M. Ch-2

Chapter-2

Ni 28 ah exam kan zo fel a, kan exam har ang aiin kan zo hma ta phian a, ka exam pawh ka chhang ṭha ve viau chuan ka hria. Result nghah law law ka pain a ti deuh tlat a, Ruatkimi erawh an exam zo hmaa, result pawh a lam diam tawh a. Ka pi awmpuiin a bungrua nen lam a phei tawh a, nutei te nupain an lo ngaihsak ve reng thei bawk nen, ka hmanhmawh duh ta hranlo.

April thla tirah kan result a chhuak a, ka result lam turin ka pa a lo kal a, mark nga chiah chiahin letter ka hmu phalo a, ka ui ru viau nain ka lungkham zui ta lemlo thung.

Tlai lamah min thlahna ni pah fawmin kan inah chaw kan eikhawm a, ka classmate te nen anih vangin kan hlim dar dar hle a, Julie pawh a rawn tel ve thei nghe nghe a. Anu in a pa awmloh hlanin a rawn kal tir hi a lo ni a, a nu in haw tlailo tura a tih thu sawiin chaw ei kham veleh a haw a, a kal tur te chu ka khawngaih reuh khawp a. Mahni hringtupa ngei hlaua hetianga ralṭi em ema awm reng mai chu ngaihtuah pawh ka ngaihtuah ngamlo.

Midang ho erawh chaw eikham hnu thleng pawhin an awm khaw tlai a, inchung varanda zawlah guitar perhin kan zai ho a, thla eng hnuaia, "Suihlung tileng zual mai maw i anka," kan han ti rual ṭhap ṭhap mai chuan lung a ti leng ve vawng vawng a, chhungril lamah min ti hnîm ruih thei hial a ni.

A tuk zing lam erawh, boruak a dang ta zar a. Nileng deuh thaw chu ka bungraw khung fel nan ka hmang a, ni a ṭang a ut bawk nen, khaw lum leh chhuata ka bungraw ṭhenkhat let rem rum te chuan min tihah hluah hluah, ka luak a chhuak hlui tawh.....

Ka han inkhung fel tur chuan ka lehkhabu hlui tih ang reng ka hai chhuak nawlh a, ka lehkha zirna dawhkan hnuai ka ching felin, ka paintbrush ho ka hai chhuak nawlh a, ka lek kan rualin ka hmanlohna rei tawh zia ka inhre chhuak a, ka lung a leng ve ringawt anih chu! Zahpuiawm hian a...

"I in khung kim maw...? I rawngte kha i keng kim em ?" Ka room-a lo luh pahin ka nu in a rawn ti a, "Keng kim ve chuan ka hria," ka vel en kual vut vut chungin ka ti a, ka inkhung kim thawkhat ve viau chuan ka hria. Ka luggage khai lai chu ka nu in min rawn khaipui a, inhnuai lam kan pan thlak laiin ka pa in pawn lamah car a start ri vut vut tawh a, ni a sa ut bawk nen motor chuan chu phur fahranlo tak ka ni.

Ka bungrua car chhunga kan hlan fel vek hnuah car chhungah ka chuang lut a, ka pa lo ṭhut luh ve hnuah ka pi te khaw lam panin kan inkhalh chhuak a, kan tlanpelh tâk, kan inkawt aṭanga ka nu ban lo vai lauh lauh chu dâk chhuak meuhin ka bye bye a. Motor chhunga ka ṭhut luh ṭhat leh meuh chuan ka kal hreh ve ta rum rumin tawh zawk. Kum tam tak ka lo awm ṭhin tawhna chu chhuahsanin, hmelhriat pawh ka neih manglohna hmunah ka awm tawh dawn a ni a, mittui a hnai ve kuarh thei alawm le.

Aizawl khaw chhung kan tlan pelh tak chinah erawh, ni a dul ruih reng a, Baktawng kan thlen chinah phei chuan chhum a zing chuai tawh a, ni sa ṭang tak ai kha chuan a boruak pawh a nuam fu a, khaw lum lutuk a awmlo a, boruak chu a dai dup reng a, a tir lam ai chuan a zia ta khawp mai.

Ka pite khua kan luh dawn hnaihah ruah a rawn tla sep sep a, tam lutuk an nilo nain chhum a zing nasa bawk nen, motor khalh a har phah deuhin ka ring.

Khaw chhung kan luh hnuah ka pi call-in chanchin ka hrilh a, kawta min lo nghah tur thu a sawi lai chuan a phur hmel khawp a. Ruah sur a zia tak deuha ka hriat vangin tukverh darthlalang chu ka hawng a, ruah chu a la hmi seng seng reng a, chhum pawh a ti mawi tawk velin a zing ve chiai chiai a, tukverh biang chu nghengin kan sir lama kan tlan pelh ho chu ka thlir dauh dauh a, ka mit ka chhin rualin ka lung a leng thar vawng vawng a. He lunglenna hi 'khawtlang lunglen' an lo ti ṭhin kha nge ni ang nga, in lam ngaihna vang zawk ? Hnemtu ngai tlata inhriatna ka nei ve ringawt pek a, a hmaa awm ngai miahlo thil a ni.

Ka pi te in kan thleng chu min lo hmuh rual rualin ka pi a lo phul deuh hlut a, Ruatkimi pawh pawnah a chhuak ve thuai a, a rang a rangin ka pa bungraw thiar chhuak chu a rawn pui nghal a, heti ang lamah hian a bengvar a, ka tlukloh na lam tak pawh a ni.

Inchung lamah chhovin a hmaa kan lo riah tawhna room-ah khan kan inthiar lut a. Ka room tura ka piin a lo tih a nih hmel. Ka hnial hranlo a, hnial a hnekin ka pawm takzet zawk. A pindan awmdan leh a len zawngte chu ka duhthusam chiah a ni. Tukverh lam ka hawi rualin a zawna tukverh awm ve chuan ka mit a la nghal a, Jaden mawlh kha. Eng nge tunah hian a tih ang le...? Inah a awm ang em ? Min la hre ve reng ang em ? Ka ngaihtuahna zet chuh! Thil ṭullo tak ani.

A tuk zing karah ka pa chu Aizawl lam panin a haw leh a, ka han thlahliam tur te chu ka lung a chhe tlat pek a, ṭah erawh ka ṭap ta em biklo... Ka nu amah chauha awm anih vangin, rei tak cham thei a nilo a, theih ngat se zawng kar khat tal chu min awmpui ve rih se ka duh a. Mahse, a rem teh ṭeuh bawk silo.

Ka pa haw hnuah chuan kan pi tu pathumin kan awm ve ta rek rek a, a khawhar thlak chu ka tilo nain a reh ve khawp mai. Mahse Ruatkimi a awm a, anin ka khawhar a hnem ta hlauh zawk a, a lo awm velo ang tih chu ka hlau leh hnuhnawh.

A kar leh lamah nutei hovin kan school luh tumna lamah kan kal hova, a hmun chu a zauin a kalkawng te pawh a mawi reuh khawp a. Luh dawnah gate lian ve pangai tak alo awm a, a chungah 'St. Peter's Higher Secondary school' tih hi a inziak a, Jaden school luhna kha ni thalin ka hria.

An school building pawh a lian ṭha a, an compound chhung ngat phei chu a zau ṭha ngang mai. A mawi tawk tur lekin thing ṭhenkhat leh hnim ṭo neuh neuh a awm a, school kawt zawlah basketball ground zau fahran a awm bawk a, a sirah ṭhutna tur ni awm tak hi a indawh chho zul bawk a, ka hmuh tirh phat aṭangin nawm hmel ka ti nghal.

