm ve zat a, thu ziak thiam emaw hla phuah thiam ang maiin ṭawngkam a la thiam tel cheu lehnghal. Min lo biak dan aṭang khan chu chu ka hre thei nghal tlat a ni.

In kan thlen leh hnu chuan engkim chu a ngai ang thlapin a lo kal leh tawh a, boruak uap churh leh thutak deuh ruih pawh kha a zia tawh khawp mai. Zanriah eikham ah, kan chhungin TV kan en ho a, mizo idol tel tawha nuihzathlak zual an dah khawm ang chi kha kan en ho a. A ṭhen chu Putea zai nen kan han hmehbel leh ṭhin a, rin ai takin kan hlimpui ta phian a, hetianga chhungkua kan awm khawm lohna a rei tawh bawk nen, ka pi pawh chuan nuam a ti ve viauin ka hria.

"Pawnah kan chhuak lawk dawn asin, i lo kal ve duh em ?" Ka phone ka khawih mial mial laiin Ruatkimin ka beng bulah a rawn ti sar sar a, ka lu ka lo thin nar nar rualin U Zualtei nen an kalsawn nghal a, "In bo ang e aw, zan a ni lehnghal," ka tih zui ve na te chu an bengkhawn tawhlo hrim hrim.

Mut dawn thleng pawh chuan Ruatkimi emaw U Zualtei pawh chu ka hmu zui talo a, an lo la hawlo nge mawni ka tih ruk rauh rauh laiin ka nu in ka pite room lamah min lo ko lut a, ka pa pawh a lo awm ve nghe nghe.

"Thil sawipui lawk tur che kan nei a," ka pa chuan a rawn ti dam thluam a, thu tam a sawi ṭhinlo nain a nelawm thei khawp mai. Pa dam tlup mai a ni a, ka tetlai aṭang tawhin tih takzeta a thinrim emaw, âw ka vinna ka nu emaw keipawh min la biak ngai ka hrelo.

Ka pi sitting room lama a la awm ve vangin kan chhungkaw pathum tê chauhvin kan awm a, an hmel thutak leh lutuk chuan ka awm a ti nuamlo zawk. "Engtikah maw in exam dawn a ?" A tih chuan thla tawp lama kan exam tur thu bawkin ka chhang a, a ṭawng leh mai ang chu ka tih laiin a ngawi ta vung vung a, ka ngaih a ti ṭhalo zawk dawn dawn alawm le. "Vawiin khan i pi awmdan tur relin kan sawikhawm tih chu i hriat vek tawh kha, han awmsawn turin a kum a upa ve tawh si a, chu bakah amah pawhin a duhlo hrim hrim a. I nutei te lah pasal nei vek tawh an ni a, i putea lah hna nei a ni a, pute lam thulo chuan a awmhmun a sawn ngawt theilo tih i hriat kha," rei riallo in a rawn ti dap dap a, a sawi tum ber ka la man thiam chuanglo.

"Eng nge chu chu i sawi chhan ?" Ka ti ta reng a, sir lama ka nu lo ding ngawi rengte chuan ka awm an ti nuamlo vel vek ni mai hian ka hria. Ka hmanhmawh tet tet tawh. "I nutei te kha chuan awmpui tur lak mai ṭha in an hria a, i pi hian mihrang chauh awmpui chu anhreh ve tum hrang si a, nangmah a phût deuh tlat che a," a rawn tih leh takah chuan a sawi tum chu ka man thiam ta ruakin ka hria. Ka pi bula awm turin min duh tihna.

"I hreh em... ?" A rawn ti dam leh dap a, sawi tur a ber pawh ka hrelo. Ka hamhaih kual vel vek rih. "Ka hre nang...," ka ti ta ngawt a, han chhan mai ngaihna ka hrelo ve bawk em a ni. "I hreh viau chuan a ngai chuanglo a, i pi pawh kan lo hrilh leh mai ang a," a ti leh charh charh a, "Ka hreh hranlo," ka lo ti leh ang lawi a, ka mumal chiah rihlo chu a ni ta ber.

"Kan tilui chuang miahlo che a nia, exam i nei hnai tawh ang reng si a, i nu dawr a ngaihtuahawm ve tawh bawk nen, hawn thlak vat a ṭha zawk a. Kan haw hmain thuthlukna siam fel vek zawk ila, nangpawh i lo inngaihtuah ve dawn nia, nangmah chauhin i ni dawnlo a, Ruatkimi pawh a tel ve dawn a. I hreh viau chuan a ngai chuanglo," a hmelah chuan a inthlahrung emaw tih theih zawk tur a ni. Eng thuthlukna pawh siam ila min pawmpui tur zia a hmelah chuan a lang a, chu chuan min tihhahdam em em thei thung.