Lut thar tur kan nih vangin entrance exam a ngai a, chu erawh awlsam deuhin ka ti ve thei mai a. Ka ti ṭha ve viau chuan ka hria. Entrance exam result a chhuah hma chu kan nghah a ngai dawn anih hmel e. Ka haw kawngah hmanni a kan kal tawhna dawrah bawk khan nutein min luhpui leh a, dawr kan luh phat aṭangin dawr neitunu leh nutei chu an inbe nghal barh barh a, an innel viau anih ka ring.

"U Maeng, khawi maw kuhva min lo ṭeh teh," nutein a ti lut nghal thawr a, dawr neitunu lah chuan hnial hlei lovin a lo ṭeh ve mai bawk a, kei leh Ruatkimi erawh, ṭhuthleng hniam an hunah chuan kan ṭhu ngawi kar ringawt.

"Lalzam, khawi lam nau te nge a ?" Ruatkimi nen min melh tawn pahin dawr neitunu chuan a rawn ti leh a, "Ka u fate anih hi, ka nu bulah an lo awm tawh dawn a. An school luhna tur lam buaipuiin kan chhuak lawk a," nutei chuan a ti ṭha ve mai a. Ka ngaihbel nge ni, dawr neitunu ber chuan min en ngun riauvin ka hria.

"Ṭhatluangi fanu i ni maw...?" Min en vung vung chunga a rawn ti takah chuan ka lo bu nghat nghat a, "E...,i ang ka ti rengah, i nu i chun anih dawn hi," a ti leh siam siam a, nutei nen an inbe zawm leh mawlh mawlh a, keini pahnih chu awm velo ang hmak kan ni. A hma khan kan kal tawh reng sia, min hre tawhlo nge mawni? Api hming te kha ka hrilh ve asin mawle....

Min biak changin a rul tawk te te chovin kan chhang a, zawhna min zawt tih loah chuan kan ṭawnglo hrim hrim zawk. "I phei dawn ang u hmiang," nutein a tih rualin rang fahranin kan tho a, nutei pawh nghak ta chuanglo in kan chhuak daih a, pawnah dingin kan nghak ta ringawt bawk.

Rei loah nutei chu a lo chhuak ve mai a, in lam pana kan kal lai erawhin Ruatkimi chu a ṭawng duh barh barh khawp mai, keipawh ka ni ve tho....Nutei te in a hnaih zawk vangin a peng hmasaah a ṭang a, in lam kawng kan hriat tawh tho vangin thlah kan duhlo teh tlat a, naupang buaipui ngai reng rual kan ni tawhlo a, kan lo tihbuai ve chhen chu nuamlo ka tih deuh vang a ni.

In lam pana kan kal laiin Ruatkimi chu a ti ti barh barh reng a, a ti ti vawrh ve lah chuh, mipa lam hlir ani leh nghal a. He lam hi chu a la sim hleithei meuhlo. "Khuaah hian chhelo deuh hlek an awm em le ?" Tih ang reng ani a, ka sawipui ṭha duh vaklo nain ka chhang ve zel tho a, ka nuih a za ru reuh khawp mai.

In thlen hma in kawng kawi khat vel a la awm ang tihah bike rual hian chak fahranin min rawn tlan pel a, pali vel lai chu an niin ka hria. A hnung bera tlan lah chuan a ban a la rawn vei zeuh lehnghal a, ka ngei ru ang reng khawp a. Kher kher hian a! Min runluih a tum ve khanglang tihna chu a ni awm sia....Tih theih dang nei heklo, an hnung lam chu rum deuh hian ka melh a, kawngkawia an tlan liam thleng chuan ka la melh ta reng...

"Tute nge a...? A hmasa bera mi kha a chiks hmel nasa!" Ka bula mi lah chuan an tlan liamna lam thlek duk duk pah hian a ti a, min rawn su thawi fua tih te kha a hrelo nge a hrelo der zawk pawh ka hrelo e a. "Tu nge niang le ? A hmelṭhat hmel e.." a ti leh vang vang a, ka awmhmunah ka lo ner sawk sawk ringawt tawh. "A bike kha a nalh e....., a dum lehnghal," a la ti ta deuh deuh a, "A hnung seat a sang emai a." Ka lo ti deuh hluk a, 'A hmelṭhat hmel' te kha a ti emaw ni lehnghal, a helmet kha phelh se a ha te lo kuh leh si se engtia tih nge maw a tum ni ? Mipa hmelṭha melh reng renga hringnun hmang ho hi chu mi lerh thak ka ti mai. Mahse a, phur thut chang hi chuan hetiang hi chu keipawn ka nei ve ṭhin. Mahse hei, ka phur khat khawp chu anih ber bur hi.

In kan thlen hnu chuan ka nu call-in ka bia a, dawrah a awm nge ni a bengchheng ang reng khawp a. "Lo nghak lawk rawh aw, hei vawiin chu kan lun deuh a," a rawn ti ta lang lang a, dawrah chuan a awm ngei anih hmel e. Zan lama ka biak leh tur thu sawiin call chu ka ti tawp ta daih a, inchhung sekrek zawng zawng chawhma lama kan khawih zawh vek tawh vangin ka awm awl ang reng khawp mai. TV enin sitting room-ah ka awm a, ṭhuthlengah ka ṭhu awn dar dar a, ka nin tawpah pawnah chhuakin ka pi thlai leh pangpar buaipui chu ka va pui ve ta ngawt a, pawna strawberry rah ṭhenkhat ho chu a lo lo hi a ni a, ama tawkah a lo buai ve khawp mai.

"Helai strawberry chu lo ru an awm leh tawh anih dawn hi, a phai dawk alawm. Ka va ui e aw...," a lo ti deuh vang vang a, ka va enpui lai chuan a la awmchhun ho chu a lo lo mawlh mawlh a, a te deuh ho chu a lawh kan zel a, a lawh sa plate-a a dah ho chu an thar ṭha ser sawrin an tui hmel khawp mai. A rim te chuan min lem vel vek hian ka hria.

"Kha hei, ṭhenawmte va pe ve rawh. An ei chak ang," strawberry ho chu a dah hrang diat diat a, a zat ve lawih chu ṭhenawmte pe turin min ti a, ka lo ui ru viau nain ka hnial ta biklo. Ka bowl ken lai nen chuan ṭhenawmte in lam panin ka phei thauh thauh a, an inzawn ka thlen rualin an gate chu ka kut pakhatin ka hawng ri nghal khap a, a kawngka ka kirh karh karh rualin hmeichhe aw hian min lo chhawn a, tîm deuh hian an kawngkhar chu ka hawng zal zal a.

Chuta choka dawhkan kila nutling lo ṭhu chu ka la hmuh ngailoh anih vang nge ka inthlahrung dai lehnghal. "E...pi, hei apiin, 'Va pe ve rawh' min tia," tih leh ka bowl kenlai chu lek lan ka rual a, Jaden ka zawng ru deuh nain ka hmu miahlo. "Ehe...in va ti lawmawm ve, a tui hmel hle mai," ka lam panin a rawn ti deuh hluai a, awm dan tur ka thiamlo, ka lai deuh ṭut a, ka nui tawi tak ringawt.

Kar khat leh tlem a ral leh hnuah, ka entrance exam result a chhuak a, vanneihthlak deuhin ka tling ve hloh a, Ruatkimi erawh waiting list-ah a awm a, "Sainik-ah i lut mai dawn nia," nutein a ti tak nain pakhat lut lehlo tur a lo awm ta hlauh a, seat a chang ve ta hlauh a. Admission ti turin nutei bawkin min hruai leh a, lehkhabu leh uniform pawh kan lei nghal diam a, zan lamah ka nu leh pa phone-in kan uniform thar te chu ka hmuh tir ve a, ka pa in ṭha taka awm turin min lo chah ve nghal mawlh mawlh bawk a, ka aw ve mawlh mawlh nain ka vei zui lemlo a, tunah rih chuan phurna rauin min man rih tlat.

Ni a liam a, a ni têlin school luh ni a hnai tulh tulh a. Ka phur ang aiin ka zam ru thar ang reng a, catholic school hi chu a dan a dang tlat a ni. Zanriah eikham hlim hlawl a ni a, beisei lâwk miah lohin thla tina hmeichhia in kan neih ṭhin ka nei teh thut a. Pads ka zawng chu a lo vang khawp mai a. Ruatkimi room-ah chhovin a neih leh neih loh ka han zawt a, "Pakhat chiah hi a awm tawh, keichu ka zo deuh chiah," tiin a pads hman ban chu min pe a. Tuna ka hman tur chu a daih ve mai dawn a, mahse zan mutna ami tur erawh ka indap chawp mai a ngai dawn anih hmel.

Ka room-ah lutin pawisa ka la a, ka pi inhnuai lama TV ena ṭhu chu dawra ka kal tur thu ka hrilh liam puat a, "Pawisa te i nei reng reng a mi ? Zan anih tawh hi, nangmahin kallo ang," kawngkaa ka chhuak tur chu ka ding leh rih a, Ruatkimi ka sawm dawn emaw ka tih rilruk lai mekin ka pi chu a rawn thleng ve nghal thuai a. "Ka rei lo ang, pawisa chu ka nei," ka ti ṭha ve leh mai a, min ngaihtuah deuh nge keimaha kal chu a ngaingamlo tlat a. "Pi...ka period a, pads ka va lei zawk ang a ka lo haw leh nghal ang," ka tih tak ngawng ngawngah chuan, "Maengi te dawr bak thleng suh ang che, an la inhawng em ang chu maw," a ti ve ta nge nge a, a rang a rangin ka phit chhuak nghal tih theih tur a ni.

Nu Maengi te dawr chu tluang takin a thleng ve mai a, a hla hranlo nain kawng kawi pakhat thim deuh hlek lai a awm a, in a awm ve tak nain a in neitu te pawn light chhit berkher chu a englo khawp mai. Street light a awm miahlo bawk nen, dawih deuh hlek tan chuan hlauhawm duh tak a ni. Hmeichhe dawih tia sawi tur ka ni hranlo a, mahse hlauh laklawh ka neih tawh chuan mi huat leh over tih tur khawpa dawihzep ka ni leh thung a, ka thisen a chakloh chang phei chuan keima towel inkhai ngei pawh ka hmu conjuring zo vek zel.

Polythene-ah ka pads lei ho chu ka khai a. Ei duhloh lai ka neihloh ṭhin vangin chocolate chu ka la tel ta hram a, ka ei tur khai ho nen chuan in lam panin ka pen thau thau a, Nu Maengi pasal zawkin dawr a lo nghah vang nge ni, zanin chu a reh duk mai hian ka hria.

Nichina kawi thim deuh lai kha ka hmu pha tawh a, kawng chhak lama kawng dang awm chho chu veng chhak lam panna a nih ngei ka ring. A thim chin lai ka thleng ṭep tihah chuan thawm rih deuh rawk rawk hi ka hria a, mipa aw te a tel nawk hian ka hria. Ka hawi let dawn chiah tihah tu emaw hian min rawn su her deuh sawk a, ka tlu ṭhelh lehnghal. "Mawli, awm sawn vat ta che," te chu a la rawn ti leh nghal a, zak theilo hian a.

Amah ang thova chak hian midangin min rawn pel leh a, anni erawhin min su ta biklo. An lan danah chuan in um te pawh an ang dawn dawn a, chutah ka hma lama tlan pakhat chu nichina min rawn su tu hnungah khan a pakai nawlh a, ka rin loh lam daih anih vangin ka awmhmunah ka lo phu ve zuk ringawt a.  Min rawn su tupa zawk kha niin ka hria, a tlu deuh hnawk a, pakhat lah chuan a ke pahnihin a kawngah a kherh bet tlat a, a lu ah a dawm bet tlat bawk a, chhuata awm zawk chu a che hleithei tawh meuhlo. An hmel chu chiang takin ka hmu theilo nain an chetla erawh ka hmu chiang khawp mai.

An sira ding pakhat chuan han phih thawh mai a tum a, mahse a thei mai biklo. "Valriang leh! tu maw zawi te i lo tih vel a ? Ka la zawi lo, ka la soft lo," a lua dawm bet tlat tu chuan a ti deuh nawk nawk a, nichina pawh thawh tum khan hnek tum hian a tin deuh uai a, mahse a kut chu dah thla leh rihin rin loh lutukin a chhip samah a kek dak ta awrh zawk a, ka rinloh pui pui hian an che hlawm mai a, an inhnek chawrh chawrh ang chu tih laiin an inkek dak awrh awrh zawk chu anih hi.

An sira ding ve pakhat chuan tih ngaihna vak a hrelo ania nge, a awm dan ngaiin a awm reng a, chutih laiin midang pathum an rawn thlen belh leh a, pakhat chuan a ding mai mai lai chu a rawn hnek deuh sawk a, an insual zawm chu a ni nghal mai. "Nêp-a, min kek vel elaw a ? I va pa lo ve, nangni zawk hi anih hi tuai chu," nichina ṭawng bawk khan a rawn ti leh a, a bak chu an buai nuaih nuaih tihloh chu engmah ka hmu chiang thei tawhlo. An thawm aṭang erawhin, an insual ngei tih erawh ka chiang hle thung.

Tih ngaihna hrelo deuhin ka dinna ngaiah ka ding reng ringawt a, an buai nuai nuai bawk nen, han kal pelh mai chu ka tîm deuh hlek a, mahse ka ke penin, kal pelh tumin ka kal phei dên dên a, mahse an zawn ka thlen ruala, ka ke bula mipa rawn thal let tawp vang chuan ka ṭe nghal ṭhat a. Rei lo te chu an chawl ve deuh niin ka hria.... Thawk leh khatah, ka bula thal reng chu a rawn tho thut a, nichina kawng chho lamah khan rang fe hian a tlan zui nal nal a, midang pakhatin a hnungah a zui ve nghal a, min kal pelh pahin min la su chawrh lehnghal. Zanin ka lo chhuak ta kher kher chu ka inchhir tawh khawp mai.

Ka lehhawi leh rualin nichina inkherh bet te pahnih kha an awm ngai rengin an lo la awm tih ka hmu zui a, a kherh bet tu zawk chuan tlawm a tum hmel loh nasa. "Joseph, thlah tawh rawh. I rek hlum reu reu ang nge," pakhat chuan tiin a ban ah a zuk pawt a, a la thlah duh ta chuanglo. Eng em em nge maw a hriat ni ? "Lallawmzual, thlah teh!!" A banah bawk a pawt leh vak a, chutah zawng a thlah ve ta hram e. A thlah rual rualin pakhat zawk chu a khuh nghal bawrh bawrh a, a theih anga rangin nichina kawng chho lam kha a pan ve nghal a. Ngawi rengin a kal liam ve mai ang chu tih laiin, "In la hria ang," a la rawn ti hram a, nichina kherh bet tlat tu thinin a tuarlo leh pek ania nge, "A khanglang chuan, Valriang ! Kan puanchhia ai pawn i hlui zawk," a ti ta zêk a, a ṭhianpa in a lo chelh ve chung pawhin a la thinrim hmel khawp mai.