A tûk lamah, Nu Kimtei te chhungkua an haw a, keini erawh a hnai zawk kan ni bawk nen, ka piin min chelh ve teh tlat a. Putea te chhungkua pawh, "Inkhat aṭanga chhim leh hmar a inṭhen a ṭha ngailo e," ka piin a tih deuh tlat vangin an la cham ve ta reng a, Putea a hna lam chawl reng thei anih tawhloh vangin a tûk leh lamah Lunglei lam panin an haw ve ta a, keini erawh nikhat dang kan cham leh hnuah kan haw ta chauh thung.

"In exam zawh veleh lo chho leh vat ang che aw," car chhunga ka lut tawh chu ka piin a rawn ti leh rih a, min ui ve ngang aniang nge, ka kut vuanin a chul hauh hauh reng a, a kut zûr tawh lam.lek lek chu ka vawn hnan a, ka ngaihtuah ru ang reng viau nain kan awm chhoh hma zawng chu nutei te nupa in an lo va awmpui dawn a, ngaihngam takin ka kalsan ve thei tawh ang.

Nu Kimtei te haw hma lawk khan chaw ei laiin ka sawi chhuak a, ka pi bula awm chu ka thlang ta zawk a ni. Kei vanga a khawhar tal a ziaawm ve thei anih chuan keia tan pawh thil hlu tak a ni dawn a, he lama school kal pawh chu Aizawl lama school kal aia a ṭhatloh bikna tur ka hre hranlo. Ka pa sawi tawh ang khan keimah chauh ka ni dawnlo a, Ruatkimi pawh a pa thu awihin ka pi awmpui chu a thlang ta zawk a, a peihlo viau ang chu ka tih laiin a nu leh pa hmuh phakloha awm chu a lo chak khawp mai a, kei ai aiin a phur zawkin a nia ka hriat ni. Ruatkimi hi chu a lanloh dan ang niloin an lan dan tawp hi a ni a, sawi dawt chuanin hmeichhe fel leh zaidam tia sawi tur a nilo. Mipa a hria in a zirlaiah a ti ṭha ngailo a, ruihtheih thil chenin tihloh a neilo reng reng. Damdawi chauh hi a la khawihloh awmchhun ni ta hialin a nia ka hriat.

Thawk khat lai phei kha chuan school tlanbo te kha a ching ṭhin a, Putean a hriatchhuah hnuah a rang a rangin hostel-ah an dah lut a, chuta ṭang pawh chuan a la tlanchhuak ta cheu a, putea tih ngaihna hrelo in ka pu zilh hau turin a rawn ti ta ngawt a. An vua a, an hau chung pawhin an la zilh sim hlei theilo a ni awm e. Ka pi leh pu ka biak chang khan, ka pu khan a sawi lang ve leh zeuh ṭhin a, "I nau chu tun aṭangin sikul tlanbo te a ching chho ṭan a, a hahthlak dawn khawp mai," vawikhat kha chu a rawn ti tawh a, ka zawhchian lah khan a sawi ṭha fumfe duhlo lehnghal a, ka bula Ruatkimi awm tur chu ka huphurh ru deuh.

A sual ta viau e ka tihna nilo in, keipawh sual châng leh luhlul han chhuah deuh châng chu ka ngah ve ṭhin a, mahse ruihtheih thil leh school tlanbo tih ang reng kher hi chu tum pawh ka la tum chhin ngailo. Mi hauh hreh deuh ṭhin hi ka nia, a lo tisual ta anih pawhin ka hau hreh leh tlat pek emaw kha ania, lo hau ta pawh ni ila, keia thusawi ve te chu engatan mah a ti tawp nang. Ka pi lah heti mai hi a ni tawh si a, kan bula a awm ve chu a sual lehzual phah viau lo'ng maw ka ti deuh.

"I rui em..?" Car hma lam aṭangin ka pa in a rawn ti a, ruah sur silo in, ni a chhuak lo a, zingkawng zawh nan pawh ni nuam tak a ni. "Helai hi khawi lai nge a ?" Tukverhah dak chhuakin kan khaw tlanpelh mek chu ka en dauh dauh a, "Thingsulthliah a nih hi," ka nu in min rawn thlek zeuhin a rawn ti a, kei erawh, kan tlan pel tak ho thlirin ka tukverh ka bawh ar ar a. An khuaa chhumzing chiai chiai chuan a ti mawi lehzual khawp mai. An kawng a nuamin chhe lai eih a awmlo a, khaw lum lutuk a awmloh vangin thlifim rawn thaw heuh heuh te chu an thiang kak a. Zinkawng nuam tak zawng a ni, ka rui miahlo bawk.

Seling-ah thil eiin kan ding a, an chawhmeh zawrh ho chu ka nuin a en lawr dan dan a, kei erawh thei tur ei tur lam zawngin keima buai buaiin ka lo buai ve a, tengtere den tih ang reng ka lei ve nual a, motor chuan laia ei turin chana ka lei tel ve nual bawk.