"Zawng Vala mai mai chuh !" A la ti hluk hluk reng a. Ka inthiar fihlim vat a ngai ta in ka hria. Hemi te hi, tute nge maw an nih le ? Khawlaiah an insual ringawt lehnghal a, an bul hnaia awm ve reng chi pawh a niin ka hre ta lo. "Nang kha !," kal pelh mai ka tum laia rawn ti chang deuh fak tu vang chuan ka phu nasa khawp mai. A lama ka va hawi phei chuan a kawng dawmin rum deuh hian min lo melh a, chutah zet zawng a hmel ka hmu chiang ta khawp mai. "Eng nge i lo la tih ve reng a ? Haw vat ta che," a rawn ti rum leh ul a, a ve ngawt ngawt chuan a. A ṭawngkam aṭang reng reng pawn a thinrim hle tih a hriat theih.

A rang a rangin in lam panin ka phit haw nghal nal nal a, kan in ka hmuh theih chin aṭang phei chuan ka kal chak zual sauh a, a tlanin ka tlan ani ber tawh... "I lo va haw har.....," "Awi! Min ti phu alawm," kawngka ka khar fel chiah tiha ka hnung lama ka pi rawn ṭawng thut chu ka phut pui chiam a, ka thaw hluam hluam bawk nen a ngaih a ṭhatloh hmel khawp mai.

"Eng ngati hluam hluam nge ?" A rawn ti ta chiah reng a, "Eng nilo e," ka ti ve tak nain ka hah tih chu ka hmel leh ka thawk dan aṭangin a hrethiam nghalin ka ring.  Mut hmun thleng pawhin ka mi hmuhte khan ka rilru an luah ta reng a. Ṭawngthei deuh pa hmel mawlh khan ka rilru a luah a ni. An zingah khan kha pa hmel chiah kha ka hmu a, ka lam hawiin min rawn melh chiang ve bawk êm a, ka hmu chiang khawp mai.

April thla, thawhṭanni awm hmasa ber chu school ṭan ni a ni a, ka phur rual rualin ka huphurh ang lawi a. Mi ngainat leh lawm ka hlawhlo ang tih mawlh chu ka hlau a ni. Ruatkimi erawh kei anglo takin a confi ka ti dawn nge, lungkham vak a nei ve lo a, han zam emaw ang pawn a awm velo hrim hrim zawk a. Mahse zing kar aṭangin a inchei tawh a, a inchei zo hleithei meuhlo chu kan buaina a ni. Makeup hman a theihloh vangin powder tlem a inhnawih a, a sam erawh a ṭawn ṭha zing malh malh tawh khawp mai.

Dar riat leh a chanve bawr velah school lam panin kan inzui chhuak a, ka bag ah a rit deuh bawk nen, ka dâr chu school thlen hma ringawt pawh chuan a kham deuh ṭun tawh a, school gate kan thlen phei meuh chuan na tawh tak a ni.

School compound chhunga kan pen lut te chu, miin min en hrek hrek hian ka'n hre nghal ngawt pek a, ka ngaihruatna leh ngaihbelna mai mai ani tih lah keia hre chiang an awm chuanglo. School building chhunga kan luh rualin, kan classroom tur zawngin kan buai nghal a, Ruatkimi te class chu inhnuai lama kan hmuh mai laiin kei erawh inchung lam daihah a ni a, section B ka nih dawn vangin, kan hmu nghal lawk lo a. Kan classroom tur chhunga ka va luh chuan mipa pahnih tlar hnung lama lo ṭhu tihloh chu tumah zu awmlo a. Ka duh duhnaah ka bag ka dah risk ve hmiah bawk a. Pawnah chhuakin Ruatkimi nen inchung corridor-ah kan ding dun a, kan ti ti ve malh malh a, dar a rik rual erawhin inhnuai lamah min chhuk san a, keipawh tîm deuh hian classroom chhungah ka lut a, kan ṭhutna lam chu hmeichhe ṭhutna ni hmiang ka ti ve ngawt a, mahse mi ṭhu an la tlem khawp mai.

Keimah nen chhiar telin paruk chauh a la ni a, mipa lam ṭhutna erawh a khat deuh ti tih tawh a. "Keini chauh hi kan ni dawn emaw ni, kan va tlem awm em em ve" ka ti ruk rauh ruah laiin kawngkhar lamah thawm a rawn awm a, ka hawi phei rualin hmeichhe pahnih, en mai pawha ṭhian an ni tih hriat deuh hi an lo lut a, an hnunga an mahni ang chiahin pahnih bawk an lo lut leh a, a hnung bera kal erawh amah chauhin a ni tawh thung. An rawn luh tirh phat aṭangin tlar hnung lam an pan nghal a, a hnung ber leh a hma chiah awl laiah an va inhnawh nghal tawp tawp a. An hmelṭhat hlawm hlawm nen, an pawlawh hmel reuh ka ti.... A hnung bera rawn kal erawh, ka hnung chiaha ṭhu te bula chuan a rawn phei a, a rawn ṭhut thlak ve rualin an ti ti nghal bawrh bawrh a, an ṭawng sep sep hi a ni zawk mah.

Teacher a lo luh rualin kan ding nghal sap sap a, an lawm viau aniang, an au deuh huk a, an ri nghal chelchul bawk. "Silence," Sir-in a tih rual erawhin an reh leh diak a, ṭhu tura min tih hnuah a hming leh a awmna veng te, a subject lak turte thlengin a sawi nghal a. A ṭawngdan leh a chetzia te chu a dam thlup a, a fel hmel viauin ka hre bawk.

Kan class chu mi 34 kan ni a, hmeichhia chu a tlem zawk kan ni a, tlar hma lam kan reh ṭhap laiin tlar hnunga hmeichhe pali ṭhute erawh an thawm a ṭha reuh khawp a, a nui ring thei viau bawk. Kan class teacher chu Sir Zorema a ni a, a hmel en rêng pawhin tlangval la ṭhalai tak a ni tih a hriat theih a, mi a fiam peihin, a uang ve viau a. Midang pawhin an nel viauvin ka hria.

"Abigail," kan Sir-in a tih rualin ka lamah a rawn thle zeuh a, chutih rualin ka bulah ka ṭhutna hnung chiaha ṭhu ve pakhat chu a rawn ṭhu phei a, "Ṭhutpui rawh," a tihna anih ka ring. Keimah chiah kal thar ka awm vangin inhmelhriat tirna min neih tir a, midang pawhin an hming an sawi ve liam liam a. Mipa lam tlar hnung bera ṭhu zinga a lian ber chu Abraham-a ani a, a hmel en reng aṭang pawhin a at hmel hi ka han ti khawp a. A au lung lung danah ka rin dan chu a dik ngei ani tih ka hrechiang ta viau.

"Kum tir aṭang hian ṭha deuhin zir ula, hahdam deuh leh enjoy deuhin. Exam-naah pawh pass vek kan tum ang," Sir Zoreman a tih mek laiin, "A mark pe tu tur chu nang i nia...," Abraham-an a lo ti hmanhmawh a, kan nuih tet tet ringawt. Roll call kan neih hnuah, kan Time table tur kan copy mawlh mawlh a, chutih laiin ka bula ṭhu chuan ka pencil hman min rawn dil a, ṭha takin ka lo hmantir ve mai bawk. "Abygail ka nia, Muanpuii tiraw khah ?" A rawn ti sap a, "Aw...," tia ka chhan rualin, "Khawi vengah maw in awm ?" A lo ti nghal var a, kan veng awmna leh ka pi ka awmpui thu nen lam ka sawi ta duah a, ani pawh a pa hnathawhna vang chauha heta awm ta an nih hmel.

"Hei, ka hnung ami te hi ka ṭhiante an nia," a tih rualin hnung lam ka thlek a, kan hnunga hmeichhe pahnih ṭhu te chuan nelawm deuh hian min lo nuih a, ka tih ngaihna hrelo chuan ka nuih tawi tak ringawt. Mi biangbiak thiamlo leh, sawi tur mang pawh hre vaklo chi hi ka ni ve a. Ṭawngkam mawi deuh deuh han hman dawn hian ka lai tlat zel pek a, ka hahthlak ṭhin teh asin aw...

"Hei hi Sawmtei a nia, chuan hei hi Afeli," a ṭhiante pahnih min hmelhriat tir lai pawh chuan awm dan tur ka haihchham leh tlat pek a, nui hmel put sâng reng mai loh chu tih tur dang thlawt ka hrelo. "Ah ! khu chukchu," hnung lam aṭanga an rawn tih rualin kan hawi let ṭhap a, tlar hnung lam hmeichhe ho chu an tho nghal ṭhuau a, ṭhuthleng leh dawhkan hnuai an thleng nghal du du bawk. "Chukchu ani aw zawnglo. Rammu a nih hi mawle. Awi, Lalnunmawi ka zahpui lutuk che. Chukchu dum i hre ngai reng reng a mi ?" pakhat chuan tiin a kun sawk sawk a, rammu lian ve ang reng tak hi a kutah a rawn keng chhuak hlawl a. A banah a vah tir nghal daih bawk.

"Tenawm e... kha tiang te chu tukverhah khan peih chhuak daih ta che u," Afelin a lo ti ve chu, "Nang chu lo ngawi ngam rawh." A chhar tunu ber khan a lo ti hmak a, Afeli chu a tum kawh teh asin aw... Period inthlak lai tak anih vangin teacher an lo la lut lova, an inchhang pawr vel ang tih ka hlauh deuh vangin, Afeli chu a ṭawng leh ang tih ka lo hlau ru khawp mai.

Classroom leh lunch break chhung zawng pawh chuan Abygail-i te ṭhianho bulah chuan ka tal ve ta reng a, kan inkawm nel ve tulh tulh a, school chinchang nen lam an hnen aṭangin ka hre chho ve ṭan a, a nikhatna aṭangin keichuan ṭhian ka chharah ka inngai nghal hmiah a, vannei ka inti ru khawp mai.

Banah Ruatkimi nghakin kan haw rual a, in kan thlen chuan ka piin rawngbawl a lo ṭan ti tawh a. Inchung lamah chhovin ka han inthlak sawk sawk a, inhnuai lama ka chhuk leh hnuah ka pi puiin rawng ka bawlpui a. Alu chan mawlh mawlh pahin vawiin ka hun hman dan ka hrilh ve siam siam a. Dar nga a pelh meuh chuan rawng bawl kan peih vek tawh a, tlaiah engmah ka eilo bawk nen la ril a ṭam tawh khawp mai.

Zan lamah ka zirlai lam ka enlawk ve a, rin ai takin ka rilruah a lut ta phian a. Ka zirtui ve ang reng khawp mai. Dar 10 bawr velah ka mu ve thei ta chauh a, intih fai chhung hi hun ka hmang rei ṭhin a, ka che muang thei suar suar lutuk hi ka chhungte pawn min hauh tamna ber ani ṭhin reng a ni. 

A tuk school ka kal chu awm a nuam duh vaklo. Tlar hnung hmeichhe ho chuan mei nei deuh deuhin ka bula ṭhu te pathum chu an ti leh fek fek ṭhin a, class ṭan hma pawhin an inchhang thinrim tawh nghe nghe. Abygail-i bik chu an rawn tawng leh ṭhin a, an inhaw viau han ti dawn ila, Abygail-i berin engmah a sawilo a, thinrim hmel emaw haw hluah hluah hmel pawh a pu chuanglo. Afeli leh Sawmtei zawk chuan an huatpui zawk a, Abygail-i ngawi reng te chuan an thin a tirim tih sawi dawtlo mahse ka hre chiang khawp mai. An mahni ena ka va hawi phei apiangin, tlar hnung hmeichhe ho chuan chiang deuh hian min lo melh ṭhin a, ka ngaihbel nge ni, min melh rum ul te hian ka hre lehnghal a. En pawh ka en rei ngam meuhlo.

Vawiin ah Sir Zoreman class vawihnih a neih avangin, a period hnuhnung zawkah chuan class cr kan inthlang fel a. Kan class Cr turah Benedict an thlang a, a assistant tur erawhin Lily an thlang thung. Lily chu tlar hnung hmeichhe zing ami a ni a, a zia a zawi awiin a dam thlup mai a. Mahse tlar hnung zinga a tel ve miau vangin ka hmu pangai hlei thei meuhlo. Tunah rih chuan misual tak hmuhin ani ka hmuh vek tawh ni.

Class banah Ruatkimin min lo nghak a, in kan thlen chuan ka pi a lo muhil a, a muhil hmel te chu ka lainat takzet zawk. Nilengin inah amah chauhvin a lo awm ṭhin awm si a, khawharna leh ka pu ngaia a lunglenna te nen, kum upa lam tawh a ni a, kawm hlim tu leh a khawhar hnemtu a mamawh lai tak tur a ni. Kei lah naupang mai ka la ni a, zirlai mai ka la ni bawk. Engkim ka duhdan angin a thleng theilo a, ka zirlai chawlhsan ngawt thei ka ni lo bawk. Ka ngaihtuah chian chang hi chuan putea hi ka han dem dawn dawn ṭhin a, mahse dem ngawt theih anih bik loh zia ka hre ve leh lawi si a, ka tan chuan tih theih a awmlo tluk a ni.

Kan inthlak fel hnuah chokaah lutin rawng kan bawl a, ka dal kan ka thlak fel vek tawh tihah chi thlak mai ka han tum chu a bur a lo ruak vek a, lei khawl sa pawh engmah kan lo neilo chu niin. Ruatkimin ṭhenawmte ta a va dil chûk chûk a, a rawn la hnem ang reng si a, a inthlahrun awm duh khawp mai.

Chaw ka chhuan hnuah, Ruatkimi chu ka chawhmeh chhuan ho vil tura hrilhin chi lei turin ka chhuak ta tho a. Dawr dang pan lovin Nu Maengi dawr bawk ani ka pan leh ni. A dawr chhung ka thlek zeuh chuan mi an lo khat reuh khawp mai a, a kawta dingin ka han nghak leh rih a, a dawr hi a te ve angreng bawk nen, a kawngkaah pawh mi pakhat chiah an leng thei ang tih theih tur a ni. Mahse a zuar chikim ve viau a, te reuh te ni si hian a kim ve biai reuh a, a dawr neitunu ang chiah a ni.