Chaw hma lama chhuak kan ni bawk nen, Aizawl kan luh chuan tlai lam lek lek tawh a ni a, in kan thlen meuh chuan ka chau ve deuh hnawk hian ka hria. Motor chuan hi chu ka chauhpui ve thei êm bawk a, mak pawh ka ti hranlo.

Rawngbawl tha a tho vaklo bawk nen, sausage leh eng ilo kan kang ta ngawt a, chaw kan chhum leh tawp ringawt. "A awlsam sam kha a ṭha mai, chaw ka'n chhum ang nge, inchungah pangpar tui lo han pe zawk rawh," ka nu in a rawn tih chuan inchung lam ka pan ve vat a. Ni danga ka tih ṭhin ang bawkin inchung pangpar ho chu tui ka pe a, kan peklo rei deuh vang nge ni, an vuai deuh hian ka hria. Ka ngaihbel zawk pawh a ni maithei.

Zan lamah ka zirlai lam ka en ve ngial a, ka motor chuang ve kha ka chau deuh nge ni, rei pawh zir peihlo in ka mut san a, ka derdêp leh lutuk ṭhin hi ka inhne zawk. Ka pa phei chuan, "Mi ina mo chi pawh i nilo, ei duhloh i ngah reuh si a, i hahthlak em mai," vawikhat chu min ti tawh nghe nghe a, ka pha miahlo, a sawi ang chiah chiah kha ka ni. Ka chau hma a, sa lam phei chu ei duhloh ka ngah, mi mo niha inchhung enkawl phei chu ka zuamlo mai nilo in, tun atan chuan ka hreh ngawih ngawih rih a ni.

Ka lu in lukham a sik rual rualin ka muhil nghal tih theih tur a ni a, zing ka tho chhuak erawh ka tho nuam ta khawp mai. Zing kar hma deuhah ka inbual a, ka inbual zo chu ka zang ta hawk hian ka hria. Ka awm a nuam sawng sawng mai bawk.

Ni sawm pariat aṭangin exam kan ṭan a, keipawh ka zir ngawrh ve ta viau a, zan men rei ka theihloh ṭhin vangin zing lama thawh hmaah ka tlak a, exam lai bik tê hi chuan mut ka kham ngai manglo. "I pi bulah i awm dawn maw ?" Ka sira Julie dawhkan bawha ṭhu chuan a rawn ti a, a hmel ka en chian chauh mut hmu manglo leh chauh hmel deuh hi a ang a, a lehkha zir nasat vang anilo tih chiang takin ka hre bawk. "Aw, midang an awmlo a, ka piin min phut ve deuh tlat bawk sia," ka ti ṭha ve mai a. "I awmloh chuan a van nuam awmlo," min en tawhlo in a hawi sawn a, a kutin a hmai a hliah vek vangin a hmel pawh ka hmu thei tawhlo.

"Nuam em em ang, midang pawh an awm alawm," a hnunga zuk bawhthlak pah chuan ka ti a, min chhanglo in a ngawi reng a, rei fe chu kan ngawi ta reng. "I pa a sual leh tawh em ni ?" Ṭawng chhuak hmasa zawkah ka ṭang a, ṭawng kaa min chhang lovin a lu a bu nghat nghat a, a rawn hawi chhuah chuan a mittui a parawl leh ṭeuh tawh tih ka hmu chawpchilh ve zat bawk.

"Engtin nge a awm leh tak a ?" Thinrim ru ṭunin ka ti a, ka aw ah erawh ka ti lang chhuak lo thung. "Nizanah a rawn rui haw leh tawh a, lehkha zir a phallo tlat a, ka nu lo ṭawng ve kha kut a thlak nghal ringawt a. Ka u thinrim in a sual let a, kan chhungin kan buai alawm," a tih laia a hmel chu ka khawngaih khawp mai. A mittui a rawn parawl ṭiam ṭiam a, a mit aṭanga a rawn far thlak fap rualin a rawmawl ken laiin a inhup zui thuai a, ṭap rimg ngam chiah silo in a ṭap khur dar dar a, hnem dan ka hre hlawllo chuan ka kuah ta ringawt a. Ka khawngaih takzet !

Hetiang ang chhungkua, keh chhia ni silo, mahse inchhung khura chhungkaw kehchhia nihna nena danglam chuanglo chhungkua hi engzat chiah nge awm tawh ang le ?

Julie pawh a vanduaiah ṭangin hetiang chhungkuaah hian a piang a, a duh vang reng pawh nilovin zu ngawl vei awmna chhungkuaah a piang a, hmeichhia anihna anga a nun zalen taka a hmang theilo tur hi pawi ka tih pui a, chhungkaw ṭha tak Pathianin min pek avangin vannei ka inti thar hle bawk.

~ End of Chapter-1 ~