Rei tâwk fang ka din hnu chuan kawngka lam hawiin ka inher a, pen luh mai ka tum laiin dawr aṭanga lo chhuak tur chiah nen chuan kan intawk a, a hmel ka hmu chiang ta chu ka meng âwk thei. "Awi, hmelchhe pa !" Ka'n ti ringawt pek a, ka koh dan vang chu nge ni, tûr fe hian min en a, a chal a ti chuar nghal nûng bawk. Hepa hi, kha zan ami kha. Amah ngei ani, ka chiang lutuk tlat.

"Ihi le aw haw !" Min en vung vung hnuah a rawn ti deuh hluai a, hnunglama a awn vak rualin a hnunga ding nen chuan an intauh ri nghal bawp a, pakhatin a tukhum a tuai vut vut rualin pakhatin a chal a tuai ve thung a. Ka hma maia ding chu a nuih vur vur laiin a hnung zawk a mi erawh a nui ve miahlo. Nuih a hnekin a thutak lutuk, a thutak lutuk tlat.

"I dam maw ?" A hma zawk ami chuan a rawn ti ve teh ngawt a, min hai nge, a zahtheihloh vang hrim hrim zawk ni dawn ni ? Chhang loin ka en rûn rûn ringawt a, engah nge maw ka chhan ve ngawt ang ni ? A hmelhriat pawh ka ni tawp silo a. "Nangmah kha, Zâwri kha," te chu min la ti tak deuh deuh a, hepa hian min hai anih dawn hi, min hai anih ka ring ta ber. "Chutiang ka nilo e a," ka lo ti deuh hmak a, dawr chhunga ka luh thleng chuan min enin a nui vur vur reng a, a hriatna a hlauh em maw ni dawn zawk ni ? A va han mawl em em ve mawle.

"E...nang elaw, i va fel ṭhin ve aw..," ka luh rualin Nu Maengin a lo ti nghal seuh seuh a, "Chi ka lei duh a, engzat nge in tih ?" Ka ti ve nghal mai a, an dahna te leh a man zat nen lam phur deuh hian min hrilh nghal a, heihi alawm dawr a nawm em em chhan. Ṭhenkhat dawr changkang deuh nei ve si a, nui hmel pu chuang silo ho ai chuan hei laia a ni ei chawp dawr ve mai mai pawh hian dawrtu a ngah zawk daih ang.

"Kha, sweet hi ka lo khiuriu ang che, min lo dawr ve vang vang ṭhin sia," ka chhuah dawnah chuan a rawn ti a, tengtere sweet pakhat hi min pe a, chengkhat man lek ni mahse lawmthu ka sawi ve luam a, ka haw pawh chu ka phur sar sar khawp mai. Nu Maengi dawr hi kan vengah tho a awm nain, vang tawp lama awm a ni a, in leh in inkara dawr tereuh te awm ve ang chi kha a ni a, kan in bul hnaiah pawh dawr dang a awm ve tho nain a nei chikim ber a, chuvanga va pan vang vang ṭhin pawh ka ni.

Zanriah kan ei laiin ruah a tla seng seng reng a, kan eikham ve meuh chuan a sur hian a sur buan buan tawh. Rei loah current a rawn thim zui a, inverter kan neih ve lemloh vangin mawmbati ka chhi êng a, a awmlo zankhua ang tih a hlauhawm khawp mai. "Keini khua ve hi zawng, ruah sur hlek se a thim nghal zel a, a awm ve chhunah lah rei lo te te hi a nia, a chang leh 'Thing tluin a delh' te an ti thul, a hneawm zo zai tawh emai," ka piin a ti hluk hluk a, a room lamah a lut zui daih bawk. Mawmbati nena thleng ka sil laiin ruah sur chu a rawn zia leh deuh a, mahse rei a riallo, a hma aia nasa mahin a sur emaw tih mai tur a ni. "Zanin chu mu hma mai ang u, kan thim rei hmel ang reng si a, mawmbati pawh kan hmang zo thei mai ang," ka pi lo chhuak leh chuan a rawn ti a, kan lo pawmpui khawp mai.

Thleng ka sil zawh chuan mu turin an pindan lam ṭeuh an pan a, kei erawh kawngka kalh ṭha turin choka lamah ka phei leh rih a, ka kawngka kalh ṭha tur chuan kan gate inkalh lo chu ka va hmu fuh a, thli thawt vanga a invaw ri bur bur ri ka hriat vang a ni mah zawk. Choka aṭanga chhuakin inchung chhohna step sira kan nihliap dah chu ka va la leh rih a, kawngka hawngin gate chu ka va khar ṭha sawk sawk a, inlam pana inher leh mai ka tum chu, ka mihring va hmuh vang chuan ka hawi let leh chiang kher mai.

Kan inlam panin a rawn phei chhut chhut a, hnuai lam ena a kun tlat vangin a hmel erawh ka hmu theilo thung. A rui em mawni ? Nge mihring nilo in thla, emaw ramhuai, zombie zawk mawle. Chutiang anih chu ka ring chiah bawk silo, kan in bula street light hnuai a rawn thlen takah phei chuan ina tlanluh thut in ring ranin ka lo awm tawh a, mahse a rawn hnai leh chiah tihah, kawngpuiah chuan a thal thla nghal tawp a, keimah zawk chu ka lo phu zawk lehnghal.

Kawngpui sir deuh laiah chuan amahin a let tual a, eng nge maw tak chu a chungah a thleng niin ka hria. Ka va pawh mai ngamlo nain kan gate bawh ti tih deuh hian ka âwn ṭhung tawh a, amah chu ka thlek ha ha bawk. Ruah lah chu a sur nasa mai a, hetianga awm tir ngawt chu a chiin ka hre ta lo. Kan gate ka kalh ṭhat thlap tawh chu ka hawng leh rawk rawk a, a lam pana ka kal lai chuan a che châng lova, zangthal zawngin a mu reng a, a bul ka thlena ka va bih chian chuan a mit a lo chhing a, ti hian a thi ringawt tihna nge ? Chutiang em em anih ka ring chuang bawk silo. Hlauthawng deuhin ka ṭhu thla sawk sawk a, a hmai bulah ka beng ka zuk dawhhnai da da a, a la thawng ngei chuan ka hre si a ni.

"Ṭhianpa," tiin ka sawi dat dat a, a mit a rawn meng zawk nain a chhing leh nghal a, chutah ka inrin hman hmain a rawn in let thut a, a zuang tho zawklo chauh a ni. A mut dan thlakin bawkkhup zawngin a mu ta daih a, a ruah do na vang tih hriat takin a hmui a duk deuh chur tawh a, sawi hmaih theih miahloh chu a hnar ngul a nalh hle a, a mithmul chu a sei sang a, pawh er emaw tih mai tura er ṭha a ni bawk. Ka rilru te te chuan ka mithmul atan ka lo ît ru khawp a, ngaihtuahna ho tak a ni nain ka la awt tho tho.

"Ka pu," ka ti leh teh ngawt a, ka bana ka sawi dat dat rualin a rawn rum ṭual ṭual a, a rawn harh mai dawn emaw ka ti lain a la meng chuanglo reng reng. "Ngati nge min kalsan ?" A rawn ti tham chhel a, a aw chu ka hre thei chang chang chauh a ni. A ṭawng zawng chuan zu rim ka hre thei lehnghal a, mahse nasa erawh a nilo thung. Zu rim leh zu rim lo te chu ka hre hrang ve bawk e..ka pa in a in ve zeuh ṭhin miau a.

Ka beng dawh hnaiin hnai deuhah ka bih a, a ṭawng leh hun ngaichangin ka awm rân a, a rawn ṭawng leh rual erawhin, "Ka ngai lutuk che," a rawn ti tawl mai. Hepa hi ! A bialnu in a ṭhen ang a, a rilru nain zu a in vak anih ka ring ta ber. Ruih chhum hmawk a tum anih dawn hi.

"Ṭhianpa, harh teh," tih pahin ka sawi deuh nawk nawk a, a hmel a la upat vakloh vangin ka ṭhianpa koh ve ngawt a, chu lam care hman si se ka ni tawhlo tlat. "Nu....," a rawn tih leh rualin phone vibrate ri ka hre zui zat a, ka phone ri anilo tih pawh chiang takin ka hria. A phone awmna âwm zawngin ka dap kual a, a kekawr ipte dilama a phone ka dap fuh rualin ka phawrh chhuak ve thawr a,  a screen a huh deuh hlek vangin ka kawrah ka'n hru hul leh rih a, ka bula mi lah chu zawi te te hian a phun sep sep reng a, eng emaw sawi a nei tih chu ka hria a, mahse eng thu nge a sawi ka hre chiang thei chuanglo. Lo call tu chu 'Sâmdâla' tihin a save a, 'Eng emaw tal tih theih anei mahna' tih thu ah ka la ve thawr a, ka beng bula ka dah hnaih rualin, "Zo-a," a rawn ti teh vaka, ruah sur bengchheng karah pawh a aw chu a ring ṭha ngang mai. Ruah sur kara ka hriat theihloh hloh luat vanga hnai deuha ka lo ngaithla te chu ka inchhir ta khawp mai.

"Hello !" Ring lenglawng deuh chuan ka ti a, "Tu nge a ?" A rawn ti let chu, "Hei kan inkawtah a tlu ringawt a, engtin nge ka tih dawn ?" Ka hming sawi loin ka ti tlang nghal tawp a, a vawt vur tawh bawk nen, inchhunga luh vat vat chu ka duh tawh. "Khawiah nge in awm ? Ti khan lo awmpui lawk rawh," a rawn ti sawk sawk a, a ṭawng dan aṭang chuan a hmanhmawh hmel khawp mai. Kan veng awmna leh kan in awmna bawr vel ka hrilh a, kan veng chu ka sawi thei ve mai nain kan in awmna tak chu ka thiam dan dana ka sawi pawhin a hre theilo tlat a, "I chhungte hming sawi mai rawh, kan vengah chuan hriat loh ka neilo," a ti teh tlat a, 'A uang zawk emaw ni' ka tih ruk rauh rauh laiin, "Sawi vat rawh," a rawn ti leh a, min tur hmanhmawh tawh khawp mai.

"Pi Ropari te inkawtah khan, a tunu ka nia," ka ti ve ta nge nge a, "E.... pi Partei tunu maw i nih a ? Tikhan sawi vat tur che alawm," a rawn ti sam êt a, keimah chu ka dang ta lel zawk. "Lo awmpui lawk rawh, kan lo kal mek," a tih hnuah phone a dah a, ka bula let reng hmel ka hmu leh meuh chuan ka hah hlui thei a, hah a dam mawlh  lo. Kei ang thoin a ni pawh a hah dam bik chuanglo tih chu a chal a tichuar leh ṭhin vang chuan ka hre chiang hle a, eng emaw mawlh tu nei ṭeuh reng ang mai hmel hi a pu a, eng emaw sawiin a phun leh nuah nuah ṭhin a. Sawi a nei tih chu ka hre nain a sawi ka hre hleithei meuhlo thung.

Rei tawk fang kan awm leh hnuah pawh lo hruai tumtu te chu an lo la thleng thei chuanglo reng reng. Tun thawh mai ka rilruk tawh laiin kan hma zawnah car var pakhat hi a rawn ding a, ka lo en reng laiin driver seat lo lam aṭang chuan mipa pakhat hi nihliap nena rawn chhuak a. A nihliap khum ber kher lah chuh. A senno lar vût mai hi a ni a, a tlangah pangpar lem a chuang chuai bawk a, a inchei bawraw ve hmel teh lul nen, a inrem lo ka lo ti ru khawp mai.

Kan lam pana a lo kal laiin car khalhtu zawk chu a lo chhuak ve chiah a, rang deuhin nihliap kengtu zawk bulah chuan a phei nghal a, nihliap chu an inzawn nghal zat a, an lo kal hnaih takah chuan an hmel chu ka hmu chiang thei ta chauh a, nihliap kengtu zawk chu kan hmelchhepa-a kha lo ni rengin. Min hmu chu a ni pawh a phâwk ve deuh a, mahse a reilo thung. "E...Zâwri chu!" A rawn ti deuh hluai a, lei erawh min koh dan mawi fahranlo vang chuan ka lo tum bar a, min bengkhawn zui tawh loin kawng sira thal reng zawk chu a buaipui zui a, a u emaw a ṭhianpa vel anih ka ring.

"Zo-a, i harh em ?" Tiin a sawi dat dat a, ka din chhuah hluai rualin pakhat zawk chu ka sirah a rawn ding zui a, ka nihliap chuan kan inzawn ta ngawt. "Dennis," tiin nihliap senno-a chuan a sawi leh nawk nawk a, "Engtin nge a awm a ?" Ka bula ding chuan thlek deuh ha ha hian  lo ti a, "A buai leh tawh anih dawn hi, a hahthlak ṭhin ania," nihliap pink-a chuan a rawn ti a, a rawn din chhuah rualin, "Car-ah sawn dah lut phawt mai ang, hei a hmui pawh a duk tawh ania," a rawn ti leh sap a, an chet chuah rualin an hnungah nihliap nen ka lo zui ve a. Nihliap neilo zawk chu ka zawn a ni ber zawk.

A dar lehlam lehlamah kuah thovin car lam an panpui a, an dah luh rual erawhin buaina dang an nei leh ta tlat...Hemi te hian hruaina tur pawh zu han hre miahlo pek a. "An in ah chuan ka dah ngam teuhlo, a pa a den emai," kan hmelchhepa zawk chuan a ti a, car chhung lam chu a melh pah zeuh bawk a, mipa pahnihin nihliap senno an inzawn chu nuih a za zawk khawp mai. "In in ah a theihloh a mi ? Nutei te chhungkua an lo zin a, a chi chiahloh ang keini chu," pakhat zawkin a ti dek dek chu, "Chi nang, keipawh a rukin anih hi ka lo chhuah. Mother-i a bawn leh piap piap dawn emai," a ti nghal zaih a, min rawn en rual erawhin ka lo hawi sawn daih a, an ṭawng lo ngaithla ve kar anga lo awm kha chu ka duhlo ve tlat.

"Ruatfela te in ah hruai phei tawp mai ang, a tih theih mai ang." Pakhat zawkin a tih rualin ka lamah an mit a fu nghal a, min phutna an la nei emaw ni ka tih rilruk laiin, "Kan lawm lutuk ania aw Zâwri," kan hmelchhepa chuan a rawn ti ve ngei a, ka lu ka lo bu nghat nghat ringawt a. An nuih ka tiza ta emaw tih mai tur hian an khi ṭhaw reng, keimah zawk chu ka awm thiamlo lek lek zawk a ni.

"Anih, ka lut dawn ania," ka tih chuan min mangṭha ve ta mai a, inher in kan in lam ka pan zui a, gate ka luh ruala an thusawi ka hria chu keimahin ka nui tet tet ringawt. "Engah nge maw hetiang vet vut te i rawn ken a ?" Pakhat zawk khan a ti hlak hlak, "Emergency thil anih tawh kha mawle aw... Pawnah a lo inkhup a, ka la ve ngawt pek a, a rawng lamah buaina hman a awm tawhlo hrim hrim. Ka nau ta anih hi, a khum theih chuan a tawk," kan hmelchhepa chuan a lo ti sam êt a, hawi let tawh lovin inchhungah ka luhsan ta daih thung.

Ka nihliap chu doormat chungah ka tung hul a, kawngka kalh ṭhat mai ka han tum chu ka kuta ka phone hum lai vang chuan ka phu chiang kher asin. Ehe...a phone kha ka keng thlang ringawt chu lo niin. Kawngka hawngin ka va dak chhuak leh rih a, mahse an awm tawh miahlo. An kal tawh anih ka ring...

Tih theih awm tawh heklo le, kawngkhar kalh ṭha in inchung lamah ka chho a, ka pindan thim mup ka luh rualin ka phone ka zawng nghal ruai a, ka hmuh mai loh vangin ka kuta ka phone hum lai zawk chu ka on eng a, a flash light ka on en rualin ka phone chu ka zawng zui leh a. Khuma a lo let ngât ka hmuh hnuah la kangin pakhat zawk chu ka off a, pawhdawh chhungah ka dah zui zat a, ka thawmhnaw huh nel nual ho chu ka thlak leh sawk sawk a, khuma ka mutthlak rual erawhin mutchhuah chu sawi loh, ka harh kur reng a, nichina mi te mawlh khan ka rilru an luah a ni.

'Engtin a phone hi ka pek let ang ?' Tih ringawtin ka rilru a luah a, kawl phe zur zur leh ṭek tla ri leh chhuai chhuai ṭhin te lah chuan min ti harh kur reng a, ruah sur lah chuan ka mut tih chhuah a hnekin min ti harh tulh tulh ni maiin ka hria. "Lalmuan, thawh a hun," ka piin min rawn sawi dat dat chuan ka harh ve ta chauh a, ka lo inngaihtuah muhil tihna nge ni ? Dar zat ka han en chu dar riat a lo ri va va tawh a, thaw ka hai chhiava chu a ni.

Bathroom lam panin ka inphih vai sawk sawk a, choka ka luha ka piin rawng a lo bawl peih diam tawh tih ka hmu chu ka lawm kher mai. Ka thaw deuh huai thei. Ruatkimi pawh nghak khaw muang ta lem chuang loin ka bag ka la sawk sawk a, school lam panin a tlanin ka tlan hi a ni ber.

Ka hmanhmawh luatah ka kalna ka lo en lo nge ni, kawngkhuar lai deuha tui tling khawm chu ka dai nghal burh a, ka muza leh pheikhawk zawng zawng a huh vek lehnghal a, ka ṭah a chhuak ṭun tawh zawk. Vawiin kher kher chu ka vanduaina ni a nih ka ring ta ber.

"I lo chuang ve duh em ?" Kawng sira ke dinglam huh pur chunga ka kal hnak hnak laiin ka bulah bike a rawn ding dat a, hawi chhuak a, amah ka en chuan ka hmuh hnu a ang ka ti riau pek a, mahse helmet full face a khum miau vangin a hmel erawh ka hmu theilo thung. "Aa..." ka han ti lawi rât a, inthlahrung si, mamawh bawk si dinhmunah ani ka din ni. "Lo kal rawh," amah zawkin a rawn ti takah chuan ka hnial duh ta biklo a, kan school form hak a in an ve ve danah kan school ami tih ka hre nghal phawt a, kan kalna tur a in ang ni hmiang tiin ka chuang ve thawr.....

School lam pana kan tlan chhung zawngin kan inbe lo hrim hrim a, tlak hlau deuhin a uniform kamis hmawrah ka vuan ṭai a, ka awm dan chu nuam fahran lo tak a ni. Ka ṭang ṭung a, ka hahdam hlawllo. Kan thleng har lo, minute reilo te chhung ani. Mahse ka tan erawh, darkar khat ang vela rei ni maiin ka hria. A bike aṭanga ka chhuk thlak rualin a helmet a phelh ve zat a, awiii...hepa hi! Teh nawlh chuan.

"Jaden !" Ka ti sap a, ka mitmeng aṭang chuan ka phawk zia a hriat theih ka ring. Min rawn en in a kiai deuh suk a, a nui hmel chu a hma ami ang reng kha a la ni. A nelawm a, a nui mawi takzet. "Mak i va ti em em ve, ṭhawn thut che pawh ka tum hranlo asin," a rawn ti a, "Kal ang le, kan tlai ṭep," tiin a sana bun lai chu a en zeuh a, school gate lam panin kan inzui phei ve thuai bawk.

Hetah a kal tih chu ka hria, mahse a hma zawngin school-ah emaw, in lamah pawh ka hmu leh ta miahlo kha a nia, tunah a lo lang leh thut ang lawi a, ka beisei lai zawngin hmuh tur a awm ngailo a, ka beisei loh lai tak zawka a lo lang teh thut hi mak tih loh chi rual a ni lo. "Kan va in hmu khat ve," ka ti teh ngawt a, a ni erawh a nui tawi tak a, "Kan khuaah ka haw zawk alawm," min rawn en in a rawn ti a, ka bangbo tulh tulh hian ka hria.

"Hemi khua hi i ni nang nge ?" Ding deuh datin ka ti a, ka chala rawn khawih zeuh pahin, "Ni mai mai nang," a ti duh lek chauhva. Ṭawng leh mai ka tum rualin dar a lo ri a, engmah ka sawi ta lemlo. Classroom chhung ka lut chu boruak a lo ṭang ṭha hle a, ka luh tirh phat aṭangin ṭi dâkin ka awm a, teacher table bula lo in dinchilh pahnih te erawh an in cho hmel ar ar khawp mai.

"Engah nge maw Abygail-i hi i rawn tâwng kher zel le ?" Ka ṭhutnaa ka bag ka dah thlak rualin Sawmtein a ti kha kha a, a hmaa ding nen chuan an inmelh na tawh khawp mai. "Eng nge ? A theihloh a mi ?" Tham lo zetin a dinchilh zawk tlar hnung hmeichhe zing ami chuan a ti let sak a, Sawmtei mitah chuan thinrimna meipui ka hmu thei tawh hialin ka hria. "I va thu awm ve," tlar hnung hmeichhe zinga a sam sei berin a rawn ti ve leh a, Sawmtei chuan engmah a sawi tawhlo nain kutthawh mai pawh a hreh tawhlo tih a kut humruh dan aṭangin ka hre thei.

A tu ve ve pawh an ṭawng leh hmain Sir Zorema a lo lut a, hmeichhe pahnih te pawh la thinrim viau mahse an ṭhutna lam an pan ve mai bawk a, mipa ho lah chuan uang thuangah an la tih hriat tak hian fiamthu thawh nan tak an hmang a, ngeiawm duh tak hi an ni. "Backbenchers-in set khat an la phawt a......," uang deuh hian an lo ti a, Sawmtei hmel ka va en chu ka khawngaih hial zawk. A thinrim viauin ka ring, ka ring dik ngei bawk.

~ End of Chapter-2 ~